Ikalenu Ajila muYililu Yenu Yejima
1. Indi kwikala ajila muyililu yetu yejima kwalemenadi?
1 Hamu neyi ambuña aNzambi wajila, Yehova, twafwilaña kwikala ajila muyililu yetu yejima. (1 Pet. 1:15, 16) Ichi chinayi mukwila nawu twafwilaña kuhakwilaku nshimbi jaYehova muchihandilu chetu chejima. Kupompa kwankambi kwachinu chaaka kukutwinka kukooleka kwadimena kwakumwekesha yililu yajila.
2. Tunateli kuhemba ñahi iluña dakupompela dawunyoji?
2 Iluña Dakupompela Datela Kwikala Dawunyoji: Henohu kupompa kanda kutachiki mudimu weneni wunakuzatewa wudi wakuloñesha nikuwahisha iluña dakupompela. Yuma yejima yitukuleta heluña dakupompela twatela kufunta nayu kubombelahu tuhu mafuba akubula yuma nijinchumpa. Neyi twayizesha hakwinza mulubanza dikwila nawu hakufunta yatela kufunta yamukunkulu.
3. Chumanyi chaleteshaña nswadi nawa tunateli kuyimwaña ñahi hakupompa?
3 Kumaluña amakwawu hakupompa kwankambi yisaka yadyilaña yakudya mulubanza nawa chumichi chazañaleshaña hama, ilaña bayi tutamisha mulubanza nakushiyamu majilu nichikumana progiramuku. Hanyima yakudya yakudya yahachayili chisaka nichisaka chikweti mudimu wakufumisha nswadi heluña dashakamawu. Bayi mushiya jinchumpa mwakadi yuma, hela yifwiku yajinchumpa, nkuuku, yilanjeli, yipapilu yakusonekahu niyipapilu yaprogiramu yakupompa hamaseki neyi progiramu yamwaana yatachika dehiku. Hakukumisha kudya yakudya yahachayili twatela kukuñula nswadi yejima nakumwaña. Mwatela kusenda lanjeli yeneni mukunatilaña chisaka chenu yakudya yikushalahu, yifwiku yajinchumpa, ninswadi yatela kunatilawu mwibuku dinaloñeshiwu hakupompa kwankambi. Mwani bayi munatola jinchumpa mudi yuma hela munabuli yuma himunashakamiku, yikuleta wubanji nawa yamwekeshaña majilu. Neyi tukweti itala hela chifufu heluña dakupompela mwatela kukomba chachiwahi hanji kulonda hamwekaneña wunyonji. Mwatela kudizisha anyana kukomba nikukuñula nswadi nakunatila kwiluña diyanaloñeshuwu.
4. Nshimbinyi muIsarela yayikwashileña kwikala nachihandilu chachiwahi, indi makonu antu jaYehova akudizilaku chumanyi kunilu lushimbi?
4 Komana mwamonaña nyisalanyi yawantu amavulu chiyekalila namajilu nawa chiyabulilaña kuzatika hamuloña wakuyizatisha chatama? Kuwahisha musalanyi hanyima yakuwuzatisha hichinjikijilu chamwekeshaña nawu ‘twelilaña antu ejima chachiwahi.’ (Ŋal. 6:10) Chachiwahi kutiyilila nshimbi yaNzambi yaheniyi kudi Isarela kutalisha hakushikila majilu afumaña mudi muntu. Mukanda waNsansa sha Lupwa walumbulula nawu: “[Lushimbi] lumu lwahosheleña hakushikila majilu afumaña mudi muntu. Awa majilu ateleli kuyishikila kunsa yachilombu kulonda iluña dakushakama antu dikali dawunyonji.” (Tañenu Kuhit. 23:12, 13) Ilu lushimbi lwakushankulu luchidi kuzatika nimakonu nawa tukwikala nachihandilu chachiwahi neyi tuluzatisha. Kutiyilila nshimbi jaYehova jahoshaña hawunyonji mpinji yejima mwafumaña nkisu nawa twekalaña ambukaku nakanu kaayi.−Kuhit. 28:9, 10.
5, 6. Indi kukeña kwatusañumunaña ñahi kwikala awunyonji?
5 Kukeña amana kwetu kukutukojeja kuyitoñojokelaku. “Kukeña . . . hikwelaña chuma chabula kutelaku; hikwakokwelaña kwindi hohuku.” (1 Kor. 13:4-5) Kunatola nswadi hitunashakami hichuma chabula kutela muloña antu amakwawu niwena anashakami kwakwihi nanetu. Kushiya nyisalanyi yamajilu hiwuhulu waweni muloña amakwawu niwena akwinza nakuyizatisha. Dichi, tumwekeshenu kukeña kudi antuñi netu.−Yowanu 13:35
6 Twatiyaña kuwaha hakwikala namaluña etu akudifukwila nawa twatela kuyihameka hamudimu wenu wawuwahi wakuhemba awa maluña awunyonji. Komana wejima wetu tutwalekuhu nakuzata nañovu, ‘tuditookeshi kutama kwamujimba nikwaspiritu; tukoleshi kujila nawoma waNzambi.’ (2 Kor. 7:1) Ikalenu awunyonji hetala nawa dizishenu anyana kulonda ahembaña itala dawunyonji. Twikalenu awunyonji haMatala etu aWanta cheñi nihampinji yakupompa hamu hakupompa kweneni hela hakupompa kwanyanya, mwani kupompa kwetu kumwekesheña yililu yayiwahi yaNzambi yetu Wajila, Yehova.−Isaya 60:2
7. Indi yililu yetu hakupompa yamulemeshaña ñahi Nzambi?
7 Yililu yetu yatwambulañaku kudi amakwawu nawa yamulemeshaña Nzambi yetu. (1 Pet. 2:12) Hakupompa, nzatilu yawaYinsahu jaYehova akayimonaña kudi antu. Dichi, fwilenu kwikala awunyonji kumujimba, hembenu iluña detu dakadi majilu nikwikala ajila muyililu yenu yejima.
[Chikasha chidi hefu 5]
Mwekeshenu Yililu Yakujila
◼ Ikalenu Awunyonji
◼ Hembenu anyana chikupu
◼ Toñojokelenuku amakwawu.