Komana Nyikanda ‘yaChitiyañenu Chachikulu’ Yichidi Yalema?
NDOTOLU wumu wakuFrance wasonekeli mukanda mu 1786 wahosha hansañu yachazatikaña nyijimba yawantu nianyama. (A Discussion of Anatomy and Physiology) Mukanda weniwu awumonaña neyi himukanda wasweja kuhosha walala hachazatikaña woñu hanyikanda yejima yasonekeluwu hayina mpinji, nawa nyikanda yantesha yashalahu makonu ayilandishaña kubadi ha $27,000, mali akuAmerica hamukanda wumu. Hela chochu, makonu ayeji antesha hohu diwu atela kukuhwelela ndotolu washindamena hajinjila jakuukilamu jidi mumukanda wawukulu chikupu. Nsañu yanyaka nikulema kwansonekelu yamukanda wamuchidiwu hiyikukwasha chikupu muyeji makonuku.
Antu amavulu atoñojokaña chochimu kutalisha hamukanda watenañawu nawu Chitiyañenu Chachikulu. Alemesha nsañu yanyaka yawaIsarela nawa akomokaña nkumbu jajiwahi jekalamu. Ilaña ajinookaña nawu hichalema kwovwahila nshimbi yasonekeluwu yaaka 2,400 yinahituhuku. Maana asayansi, kulanda nakulandulula ninshakaminu yachisaka yambuka chikupu makonu nachiyadiña hampinji yasonekeluwu Bayibolu. Philip Yancey wadiña mukulumpi wajakusoneka nyikanda, (Christianity Today) wasonekeli mumukanda windi nindi: ‘Chitiyañenu Chachikulu himwekala nsañu yakashinshi mpinji yejimaku, nawa nsañu yantesha yakashinshi yekalamu yahilishaña antu makonu. Haniwu muloña ninyiloña yikwawu, Chitiyañenu Chachikulu chasweja kutohela muBayibolu, antu hiyachitañaña kakavuluku.’ (The Bible Jesus Read) Yitoñojoka yeniyi yayikulu.
Kwakwihi nayaaka 50 hanyima yakufwa kwakapostolu Yowanu kwakwihi na 100 C.E., mukwenzi wejina daMarcion watañishili hatooka nindi Chitiyañenu Chachikulu atela kuchikaana kudi eniKristu. Kwesekeja namukwakusoneka nsañu yanyaka wakuEngland Robin Lane Fox, Marcion watadikileña nindi “Nzambi wamuChitiyañenu Chachikulu wadiña kapondu wasweja wadiña nakukwasha ambanji hamu tuhu niatupondu chidi neyi Mwanta Davidi wamuIsarela. Kwambukaku, Kristu wamwekesheli Nzambi wabadika wamuha chikupu nawa wambuka naNzambi wamuChitiyañenu Chachikulu.” Fox wasonekeli nindi ‘antu amakwawu ekalili nayitoñojoka neyi ‘yaMarcion’ nawa yitoñojoka yeniyi yatwalekahu nakukokola atumbanji sweje-e kudi antu ahoshaña idimi dakuMusela waSiriya nakushika tuhu nimuyaaka nkulakaji yamuchiwana.’ Antu amakwawu achidi naniyi yitoñojoka. Chakufumamu, kubadika hadi yaaka 1,600 yahitilihu, Philip Yancey wasonekeli nindi, ‘eniKristu anakuvulamena swayi-swayi yuma yamuChitiyañenu Chachikulu nawa yumiyi anayivulameni chikupu kudi antu amakonu.’
Komana Chitiyañenu Chachikulu achihiña kudi Chitiyañenu Chachiha? Tunateli kwesekeja ñahi kutiyishisha kwetu ‘kwaYehova wamazaza’ muChitiyañenu Chachikulu ‘naNzambi wela nikukeña nikuwunda’ muChitiyañenu Chachiha? (Isaya 13:13; 2 Akorinda 13:11) Komana Chitiyañenu Chachikulu chinateli kuyikwasha makonu?