Komana Mwamweni Josephus Diyi Wasonekeli Ichi Chibalu chaNsañu?
Mumukanda windi wa XX mwasonekeliyi nsañu janyaka jawaYudeya, mukwakusoneka nsañu yanyaka wamuyaaka nkulakaji yakusambila Flavius Josephus wasonekeli hakufwa ‘kwaYakoba, mana kwaYesu ateneneñawu nawu Kristu’. Antu amavulu adiza chikupu etejaña nawu iyi nsañu yalala. Hela chochu, antu amakwawu ajinokaña wunsahu wukwawu wekala muniwu mukanda wahosha hadi Yesu. Ichi chibalu chansañu, chatenañawu nawu Testimonium Flavianum, chahosha nawu:
“Dichi hayina mpinji kwadiña Yesu, iyala wamana, neyi chaloña kumutena netu iyala, muloña wakoñeleña nyidimu yayiwahi, nawa antu amavulu atiyileña kuwaha kutiyilila kunsañu yatañishileñayi. Wakokweli aYudeya niaJentili amavulu. Wadiña [diyi] Kristu; nawa Pilatu hampinji yatiyililiyi mwafuukwili akulumpi hakachi ketu, wamufwishili namuloña nakumuhana nindi amujahili hakulusu, antu amukeñeli hatachi hiyamushiyiluku, muloña wamwekeni kudi wena wamumi hefuku damuchisatu, neyi chashimwineñahu dehi atuprofwetu aNzambi yumiyi niyuma yikwawu yayivulu yayiwahi nankashi kutalisha hadi Yesu; niakwaKristu, atumbawu ijina dindi, anakutwalekahu makonu.”—Josephus—The Complete Works, chatuntulwiluwu kudi William Whiston.
Kutachika hakukuma kwankulakaji yayaaka 16, kudi kuditadikisha hakachi kawantu akuhwelela nawu iyi nsañu yalala nawantu ajinookaña nawu Josephus hidiyi wasonekeli ichi chibaluku. Serge Bardet, mukwakusoneka nsañu yakunyaka ninyikanda mwidimi daFrench, wafwilaña kulumbulula ichi chibalu chansañu yaditadikishañawu hadi yaaka nkulakaji yiwana yinahituhu. Wasonekeli nsañu yasandujoleliyi mumukanda windi watenañawu nawu Testimonium Flavianum—Examen historique considérations historiographiques (The Testimonium Flavianum—A Historical Study With Historical Considerations).
Josephus hidiyi wasonekeli yuma yakuhwelelawu akwaKristuku. Wadiña mukwakusoneka nsañu yanyaka yawaYudeya; dichi, ntaadi yejimiyi yashindamena hakumutena Yesu nawu diyi “Kristu.” Bardet walumbulwili nindi ichi chinesekani namazu alondelañawu mwidimi dachiGriki.” Bardet wabombeleluhu nindi hela chakwila antu amavulu adiza chikupu ajinokaña nawu nsoneki yawaYudeya hanateli kumutena Yesu nindi “Kristuku,” Josephus watela wazatishili izu dakwila nawu “Kristu” muloña wasonekeli muchiGriki nawa muchiGriki avula kulondela nshimbi yedimi dachiGriki. Iwu hiwunsahu wamwekeshaña nawu Yesu wadiña muntu walema. Wabombeleluhu nindi akwakudimbulula elukili ichi chikuma.”
Komana dikwila nawu kudi nsoneki mukwawu wabombeleluku nsañu yikwawu nakwimbujola Josephus? Bardet washinshikili hayikuma yansañu yakunyaka nijinsona jajeni nawa wakuhweleleli nindi kwosi wateleleli kwimbujola nsonekelu yaJosephus muloña nsonekelu yindi yadiña yadimena chikupu.
Muloñadi antu adiza chikupu chiyajinokelañawu walala waniyi nsañu? Chelili welukili kwafumineña iku kukala, Bardet walumbulwili nindi “antu achidi kujinooka Testimonium, kwambukaku nansañu yayivulu yakunyaka, muloña antu ajinookaña hadi iyi Testimonium.” Watwalekeluhu nindi antu adiza chikupu amavulu ajinookaña nankashi iyi nsañu kubadika nsañu yayivulu yakunyaka muloña antu amavulu hiyakeñeleña kukuhwelela nawu Yesu diyi Kristuku.
Tuneluki wanyi neyi Bardet watela kuhimpa yitoñojoka yawantu ataña chikupu kutalisha haTestimonium Flavianum. Iyi nsañu yaleñela nkuluñaña Pierre Geoltrain wakuluka yitembi munsañu jawaHeleni nawaYudeya niakwaKristu abula kutona kwiteja. Wadiña weluka dehi nindi iyi Testimonium hinsañu yabombelaku, nawa waseheleña niantu ayikuhweleleli nawu yalala. Ilaña wahimpili yitoñojoka yindi. Wakunkulwili nindi nsañu yasonekeliyi Bardet diyi yaleñeleli yahimpi yitoñojoka yindi. Ichi Geoltrain washimuna nindi “kwosi muntu watela kujinooka nindi Josephus hidiyi wasonekeli iyi nsañuku.”
Ilaña, aYinsahu jaYehova akweti wunsahu waweni wakwiteja nawu Yesu diyi Kristu, iwu wunsahu wawanikaña muBayibolu.—2 Tim. 3:16.