Ijina damuBayibolu Hewumba Dakunyaaka

Yibalu yewumba yashakamini yaaka 3,000 yavumbwiliwu mu 2012 yayihayamishili akwakusandujola. Chumanyi chaletesheli ahayami? Bayi neyi iwumba didayihayamishiliku ilaña mazu adiña hewumba.

Chelili akwakuvumbujola anuñi yibalu yejima awaninihu mazu adiña hasikiliputi yawantu amuKenani akunyaaka. Adiña nawu: “Eshibayali Beni [mwana] kaBeda’.” Aka dikatachi akwakuvumbujola kuwana idi ijina mumamanyusikiliputi akunyaaka.

Eshibayali mukwawu amutena muBayibolu, wadiña mwana kaMwanta Sawulu. (1 Kushi. 8:33; 9:39) Nkuluñaña Yosef Garfinkel wadiña hakachi kawakwakuvumbujola, wahosheli nindi: “Chatuhayamishaña hakuwana netu idi ijina daEshibayali dekala muBayibolu, nawa kwesekeja namamanyusikiliputi, adizatisheleña hohu hampinji yayuulileñayi Mwanta Davidi.” Antu amakwawu atoñojokaña nawu idi ijina adiña nakudizatisha hohu hayina mpinji. Akwakuvumbujola anawani nsañu yikwawu yalala yamuBayibolu.

Hakwawu muBayibolu, ijina daEshibayali adisonekaña nawu Ishibosheti, hadi “bayali” ahiñishahu “bosheti.” (2 Sam. 2:10) Muloñadi? Akwakusandujola alumbulwili nawu: “Mumukanda waSamweli wamuchiyedi ijina da Eshibayali adisonekamu nankashi wanyi muloña dayanukishileña eniKenani nzambi wanvula Bayali, ilaña ijina dadeni . . . adisonekeli muMukanda waKushindulula.”