November

Nhoshelu yakasawuntu hiyatela kufuma mukanwa kamukaKristuku. Ilaña kudi nhoshelu yikwawu yakasawuntu yamwekanaña neyi yakasawuntu wanyi yitwatela kwikala asoñama nayu. Chakutalilahu, twatela kwikala asoñama neyi tunakuhosha hadi antu akweti yisemwa yacheñi, madimi, hela afuma kumatuña acheñi. Cheñi, hitunakukeña kuneñesha antu kuhitila mukuyihosha mazu akasawuntuku. Hoshenuña munjila yakukolesha akwenu. Nyakalenuña kuhameka chatela mudimbululeña, mwabokeña hela kutooba. AIsarela adiña nayuma yayivulu yakusakililahu, ilaña atoobeleña nankashi. Neyi tutoobaña tukuletesha antu amakwawu niwena atoobeña. Anukenu nenu nsañu yatama yaleteliwu akakwendesha ituña 10 yaletesheli ‘aIsarela ejima kutachika kumutoobela Mosi.’ (Kuch. 13:31–14:4) Kwambukaku neyi tuyihamekeña akwetu, chikuyikwasha kwikala namuzañalu. Dichi koleshenuña akwenu chakufuma hamuchima. w22.04 8 ¶16-17

Kufuma tuhu kunyima, Yehova nakwashi atwansi amavulu kwikala amabwambu jindi. Nateli cheñi kukwasha anyanenu kwikala amabwambu jindi neyi dichuma chinakufwilawu. (1 Kor. 3:​6, 7) Hela chakwila anyanenu anakukeña wanyi kumukalakela Yehova namuchima wejima, wukutwalekahu kuyikeña. (Mas. 11:4) Neyi amwekesha chanti nawu adi “nanyichima yashinshika,” wukuyikwasha kulonda ekali amabwambu jindi. (Yilw. 13:48; 2 Kushi. 16:9) Nateli kuyikwasha kuhosha yuma yayiwahi hampinji yatelela, yinakukeña kutiyawu anyanenu. (Yish. 15:23) Hadaha nateli kuzatisha manakwetu hela muhela muchipompelu kulonda ayikwashi. Hela chakwila anakuli dehi, Yehova wakayikwashaña kwanuka yuma yimwayidizishili kunyima. (Yow. 14:26) Yehova wakayikiswila neyi mutwalekahu kuyidizisha anyanenu kuhitila muyuma yimwahoshaña niyimwelaña. w22.04 21 ¶18

Chineli Satana hakweti wuswa wakuya mwiwuluku, dichi kuzuwa kwindi nakukusukwila hadi awayishewa ashalahu añimenu aWanta waNzambi nawa “akweti mudimu wakushimuna wunsahu hadi Yesu.” (2 Kor. 5:20; Efwe. 6:​19, 20) Mu 1918, amanakwetu 8 atiyakana ayikwatili nakuyinka nyiloña yakutwamba nawa wejima wawu ayikasili yaaka yayivulu. Kwesekeja nakumona kwawantu, amwekeneni tuhu neyi mudimu wazatileña awa awayishewa ‘anawujahi.’ (Chim. 11:​3, 7-11) Ilaña kumatachikilu a 1919, awa amanakwetu awayishewa ayifumishili mukaleya nawa nkumininaku nyiloña yawu ayifutili. Hohenohu amanakwetu atachikili kuzata mudimu waWanta. Ilaña chumichi hichamuletesheli Satana kuleka kuyilukuka antu jaNzambiku. Kufuma tuhu hayina mpinji, Satana napumbili “kaloña” kamakabisha hadi antu jaNzambi ejima. (Chim. 12:15) Mwamweni, “Aha dinu dihakeñekaña . . . kuumika nikukuhwelela” kudi etu.—Chim. 13:10. w22.05 5-6 ¶14-16

Muchimwenu, kapostolu Yowanu namoni mazanvu ayedi awantu ahakwilañaku chiyuulu chaYehova nawa anakutambwila nkisu yawumi wahaya nyaaka. Izanvu datachi dikweti antu 144,000. Anayifumishi hamaseki nakuya nakutuña nfulumendi, hela Wanta, hamu naYesu mwiwulu. Akayuula iseki hamu nayena. (Chim. 5:​9, 10; 14:​3, 4) Muchimwenu, Yowanu nayimoni anemani naYesu mwiwulu haMpidi yaZiyona. (Chim. 14:1) Hayaaka yayivulu yinahitihu, makombakaji awantu ayitondaña kulonda awanishi nambala ya 144,000. (Luka 12:32; Rom. 8:17) Hela chochu, Yowanu anamuleji nawu ashalahu hohu hela antesha diwu akekala hamaseki mumafuku akukuminina. (Chim. 12:17) Kuhiñahu mumpinji yalukadi lwasweja, awa ashalahu akayitwala mwiwulu kulonda akadibombi nawa 144,000, afwileñahu dehi. Mwiwulu akayuulaña hamu naYesu muWanta waNzambi.—Mat. 24:31; Chim. 5:​9, 10. w22.05 16 ¶4-5

Yesu wayidizishili akakumulonda chatela kudimonañawu munjila yayiwahi. Mpinji yimu, Yesu wayilejeli nindi: “Nsuki jakumutu wenu jejima ajichinda.” (Mat. 10:30) Awa mazu anakutukolesha sweje-e neyi twadimonaña netu twalema wanyi. Anatalishi mukwila nawu Tata yetu wamwiwulu watukeña hama, nawa watulemesha chikupu. Chineli Yehova watwiteja nindi tudifukuleña kudi yena nawa watoñojokaña nindi twashikilamu kushakama haya nyaaka mwituña dadiha, bayi tutoñojokaña netu hakashikijamuku. Yaaka 15 yinahitihu, Kaposhi Kakutalila kahosheli nawu twatela kudimonaña etu aweni muniyi njila: “Chakadi nikujina twatela kusweja kutoñojokaña hadi etu aweni chakwila tudivwimbaku hela kutoñojoka hadi etu aweni chakwila tutachika kudimona netu tudi amukunkulwayiku. Ilaña twatela kudimonaña munjila yayiwahi, nakwiluka yuma yitukutwesha kwila niyitukukañanya.” w22.05 24-25 ¶14-16

Chumanyi chitwatela kwila hamuntu-hamuntu kulonda tuleti kunuñañana muchipompelu? Kuhitila mukuleta kuwunda. (Mat. 5:9; Rom. 12:18) Mpinji yejima yitwazataña nañovu hakwila tuleti kuwunda nawakwetu muchipompelu, twawahishaña paradisa yakuspiritu. Tweluka netu Yehova wakoka muntu-himuntu wudi muparadisa yakuspiritu kwinza mukudifukula kwalala. (Yow. 6:44) Fwikijenu muzañalu wukutiyayi Yehova hakumona tunakuzata nañovu kulonda tuleti kuwunda nikunuñañana hakachi kawantu amonañayi nindi alema, dikwila nawu ambuñindi! (Isa. 26:3; Hag. 2:7) Tunateli kudiluñisha ñahi chikupu nkisu jitwatambwilaña hamu neyi ambuña aNzambi? Hikutoñojoka chikupu hayuma yitwadizaña Mwizu daNzambi. Kudiza muniyi njila nikutoñojokahu, kukutukwasha kwikala nayilwilu yawakaKristu yikutuletesha ‘kukeña anakwetu’ “[nikudikeña] chikupu wumu namukwawu” muchipompelu.—Rom. 12:10. w22.11 12-13 ¶16-18

Neyi twiluka chikupu netu Yehova natwanakeni, ‘tukunooka,’ kushilahu nikwikala nakuwunda kwamuyitoñojoka nichinleji chitooka. Kwanakena kwamuchidiwu hikunateli kufuma kudi antuku ilaña kwafumaña kudi “Yehova yomweni.” (Yilw. 3:19) Neyi Yehova natwanakeni, watwitejaña cheñi kwikala amabwambu nawa chekalaña tuhu neyi twavulumwini wanyi. Neyi Yehova natwanakeni hakatwinka cheñi muloña hela kutubabesha nanshidi yitwakoñeliku. (Isa. 43:25) Yehova watwalaña nshidi yetu “neyi chikwaleha kwaselelaña itena nakwahuminaña itena.” (Mas. 103:12) Neyi tutoñojoka Yehova chatwanakenañayi, twasakililaña nikumulemesha. (Mas. 130:4) Yehova neyi nakwanakena muntu hashindamenaña hakutoha kwanshidi hela hakukeha kwanshidiku. Yehova wazatishaña yuma yelukayi hadi etu chineli diyi Nleñi yetu, Mukakutwinka Nshimbi nawa Nsompeshi neyi hakufuukulahu neyi chakwila watela kutwanakena hela nehi. w22.06 5 ¶12-14

Yehova wayinka antu ejima amukeña kuchiñeja kwakuwahi. Katataka afumishihu yikatu, chineñi nikufwa. (Chim. 21:​3, 4) Wakakwasha “amwovu” amuchiñejaña nawu wukabalumuna iseki kwikala paradisa. (Mas. 37:​9-11) Nawa wakaletesha etu ejima kwikala nawubwambu wakola nayena, wubwambu wukawaha nankashi kubadika wutukweti makonu. Iku kuchiñeja kwakuwahi chikupu! Hanu yumanyi yikuletesha tukuhweleli netu Nzambi wakashikija mwakanayi? Yehova welaña mwejima mwakanañayi. Dichi twatela ‘kumuchiñeja Yehova.’ (Mas. 27:14) Twamwekeshaña chumichi kuhitila mukumuchiñililaña Nzambi yetu nakudiwunjika nimuzañalu netu wakela yuma yejima yakaanayi. (Isa. 55:​10, 11) Tutwalekihu kwikala ashinshika kudi Yehova, nakukuhwelela netu yena wakafweta “antu amukeñakeñaña chikupu.” w22.06 20 ¶1; 25 ¶18

Twatela kwiluka chikupu netu chineli Yena hiMutu wachisaka, Yehova wukwila yuma yejima yalejayi nyitu yayisaka kwila ha 1 Timotewu 5:8. Neyi twiluka chikupu netu Yehova watukeña nawa wakeña chisaka chetu, chikutukalila wanyi kumukuhwelela netu wukutwinka yuma yitunakukeña. (Mat. 6:​31-33) Yehova nakukeña kutwinka yuma yitunakukeña, yena hiMukakuhana wukweti kukeña nichisambu. Chaleñeliyi iseki, hakuminini dakutwinka hohu yuma yitwatela kuhanda nayuku. Wenzesheli iseki nayuma yejima yatutiyishaña kuwaha. (Kutach. 2:9) Hela chakwila mpinji yikwawu tukweti yuma yinashikili yakuhanda nachu, twatela kwanukaña netu Yehova diyi wunatwinki iyi yuma. (Mat. 6:11) Twatela kwanukaña netu yuma yakumujimba yejima yitukuleka hiyikwesekana nayuma yikutwinkayi Nzambi yetu wukweti kukeña chayinu mpinji niyakatwinkayi kumbidiku.—Isa. 65:​21, 22. w22.06 15 ¶7-8

Antu anakudiza chalala hidiwu hohu anakukeñeka kumwiluka chikupu Yehova niBayiboluku. Wejima wetu tunakukeñeka. Kapostolu Pawulu wasonekeli nindi neyi tuzatishaña yuma yitunakudiza chikutukwasha “kwaambula yuma yayiwahi nayatama.” Muyinu mpinji yakala muneli yilwilu yatama yinasweji, chinateli kutukalila kulondela nshimbi jaYehova. Ilaña Yesu nakutwinka yuma yinateli kutukwasha kukolesha chikuhwelelu chetu. Iyi yuma yekala Mwizu daNzambi donenewa, Bayibolu. Kufwana Yesu, twalemesha chikupu ijina daNzambi kwesekeja nachichatela kwikala. (Yow. 17:​6, 26) Chakutalilahu, mu 1931 twadituumbili ijina damuNsona dakwila nawu aYinsahu jaYehova, chumichi chamwekeshaña chitwalemesha ijina Tata yetu wamwiwulu. (Isa. 43:​10-12) Kubombelahu, Bayibolu yaNsona jaKaayi Kakaha yinafuntishi ijina daNzambi hejima hidatela kwikala Mwizu dindi. w22.07 11 ¶11-12

Chalala chamuBayibolu munabombeli cheñi nsañu yayiwahi yaWanta waNzambi. Yesu wesekejeli chalala chahosha haWanta neheta daswekawu. Neyi chasonekawu haMatewu 13:​44, Yesu wahosheli nindi: “Wanta wamumawulu wudi neyi iheta daswekawu mwisaña dawaniniyi muntu hakudisweka; nawa muloña wamuzañalu watiyiliyi, hakuya nakulandisha yuma yindi yejima nakulanda odu isaña.” Mwatela kwiluka nenu iwu iyala wakeñakeñeleña iheta wanyi. Ilaña chadiwaniniyi, walekeli yuma yayivulu kulonda ekali nadu. Kafwampi walandishili yuma yindi yejima. Muloñadi? Muloña welukili nindi dadiña dalema chikupu. Tweluka netu kwosi chuma chidi chejima munu mukaayi chinateli kwesekana namuzañalu wutukweti muloña wakumukalakela Yehova makonu nihakuchiñeja kwakushakama haya nyaaka muWanta waNzambiku. Kwosi chuma chinateli kwesekana nakudiluñisha wubwambu wawuwahi naYehovaku. Twekalaña namuzañalu muloña ‘twamutiyishaña kuwaha chikupu.’—Kol. 1:10. w22.08 15 ¶8-9; 17 ¶12

Yosefu welukili ñahi nindi Nzambi yindi wukumona wujila nindi hichuma “chasweja kutama”? Nshimbi yaMosi, mwabombeleli nshimbi yakwila nawu “Bayi wila wujilaku,” enjili nakuyisoneka henohu munahiti yaaka 200. (Kwid. 20:14) Hela chochu, Yosefu wamwilukili chikupu Yehova nichinateli kumonayi yilwilu yawuvumbi. Chakutalilahu, Yosefu welukili chikupu nindi Yehova washiliku wulu nindi wikali weyala wumu nimumbanda wumu. Nawa watela watiyili Yehova chamukiñiliyi Sara, mama yankaaka yindi, hampinji yakeñeleñawu kumusenda kudi iyala wacheñi mapampa ayedi. (Kutach. 2:24; 12:​14-20; 20:​2-7) Yosefu chatoñojokeliyi haniyi nsañu, welukili chuma chaloña nichatama kumesu aNzambi. Chineli Yosefu wamukeñeli Nzambi, wakeñeli ninshimbi yindi yahosha hakuloña nawa wafuukwilihu kuyilondela. w22.08 26 ¶1-2

Iwu wuprofwetu wunakutalisha wanyi kukusañuka kwachifwikija, kusañuka kwawambuña aNzambi kwakuspiritu kwamwekanaña mumafuku akukuminina neyi chitwelukili kunyima. Ilaña, awa mazu anakutalisha kukusañuka kwawafu kwakekalaku mwituña dadiha. Muloñadi chitunahosheli mwenimu? Mazu akwila nawu ‘lunkuñu’ ayizatisha cheñi haYoba 17:16 nawa atalisha mukwila nawu ‘Ijamu.’ Ichi chikuma chinakumwekesha nawu Danyeli 12:2 yinakutalisha kukusañuka kwakekalaku hanyima yakumana kwamafuku akukuminina nawa njita yaAmagedoni yinamani dehi. Danyeli 12:2 yatalisha mudihi chiyahosha nawu amakwawu akasañukila “kuwumi wahaya nyaaka”? Yatalisha mukwila nawu antu akasañulawu nawa akamwiluka hela kutwalekahu kumwiluka nikumwovwahila Yehova niYesu mumpinji yayaaka ikombakaji akatambwila wumi wahaya nyaaka.—Yow. 17:3. w22.09 21 ¶6-7

Awa mazu hiyanatalishi mukwila nawu Yehova hakeñaña hohu nindi tukuhweleleña antu chakadi wunsahu walalaku, ilaña wakeñaña nindi tuyikuhweleli muloña anamwekeshi nawu twatela kuyikuhwelela. Kukuhwelela kudi neyi kalemesha, dichi muntu watela kuzata nañovu hakwila nawu amukuhweleli nawa hahitaña mpinji. Munateli kuyikuhwelela ñahi amanakwenu? Yilukenu chachiwahi. Hanjekenuña nawu hakupompa kwachipompelu. Zatenuña nawu mumudimu wakushimwina. Ikalenu adiwunjika nawena, kulonda amwekeshi nawu mwatela kuyikuhwelela. Hakusambila munateli wanyi kuyileja nsañu yejima muloña dihu himunakuyiluka. Neyi wubwambu wenu wunakoli, munateli kwikala akasunuka kuyileja nsañu yejima. (Luka 16:10) Mukwila ñahi neyi abula kuhemba kajindilu? Bayi mushikena kuyidiwula hohenohuku, ilaña lekenu hahiti mpinji. Bayi mwiteja yilwilu yawantu antesha yiyikañeshi kuyikuhwelela amanakwenuku. w22.09 4 ¶7-8

Mukulumpi wejina daMiqueas wamweni nindi anamwili chuma chatama kudi amanakwetu amu alombweleña mukuloñesha kwaYehova. Hela chochu, watwalekelihu kuhemba yitoñojoka yindi nawa wazatili nañovu kukañesha yitoñojoka yatama. Walombeleña kakavulu kudi Yehova kulonda amwinki spiritu yajila niñovu yakuumika. Wadiña cheñi nakusandujola nsañu munyikanda yetu yinateli kumukwasha. Yumanyi yitunakudizilaku? Neyi mumona nenu anayili katama kudi manakwetu hela muhela, diwunjikenu nawa fwilenu kukañesha yitoñojoka yatama yinakwinza muyitoñojoka yenu. Hadaha muneluki wanyi chaletesha owu muntu ahoshi munoyu njila hela kwila ochu chuma. Dichi mulejenumu Yehova nawa mulombenu ayikwashi kumona yuma neyi chinakuyimonayi mukwenu. Mwatela kwiluka nenu mukwenu mukakudifukula wayineñeshelamu hohu wanyi nawa fwilenu kudiwula chiluwa chinakoñiyi. (Yish. 19:11) Anukenuña nenu, Yehova neluki kukala kumukweti nawa wukuyinka ñovu yakuumika.—Mukwa. 5:8. w22.11 21 ¶5

Tondenu amabwambu amukeña Yehova. Amabwambu imukutonda anateli kuyikwasha kwikala mukaKristu wapama hela nehi. (Yish. 13:20) Julien, mukulumpi muchipompelu, wahosheli nindi: “Hinadiña kansi, nekalili nawamabwambu hitwadiña mumudimu wakushimwina. Awa amabwambu adiña neyena chikupu, nawa ankwashili kudikita chikupu mumudimu wakushimwina. . . . Nenjili nakwiluka nami nashalileñahu yuma yayivulu muloña wakudikunda hohu nawamabwambu akweti yaaka yimu nanami.” Indi neyi mumona nenu muntu wumu muchipompelu wukweti yilwilu yatama? Pawulu welukili nindi antu amakwawu muchipompelu chawakaKristu akusambila adiña nayilwilu yayiwahi wanyi, wamusoñamishili Timotewu kubula kudikunda nawu. (2 Tim. 2:​20-22) Wubwambu wetu naYehova walema. Kanda twiteja muntu wudi wejima kuluwañesha wubwambu wetu wutunakwati naTata yetu wamwiwuluku. w22.08 5-6 ¶13-15

Kwambukaku nawantu ahela kufumba kwaNzambi, etu twakeña njila yaNzambi, kushilahu ninshimbi jindi. Tunateli kutwalekahu kumukeña neyi twesekeja yuma yafuminimu kudi antu amwovwahilili niabulili kumwovwahila. Monenu kukala kwafumañamu neyi antu akaana kwovwahila kufumba kwaYehova kwamaana. Kuhiñahu toñojokenu hayuma yayiwahi yafumaña mukumwovwahila Nzambi. (Mas. 32:​8, 10) Yehova watulejaña maana wejima wetu, ilaña hatukanjikijaña kuyitejaku. Hela chochu, walumbulula yuma yafumañamu kudi antu abulaña kutiyilila kumaana. (Yish. 1:​29-32) Antu wenawa “akamona kukala muloña wayilwilu yawu.” Mukuhita kwampinji, yuma yelañawu muchihandilu yakayiletela chineñi, kukala, nkumininaku kujilumuka. Ilaña, atiyililaña kufumba kwaYehova kwamaana nikukuzatisha ayikana nawu: “Muntu wunakuntiyilila wakashakama mukukiñewa nawa hakaluwankana nawoma walukadiku.”—Yish. 1:33. w22.10 21 ¶11-13

Kumwakama Yehova kwatalisha mukwila nawu twatela kumulemesha chikupu kulonda tutondolweleña chuma chejima chikumuneñesha. (Yish. 16:6) Dichi, twatela kutwalekahu kwovwahila nshimbi jaYehova jahosha hayuma yitwatela kwila nikubula kwila neyi chayilumbululawu muBayibolu. (2 Kor. 7:1) Tukwikala namuzañalu chikupu neyi twila yuma yakeñayi Yehova nawa tukaana yahelayi. (Mas. 37:27; 97:10; Rom. 12:9) Muntu nateli kwiluka nindi Yehova wukweti wuswa wakufuukula yuma yaloña niyatama, ilaña watela cheñi kwiteja kulondela nshimbi jaNzambi. (Rom. 12:2) Twatela kumwekeshaña muyilwilu yetu netu kwovwahila nshimbi jaYehova hichuma chalema muchihandilu chetu. (Yish. 12:28) Dichatiyiliyi Davidi, muloña wahosheli hadi Yehova nindi: “Wanlejaña njila yawumi. Kumesu eyi kwekalaña muzañalu chikupu; Kuchikasa cheyi chachidiilu kudi muzañalu haya nyaaka.”—Mas. 16:11. w22.10 8 ¶9-10

Yesu welukili mwakukumina nawa wadiña wadizoza. Henohu Yesu kanda enzi hamaseki, wazatili nyidimu yayivulu hampinji yamukalakeleleñayi Yehova. Kuhitila mudi Yesu, “dimwaleñeleliwu yuma yejima yamumawulu niyahamaseki.” (Kol. 1:16) Hampinji yamupapatishileñawu, Yesu wanukili nyidimu yazatiliyi hadiñayi naTata yindi. (Mat. 3:16; Yow. 17:5) Ilaña yumiyi hiyamuletesheli Yesu kudinka wantaku. Kwambukaku, hatoñojokeli nindi wabadika muntu wudi wejimaku. Wayilejeli atumbanji twindi nindi wenjili heseki “nindi amukalakeliku, ilaña wenjili nakukalakela antu nikuhana wumi windi kwikala ifutu danyiloña dakukuula nachu antu amavulu.” (Mat. 20:28) Washimwini cheñi hatooka nindi hanateli kudiilila chuma chidi chejima nkawindiku. Yesu wadiña wadizoza chikupu. Welili chuma chitwatela kwimbujola. w22.05 24 ¶13

Neyi hakufuukulahu neyi chakwila wukumwanakena hela nehi, Yehova washinshikañahu neyi chakwila owu muntu weluka nindi chuma chelañayi chatama. Yesu washimwini chumichi hatooka haLuka 12:​47, 48. Muntu neyi afuukulahu kwila chuma chinelukiyi nindi nakwila chuma chahelayi Yehova, dikwila nawu nakoñi nshidi yasweja. Muntu wamuchidiwu Yehova nateli kufuukulahu kubula kumwanakena. (Maku 3:29; Yow. 9:41) Komana anateli kutwanakena hanichi chuma chitwelili? Eña! Yehova washinshikaña cheñi neyi chakwila muntu wunakoñi nshidi nabalumuki chikupu hela nehi. Kubalumuka mumuchima “hikuhimpa yitoñojoka, yilwilu hela yuma yiwunakufwila.” Mwabombela cheñi yitoñojoka yakwila nawu muntu nakuditoñesha nikutiya kutama nankashi hayuma yatama yeliliyi hela kubula kwila chuma chachiwahi chateleli kwilayi. Muntu wunabalumuki waneñaña nayuma yatama yeliliyi nihakujimbesha wubwambu windi naYehova. w22.06 5-6 ¶15-17

Ayilumbu jetu ataandishaña makudi hadi amanakwetu anakulombola mukuloñesha kwaYehova. (Mas. 31:13) Amanakwetu amakwawu ayikasa nikuyinka nyiloña nawu hiyambanji. AkaKristu akusambila niwena amweni kukala kwokumu hampinji yamutwambililiwu kapostolu Pawulu nakumukasa. Amakwawu alekeli kumukwasha kapostolu Pawulu hampinji yamukasiliwu muRoma. (2 Tim. 1:​8, 15; 2:​8, 9) Fwikijenu chatiyiliyi Pawulu. Womikili kukala kwakuvulu chikupu nawa washili wumi windi muwubanji kukoola wena. (Yilw. 20:​18-21; 2 Kor. 1:8) Bayi twikala neyi ana antu amushiyili Pawuluku! Dichi hitwatela kuhayamaku neyi tumona Satana nakulukuka amanakwetu anakulombola. Wayilukukaña kulonda afumpi kashinshi kawu nikututiyisha etu woma. (1 Pet. 5:8) Twalekenuhu kuyikwasha amanakwenu nikubula kuyishiya.—2 Tim. 1:​16-18. w22.11 16-17 ¶8-11

Hadaha ona kapondu wabalumukili mumuchima akudikiliwu kwakwihi naYesu wadiña kaYudeya. AYudeya adifukwileña kudi Nzambi wumu, ilaña antu akunyuza akuhweleleli mudi anzambi amavulu. (Kwid. 20:​2, 3; 1 Kor. 8:​5, 6) Neyi ana atupondu adiña amayala akunyuza, hadaha ona kapondu wadi kwihula nindi, “Komana eyi niwoma wakutiya anzambi kwosi?” Kubombelahu, Yesu hiyamutemesheli kwinza kudi antu akunyuzaku, ilaña “kudi anyikoku ajimbala amwitala daIsarela.” (Mat. 15:24) Nzambi wamwekesheli kudi aIsarela nindi wakasañula afu. Hadaha ona kapondu wabalumukili mumuchima welukili iyi nsañu, nawa neyi chinakumwekesha mazu ahosheliyi, welukili nindi Yehova wakamusañula Yesu kulonda akayuuli muWanta waNzambi. Chinamwekani neyi ona iyala wakuhweleleli nindi Nzambi wakamusañula niyena. Chineli wadiña kaYudeya, ona kapondu wabalumukili mumuchima watela welukili nsañu yahosha hadi Adama naEva. Dichi chinakumwekana neyi ona kapondu welukili chikupu nindi Paradisa yateneniyi Yesu haLuka 23:43 yakekala itempa dalubanji hanu heseki.—Kutach. 2:15. w22.12 8-9 ¶2-3

Tunateli hohu kuzata chiwahi mudimu wetu wakushimwina nawukwashu waspiritu yaNzambi. Muloñadi? Muloña Satana wazuñaña njita nanetu kulonda akañeshi mudimu wetu wakushimwina. (Chim. 12:17) Kwesekeja nachamonañawu antu, atumonaña neyi hitukutwesha kumushinda Satanaku. Ilaña kuhitila mumudimu wetu wakushimwina, tunakumushinda! (Chim. 12:​9-11) Twamushindaña ñahi? Neyi tuya nakushimwina, twamwekeshaña netu twamutiyaña Satana woma wanyi. Mpinji yejima yitwashimwinaña, twamushindaña Satana. Dichi tukukunkulula netu spiritu yajila diyi yatwinkaña ñovu nawa Yehova watutiyaña kuwaha. (Mat. 5:​10-12; 1 Pet. 4:14) Spiritu yaNzambi yinateli kutukwasha kushinda kukala kwejima kutunateli kumona mumudimu wakushimwina. (2 Kor. 4:​7-9) Hanu dinu, chumanyi chitwatela kwila hakwila tutambwileña spiritu yaNzambi? Twatela kutwalekahu kulomba spiritu yajila, nakukuhwelela chikupu netu Yehova wukutiya kulomba kwetu. w22.11 5 ¶10-11

Twamwekeshaña netu twayikeña amanakwetu niahela kuhitila mukuzata nañovu kulonda tutwalekihu kwikala mukuwunda nawena. Twafwilaña kumwimbujola Yehova chanakenañayi. Neyi chakwila Yehova wetejeli Mwanindi kufwa kukoola nshidi jetu, komana etu kwila tuyanakena amanakwetu niahela chakufuma hamuchima neyi anatuvulumuni nehi? Hitunakukeña kwikala neyi nduñu watama ashimunawu muchishimu chaYesuku. Nihanyima yakumwanakena mukudi weneni kudi nkaaka yindi, ona nduñu wakañenyi kwanakena mukwawu nduñu wadiña namukudi wanyanya. (Mat. 18:​23-35) Neyi kudi muntu imwaleka kutiyañana nindi muchipompelu, kwila musambila kuleta kuwunda henohu kanda muyi kuChanukishu nehi? (Mat. 5:​23, 24) Neyi mwila mwenimu, mukumwekesha nenu mwamukeña chikupu Yehova niYesu. w23.01 29 ¶8-9

Njila yimu mumwatela kwilukila yuma yinakukeñawu amanakwenu niahela, hikuyihula mukubabala. (Yish. 20:5) Komana akweti yakuda yayivulu, yitumbu niyuma yikwawu yakuzatisha? Komana chinamwekani neyi atela kuyihaña nyidimu hela kuyihaña mwitala? Anakukeña nawu tuyikwashiku kusonekesha chakutambula wukwashu kunfulumendi? Yehova wakeñaña nindi wejima wetu tukolesheña akwetu nikuyikwasha. (Ñal. 6:10) Hela neyi tumwilila muntu wakata kachuma kanyanya, chikumukolesha. Mwana wanyanya neyi ahempula manakwetu wakata hela kumusonekela mukanda chinateli kumukolesha. Kansi wunakuli nateli kumulandilaku muhela wakata yuma hela kumuzatilaku nyidimu yikwawu. Amakwawu niwena anateli kumuloñeshelaku muntu wakata yakuda. AYinsahu amakwawu atemeshaña mazu akusakilila kudi akulumpi adikitaña nankashi hampinji yikunenzi musoñu. Chikuwaha neyi tuzataña nañovu “[kudikolesha] wumu namukwawu nikudituña wumu namukwawu”!—1 Tes. 5:11. w22.12 22 ¶2; 23 ¶5-6

ASadusi elukili chikupu chahosha nyikanda yitanu yakutachikilahu yaNsona jachiHeberu, ilaña adiwileña nsañu yalema yadiña muyina nyikanda yonenewa. Chakutalilahu, talenu Yesu chakwiliyi hamwihwileñawu kudi aSadusi kutalisha hansañu yakusañuka. Wayihwili nindi: “Komana kanda mutañeñahu dehi munsañu yahosha hachiputa mumukanda waMosi, mwahosheliyi Nzambi nayena nindi: ‘Yami Nzambi yaAbarahama, Nzambi yaIsaka nawa Nzambi yaYakoba’ tahindi?” (Maku 12:​18, 26) Hela chakwila aSadusi adiña atañahu dehi iyi nsañu kakavulu, lwihu lwayihwiliyi Yesu lwamwekesheli nawu adiwili nsañu yalema yamuniyi Nsona, dikwila nawu, ntañishilu yahosha hakusañuka. (Luka 20:38) Chumanyi chitunakudizilaku? Neyi tunakutaña, twatela kusha muchima kunsañu yejima yitunateli kudizila kunoyu vasi hela kunsañu yamuBayibolu. Hitwatela hohu kusha maana kuntañishilu yapelaku, ilaña nikuchalala chakunama niyishina yinadivuñili munoyu nsañu. w23.02 11 ¶9-10

AYinsahu ejima anashimuniwu munsona yalelu ahitili mukukala kweneni, ilaña, atwalekelihu kwikala ashinshika kudi Yehova. (Heb. 11:​36-40) Komana kuumika kwawu ninyidimu yawu yayili hohu mumenji? Inehi mwani! Hela chakwila mumpinji yawu hiyamweni kushikijewa kwayikaninu yaNzambi yejimaku, atwalekelihu kumuchiñeja Yehova. Nawa chineli elukili chikupu nawu Yehova wayitiyileña kuwaha, akuhweleli chikupu nawu akamona yuma yakanayi. (Heb. 11:​4, 5) Yuma yeliliwu yinateli kutukwasha kutwalekahu kumuchiñeja Yehova. Mukaayi mutunakushakama makonu, yuma yinakutaminaku. (2 Tim. 3:13) Satana kanda amanishi kweseka antu jaNzambi. Hela chakwila tukamona makabi kumbidi, tutwalekihu kumukalakela Yehova nañovu, nakwiluka netu “tunakuhweleli mudi Nzambi wamumi.”—1 Tim. 4:10. w22.06 25 ¶17-18

Chuma chimu chikutuletesha tukeñeña kushakama akola kumujimba himuloña wakwila twakeñaña kumukalakela Yehova kwesekeja nahanakumini ñovu jetu. (Maku 12:30) Dichi twatondolwelaña yuma yituneluki netu yinateli kutukatisha kumujimba. (Rom. 12:1) Kuhosha hohu chalala, hela chakwila tukuzata nañovu chamuchidinyi, kwila tukañesha yikatu nehi. Ilaña twazataña nañovu kwikala akola kumujimba muloña twakeñaña kumwekesha kudi Tata yetu wamwiwulu netu twasakililaña hachawaana chawumi. Kukata nikukula kumujimba kunateli kutukañesha kwila yuma yayivulu yitwadiña nakwila. Chikufumamu, tunateli kutiya kutama nikuneña. Ilaña bayi tuzeya nakuleka kudakamena kumujimbaku. Muloñadi? Muloña hela chakwila tunakuli chamuchidinyi hela twakata, tunateli kumushimeka Yehova neyi chelili Mwanta Davidi. Twatiyaña kuwaha hakwiluka netu Nzambi yetu watulemesha hela chakwila hitwawaninaku! (Mat. 10:​29-31) Hela chakwila tukufwa, wakeñeshaña kutusañula. (Yoba 14:​14, 15) Hampinji yituchidi amomi, twatela kuzata nañovu kudikiña kumujimba niwumi wetu. w23.02 20-21 ¶3-5

Komana majina ezaza deneni danyikoku yikwawu akatwalekahu kwikala mumukanda wawumi hanyima yakupuluka Amagedoni? Eña. (Chim. 7:14) Yesu wahosheli nindi awa adi neyi nyikoku “akekala nawumi wahaya nyaaka.” (Mat. 25:46) Ilaña akapuluka haAmagedoni hiyakashikena kutambwila wumi wahaya nyaaka hohenohuku. MuChiyuulu Chayaaka Ikombakaji, Yesu “wakayibiñaña nikuyilombola kutuseloki twamenji awumi.” Owu aketeja wunlomboli waKristu nawa nkumininaku akatenawu kudi Yehova nawu ashinshika majina awu akayisoneka haya nyaaka mumukanda wawumi. (Chim. 7:​16, 17) Ilaña ampembi akayijilumuna haAmagedoni. Yesu wahosheli nindi “akayijilumuna haya nyaaka.” (Mat. 25:46) Hanyima yakumonena, kapostolu Pawulu watulejeli nindi “antu wenawa akayisompeshela kukujilumuka kwahaya nyaaka.”—2 Tes. 1:9; 2 Pet. 2:9. w22.09 16 ¶7-8

Yuma yaleñayi Yehova yinateli cheñi kuletesha yisaka kwikala nampinji yakunooka nikuzañalala, nawa chumichi chikuletesha chisaka kudikeña chikupu. Yehova waleña maluña amawahi heseki kutunateli kudiluñishila yuma yitwakeña. Yisaka yayivulu yakeña kuya kumaluña kwahembelañawu anyama, kunyikala, kumapidi hela kuyikumu. Mukaayi kaNzambi kakaha, anvwali nianyana akadiluñishaña chikupu yileñaleña yaYehova. Hanoyu mpinji, hitwakachiinaña anyama hela wena kutuchiinaku. (Isa. 11:​6-9) Twakadiluñishaña haya nyaaka yuma yaleñayi Yehova. (Mas. 22:26) Ilaña enu anvwali, bayi muhembelela sampu iyi mpinji yinashiki hakwila dinu mwakakwashi anyanenu akatachiki kudiluñisha kutala yileñaleñaku. Hampinji yimunakuzatisha yileñaleña kudizisha anyanenu kulonda amwiluki Yehova, chakadi nikujina aketeja mazu aMwanta Davidi wahosheli nindi: “Eyi Yehova, kwosi nyidimu yidi neyi yeyiku.”—Mas. 86:8. w23.03 25 ¶16-17