Kudiza 6
Wanta waNzambi Hichumanyi?
Wanta waNzambi wekala kudihi? (1)
Mwanta waniwu Wanta hinyi? (2)
Kudihu amakwawu akayula hamu na Mwanta? Neyi dimu, an̂ahi? (3)
Chumanyi chinakumwekesha nawu tudi mumafuku akukuminina? (4)
Indi Wanta waNzambi wukakon̂eladi antu mumpinji yakumbidi? (5-7)
1. Mpinji yadin̂ayi hanu hamaseki, Yesu walejeli atumbanji twindi kulombela Wanta waNzambi. Wanta himfulumendi yatwamininan̂awu kudi mwanta. Wanta waNzambi himfulumendi yadimena. Ayisha mwiwulu nawa yikayula hadinu iseki dejima. Yikajilisha, hela kujilika, ijina daNzambi. Yikalen̂ela muchima waNzambi awili hamaseki neyi chawilan̂awu mwiwulu.—Matewu 6:9, 10.
2. Nzambi wakanini nindi Yesu wakekala Mwanta waWanta Windi. (Luka 1:30-33) Hadin̂ayi Yesu hanu hamaseki, welili wunsahu wakwikala Mwanta, n̂anji, ni yuuli wawanina. Chafuntiliyi mwiwulu, hiyamuswanyikili kwikala Mwanta waWanta waNzambi hayoyenoyu mpijiku. (Aheberu 10:12, 13) Mu 1914, Yehova wamwinkeli Yesu wuswa wamukaniniyi. Kufuma hayina mpinji, Yesu wayulan̂a mwiwulu hi mwanta waswanyikawu kudi Yehova.—Danyeli 7:13, 14.
3. Yehova watonda nawa amayala nambanda akashinshi kufuma hanu heseki kuya mwiwulu. Akayula hamu na Yesu, akekala anyanta, ansompeshi, ni atupristu awaantu. (Luka 22:28-30; Chimwekeshu 5:9, 10) Yesu wayiteneni awakwakuyula nawu muWanta windi nindi “kamukanka kawanyikoku kantesha.” Ekala 144,000.—Luka 12:32; Chimwekeshu 14:1-3.
4. Hayoyena mpinji oyu Yesu hekaliliyi Mwanta, wamunatili Satana hamu nan̂elu jindi atama kufuma mwiwulu kuyiholola hanu heseki. Iwu diwu mulon̂a yuma chiyinekalili yasweja kutama hanu hamaseki kutachika tuhu 1914. (Chimwekeshu 12:9, 12) Majita, nzala, yipupu, kuvulilaku kwa kuluwalala—yejima iyi “hichinjikujilu” chakushimuna nawa Yesu nakuyula nawa nyaka yamakonu yidi mumafuku ayu akukuminina.—Matewu 24:3, 7, 8, 12; Luka 21:10, 11; 2 Timotewu 3:1-5.
5. Katataka Yesu ken̂a asompeshi antu, wakayambola neyi chambulan̂ayi kabin̂a anyikoku na wampenbi. “Anyikoku” antu adimwekesha kovwahila kukuyula kwindi. Akatambwila wumi wahaya nyaka hanu hamaseki. “Ampembi” hiyantu owu anakani Wanta waNzambi. (Matewu 25:31-34, 46) Mumpinji yakamwihi kumbidi Yesu wakajilumuna ejima afwana ampembi. (2 Atesalonika 1:6-9) Neyi wunakuken̂a kwikala ‘mukoku’ wa Yesu, watela kutiyililan̂a kusan̂u ya Wanta ni kuzata kwesekeja nanochu wunakudiza.—Matewu 24:14.
6. Hayinu mpinji iseki adambujola mumatun̂a amavulu. Itun̂a dididejima dikweti nimfulumendi yadu. Nyuza iyi kakavula yazun̂an̂a muza wumu na mukwawu. Ilan̂a Wanta waNzambi wakahin̂a hadi makamfulumendi awantu ejima. Diyi yakekala mfulumendi yimu hohu kunyen̂umuka iseki dejima. (Danyeli 2:44) Henohu hikwakekala nawa njita, wumbaji, na yikonkojolaku. Antu ejima akashakama hamu mukukwatankana ni mukuwunda.—Mika 4:3, 4.
7. Mukuyula kwa Yesu kwe Ikombakaji da Nyaka, antu achikuhwelelu akekala awanina, niiseki dejima dikekala paradisa. Hakumana kwe Ikombakaji danyaka, Yesu wakekala namanishi dehi kwila yejima oyu yamutuminiwu kudi Nzambi. Henohu dihu dinu hakafuntishayi Wanta kudi Tata yindi. (1 Akorinda 15:24) Mulon̂adi wakubulila kulejaku amabwambu jeyi na ntan̂a jeyi chumochu chikela Wanta waNzambi?
[Mwevulu wudi hefu 13]
Mukuyula kwa Yesu, himwakekala kudihela hela chambuku