Talenu Ijina Didi Muchinekineki
MWATIYAHU dehi ijina dakwila nawu St. Moritz? Hekwawu mwaditiyahu dehi, muloña hiifuku dakunooka daya mpuhu mukaayi danakanañawu muchinekineki chaEngadine mwituña daSwitzerland. Ilaña chinekineki chaSt. Moritz, hiiluña dadiwahi nankashi kwahwilaña antu enzaña nakutala idi iluña dasweja lubanji dadikumashana nampidi yaAlps yabutawu kunvula yachishika yitooka yekala muchipakasu chakabeta kambwela namusela mwituña daSwitzerland kwakwihi nañinza yetuña daItaly. Dikwekalila Iluña daSwiss Kwahembelañawu Atunyama, mwekala nyitondu yashiyashana nawa mwayavulaña anyama amboka-mboka amushimekaña Nleñi yetu Muneni, Yehova. (Mas. 148:7-10) Cheñi dimwatentama antu ashalahu ahemba yuma yachisemwa yelileñawu munkulakaji yayaaka yamuma 17.
Neyi muyaku, mukuhayama nankashi hakumona nsañu yasonekawu hamatala ekala munichi chinekineki. Mukuwana ijina daNzambi dakusoneka hambañu yetala kumbidi, hela hewulu depitu. Kumashiita kwakweni, antu adiña nachaaku chakuwahisha itala hanji kuhitila mukusonekahu nsona, hela kuleña mwevulu mwishina mwakushiñwila chiwahi, hela kusoneka hamalola. Kunidi iluña mukumona mwevulu wetala hamukala waBever. Hasonekawu nawu: “Idi Itala adituñili muchaaka cha 1715. Yehova diyi wakusambila, nawa Yehova diyi wakukuminina. Yuma yejima ayileña kudi Nzambi, kwosi chuma chabuliluwu kuleña.” Ichi chinjikijilu chakushankulu dihu hasonekawu ijina daNzambi.
Munateli kumona nimazu asonekeluwu kushankulu hamukala waMadulain. Asonekahu mazu ahaMasamu 127 akwila nawu: “Chiña Yehova yatuña itala, neyi nehi, akwakutuña akukabakanahu tuhu. Lucius Rumedius. Muchaaka cha 1654.”
Muloñadi chasonekeleleñawu ijina daNzambi hambañu munichi chinekineki? Chelililuwu antu anatachiki dehi kutona, Bayibolu ayisonekeli mwidimi daRomansh, idimi dafuma kuchiLatin dahoshañawu muEngadine. Nawa diwadiña mukanda watachi kubalumuna munidi idimi. Chahizumukiluwu nansañu yatañiluwu Mwizu daNzambi, enyimbu amavulu atachikili kusoneka hanzi yamatalawu majinawu ninsañu yafumishileñawu muBayibolu kushilahu niijina daNzambi.
Nikulelu, iji nsona jichidi kutiyakesha ijina daYehova nikumushimeka, kufuma tuhu kumashiita hadisonekeluwu hamatala. Dichi enyi nienyimbu amunichi chinekineki atela cheñi kuya nakudiza yuma yayivulu hadi Nzambi wamuwahi, Yehova, kuhitila mukuya nakutala itala dikwawu hasonekawu ijina dindi, Itala daWanta DawaYinsahu jaYehova muBever.
[Mazu aKusakilila eniMwevulu wudi hefu 7]
© Stähli Rolf A/age fotostock