MUTU WUDI HAKAVA | BAYIBOLUE—CHIYABULILA KUJIYA
Bayibolu Yakisikili Wanyi
KUKALA: Ansoneki aBayibolu atachi niakwakutuntulula asonekeleña hanyilela nihayitembi.a (2 Timotewu 4:13) Iyi yuma yakwashili ñahi Bayibolu kubula kujiya muwubanji muyadiña?
Nyilela yatabukileña nikufukuluka nawa yadiña yakola wanyi. Akwakusandujola amuEjipitu aRichard Parkinson niStephen Quirke ahosheli nawu, “Nyilela yakisikileña hela kushala hohu kwanyonji. Neyi anayihembi, muvuñilu wunateli kwila kabuwa hela kutoka muloña wamunyañu nawa anateli kuwida kudi anfwa hela tububu neyi ayijiika.” Nyilela yikwawu chiyatachikiliwu kuyizatisha, ayanyikileña kumwaana nankashi hela kuyisha mututa nawa yakisikileña nankashi.
Chitembi chakola kubadika nyilela, ilaña chatabokaña neyi achihemba chatama hela kuchisha kumwaana wasweja hela mututa.b Chitembi achidaña cheñi kudi atububu. Hela chochu, mukanda wumu wansañu yanyaaka waEveryday Writing in the Graeco-Roman East washimuna nawu, “Nyikanda yantesha hohu yansañu yanyaaka diyi yabulili kujiya.” Neyi Bayibolu yajiyili, kachi nsañu yekalamu yajiya dehi.
BAYIBOLU CHIYABULA KUJIYA: A Yudeya ashiliku nshimbi yakwila nawu mwanta wejima watela ‘kudisonekala Nshimbi jindi yomweni,’ kufuma munyikanda yitanu yatachi yamuBayibolu. (Kuhituluka 17:18) Hela chochu, akwakusoneka edishili mamanyusikilipitu amavulu chakwila muyaaka nkulakaji yakusambila C.E., Nyikanda Yajila yavulili nankashi mumasinagogi mwahita Isarela yejima nikumaluña amalehi akuMasidoniya. (Luka 4:16, 17; Yililu 17:11) Indi mamanyusikilipitu amakwawu akushankulu abulili ñahi kujiya nakushika nimakonu?
Mamanyusikilipitu atenañawu nawu Nyivuñilu Yakukaluñalwiji Kafwa anashakami nkulakaji yanyaka munsaba jamawumba jashiluwu mumaluña awuma
Philip W. Comfort wadiza nsañu yaChitiyañenu Chachiha wahosheli nindi, “A Yudeya ayilukili nawu ahembeleña nyivuñilu yadiña naNyikanda Yajila mujinsaba kulonda yibuli kukisika.” Chakadi nikujina akwaKristu dichahembeleñawu. Dichi, mamanyusikilipitu amakwawu aBayibolu ayiwanini mujinsaba jamawumba, kushilahu tuhu nimuyisweku, mumayeñu nikumaluña awuma.
YUMA YINAFUMIMU: Yibalu yamamanyusikilipitu aBayibolu, kubadika hadi yaaka 2,000 yinahituhu yidi kwoku nikulelu. Kwosi mamanyusikilipitu akushankulu anashakami yaaka yayivulu neyi awaku.
a Nyilela hichuma chiyasonekeleñahu chafumineña kumutondu wakumenji wukweti ijina damulela. Chitembi chafumineña kuchitembi chakanyama.
b Chakutalilahu, akwanshimbi afwachikili mukanda wasonekeliwu hachitembi waU.S. Declaration of Independence. Dichi, kwakwihi nayaaka 250 yinahitihu, nsona yatachikili kufukuluka chakwila hiwukutwesha kuyimona chiwahiku.