LWIHU 3
Nateli Kutiyañana Ñahi Nawanvwali Jami?
WADI KWILA ÑAHI?
Fwikijaku chumichi: Himpinji yamelela hefuku damuchisatu. Kamawu wudi nayaaka 17, namanishi dehi kuzata nyidimu yahetala, nawa nakukeña kunooka! Hakwambula TV nawa hakushakama muchitwamu chindi chachiwahi.
Haniyi mpinji, atata yindi hiyakwinza nakwimana muchiisu iku anahili.
“Kamawu! Wunakukisiladi mpinji nakutala TV chatela wumukwashiku mwanyikeyi nahomuweki yindi? Neyi anakuleji kwila chuma wachiilaña wanyi!”
Kamawu hakwakula nezu dañovu nindi “Munatachiki cheñi.”
Atata yindi hiyakuswina kwakwihi nayena. “Wunahoshi neyidi?”
Kamawu hakuhosha nakudishishimuna iku nakunyeñumuna mesu nindi, “Kwosi mwani.”
Ichi dinu Atata yindi anahili chikupu. Atata yindi hiyakumuzuwila nawu, “Bayi wuhoshaña nanami chamuchidowuku!”
Neyi yeyi wadiña Kamawu, wadi kukañesha ñahi iku kukala?
SAMBILAKU KUTOÑOJOKAHU!
Kuhanjeka nawanvwali jeyi kudi neyi kwendesha motoka. Neyi wuwana mukwakwa anawujiki, wunateli kuzatisha njila yacheñi.
Chakutalilahu:
Kansi wamumbanda wejina daLiya wahosheli nindi, “Chankalilaña kuhanjeka nawatata. Mpinji jikwawu nahoshaña nawu hakapinji kantesha, kuhiñahu akuhosha nawu ‘ñanakeniku, wunahosheña nanami?’”
LIYA WUKWETI NJILA JISATU JAKWILA.
Kuzuwila atata yindi.
Liya hakubidika nindi, “Tata, shenuku maana, iyi nsañu yalema! Tiyililenu!”
Kuleka kuhosha nawatata yindi.
Liya hakuleka kuhosha nawatata yindi nakukala kukwetiyi.
Kuhembelela mpinji yayiwahi kulonda akahoshi haniyi nsañu cheñi.
Liya hakuhosha nawatata yindi mpinji yacheñi mesu namesu hela yayisonekela mukanda nakulumbulula kukala kwindi.
Haniji njila jisatu, yimu yidihi yiwukumukwasha Liya kutonda?
ILUKAKU NEYI: Atata yaLiya analuwankani nawa wena aneluki wanyi chinaleteshi yahili. Dichi neyi Liya wukutonda Njila 1, atata yindi akwiluka wanyi chinaleteshi yahili. Chakadi nikujina, iyi njila yikuletesha atata yaLiya abuli kwiteja nsañu yinakuyilejayi nawa chikumwekesha wanyi kalemesha. (Aefwesesa 6:2) Mwamweni, iyi njila yikuyikwasha wanyi.
Wunateli kuwana njila yakuhanjekelamu nawanvwali jeyi neyi chochiwukubula kufunta neyi wuwana mukwakwa anawujiki.
Hela chakwila Njila 2 yinateli kwikala yaswayi kwila, ilaña yayiwahi nankashi wanyi. Muloñadi? Muloña hakwila nawu Liya yamanishi kukala kwindi, watela kuhosha nawatata yindi, nawa hakwila nawu atata yindi amukwashi atela kwiluka yuma yinakumumwekena muchihandilu chindi. Kumwena kwakwashanaña wanyi.
Hela chochu, Njila 3, Liya wukwiteja wanyi kukala kumukañeshi kuhosha nawatata yindi. Ilaña, wukufuukulahu kuhosha haniyi nsañu mpinji yacheñi. Nawa Liya wukutiya kuwaha neyi yatondahu kuyisonekela atata yindi mukanda.
Kusoneka mukanda kukumukwasha cheñi kuyileja nsañu yejima yidi kumuchima windi. Neyi atata yaLiya ataña iwu mukanda, akwiluka nsañu yejima yakeñañayi kuyileja nawa ichi chikuletesha atata yindi eluki kukala kunakumonayi. Njila 3 yikumukwasha Liya niatata yindi. Chili wukuhanjeka nawu mesu namesu hela kuhitila mumukanda, iyi njila yinashindameni hakufumba kwamuBayibolu ‘kwakufwila yuma yaletaña kuwunda.’—Aroma 14:19.
Njilanyi jikwawu jinateli kuzatishayi Liya?
Toñojokakuhu chuma chimu. Kuhiñahu toñojokaku chuma chinateli kufumamu.
LEKAKU NHOSHELU YINATELI KWAKAMESHA ANTU
Ilukaku neyi, yuma yiwahoshaña niyuma yatoñojokañawu anvwali jeyi nawu diyi yiwahosha, mpinji jikwawu yambukaña.
CHAKUTALILAHU:
Anvwali jeyi anakwihuli chinaleteshi wumwekani kuneña. Eyi hiwukwakula neyi, “Inakukeña wanyi kuhosha haniyi nsañu.”
Ilaña anvwali jeyi hiyakutiya nawu: “Hinayikuhwelela chakwila niyileji iyi nsañuku. Nukulejaku amabwambu jami iku kukala bayi enuku.”
Fwikijaku wunakumona kukala nawa anvwali jeyi anakukeña nawu akukwashiku. Neyi wuhosha neyi: “Bayi mwakamaku. Nateli kukwimanisha ami aweni.”
Chumanyi chinateli kutiyawu anvwali jeyi?
Njilanyi yayiwahi yiwatela kwakwilamu?