Mwiha kaPawulu Weyala Wadiña Wahamuka

Tudizenu hadi mukwenzi wapulwishili mandumi yindi. Mandumi yaniwu mukwenzi wadiña kapostolu Pawulu. Ijina dindi hitwadilukaku, ilaña tweluka netu wadiña wahamuka. Wunakukeña kwiluka yuma yakoñeliyi?—

Pawulu wadiña mukaleya muYerusalema. Amukasili muloña wakushimwina nsañu yaYesu. Amayala amakwawu atama amuheleli Pawulu, dichi amukwatilili kafuta. Ahosheli nawu: ‘Tumuleji mukulumpi wawamashidika kulonda yaleji amashidika amuleti Pawulu kuchota chanyiloña. Tukuswama kunsa yamukwakwa kulonda chakuhitañayi Pawulu tumujahi.’

Mwiha kaPawulu watiyili iyi nsañu. Welilidi? Wayili kukaleya nakumulejamu Pawulu iyi nsañu. Hohenohu Pawulu wamulejeli nindi yayi nakumulejamu mukulumpi wawamashidika iyi nsañu. Wunatoñojoki neyi chamupeleleli mwiha kaPawulu kuhosha namukulumpi wawamashidika?— Inehi, muloña mukulumpi wawamashidika wadiña muntu walema. Ilaña mwiha kaPawulu weyala wadiña wahamuka nawa wamulejeli mukulumpi wawamashidika iyi nsañu.

Mukulumpi wawamashidika welukili chakwila. Walejeli amashidika kwakwihi na 500 nindi amukiñi Pawulu. Wayilejeli nindi amutwali Pawulu kuKesareya nawowuna wufuku. Komana Pawulu wapulukili?— Eña, amayala atama hiyamulukukiluku. Kafuta kawu katama hikafuñunukili.

Yumanyi yiwukudizila kuniyi nsañu?— Aneyi nawa watela kwikala wahamuka neyi mwiha kaPawulu. Twatela kwikala ahamuka neyi tunakuleja antu nsañu yaYehova. Wukwikala wahamuka nawa wukutwalekahu nakuhosha hadi Yehova?— Neyi wikala wahamuka, wunateli kupulwisha muntu.