Iyala Wahimpili Kaayi
Mabiliyoni awantu anashakami hamaseki nikufwilahu. Antu amavulu hiyakoñahu chuma chidi chejima chabadika chakuyanukilahuku. Ayijimbalaña neyi ihaji dinadatuwu muwusekulula dajimañanaña neyi mukulabula kwadisu. Hela chochu, antu antesha hohu diwu anukañawu munsañu janyaka nawa hadaha ahimpa nichihandilu chetu.
CHIWAHINDUKA nantetemena wukwambula chimunyi. Hamuloña wakwila wakata, wukwanuka kunwa yitumbu yakwinkawu yinateli kukwasha kukañesha yikatu. Kuhiñahu mukunona mukanda hela magazini nakufunta cheñi mukadidi. Ifuku denu dinatachiki dehi, nawa munaheteli dehi muyuma yatuñiluwu kudi amayala antesha aya mpuhu.
Michael Faraday Wavwalikili muchaaka cha 1791, iwu Mutooka wadiza jasayansi watuñili makina aletaña kesi kawuneñu. Yuma yawaniniyi niyatuñiliyi yamukwashili kuleta kesi kawuneñu kazatishañawu antu.
Ts’ai Lun Mukulumpi wakuchota chawakaChina, Ts’ai Lun amuhamekaña muloña diyi watachikili kutuña yipapilu, muchaaka cha 105 C.E. chaleñeleli kwikali kutuña yipapilu yayivulu.
Johannes Gutenberg Muchaaka cha 1450, iwu iyala wakuGerman diyi watachikili kutuña ikina dakupulinta nachu. Idi ikina dapelesheluku mudimu wakupulinta, nawa daleñeleli chikali chapela kuwana nsañu yayivulu hanyitu yamboka-mboka.
Alexander Fleming Muchaaka cha 1928, iwu mukwakusandujola nsañu wakuScotland wawanini yuma yakutuña nachu yitumbu yatenañawu nawu penicillin. Iyi yitumbu anakuyizatisha chikupu kulonda kujaha tububu twaletaña yikatu.
Chakadi nikujina, yuma yawanawu nikutuña kudi amayala antesha yinakwashi yihita yawantu amavulu kuhetelamu hela kudiluñisha kukola kwakumujimba.
Hela chochu, kudi iyala wumu wabadika antu ejima. Hiyamwilukila kukuwana yuma yasayansi hela kukutuña yitumbu yakuchipatelaku. Ilaña, iwu iyala wafuma kuchisaka chahutwa wafwili yaaka 2,000 yinahituhu washili nsañu yakusañumuna chikupu yakuchiñeja nikukundeja. Neyi mushinshika chikupu iyi nsañu chiyahimpaña chihandilu chawantu mukaayi kejima, antu amavulu akwiteja nawu mwalala iwu iyala wahimpa kaayi.
Iyala yeniwu diyi Yesu Kristu. Nsañwinyi yashimwineñayi? Nawa iyi nsañu yinateli kuyikwasha ñahi muchihandilu chenu?