Bayi Muleka Kukeña Kwenu Kwatachuku
1 Yesu walemesheluwu wababesheli chipompelu chawiniKristu chamuEfwesesa chamuyaaka nkulakaji yakusambila nindi: “Nakumoni namuloña, nami wunaleki kukeña kweyi kwatachi.” (Chim. 2:4) Mwamweni antu amavulu alekeli kukeña kwawu kwatachi kuyamukeñeluwu Yehova. Hampinji yitwadizileña chalala, twaswejeli kumukeña Nzambi niantuñi netu, nawa chumichi chatwileñeleli kushimwina namukoyi kuchiñeja kwetu kwakuha kutwaweni. Chumanyi chikutukañesha kuleka kukeña kwetu kwatachi nikubula kwikala nampwila mumudimu wakushimwina?
2 Kudiza Kwahalwetu niKuwanika kuKupompa: Chumanyi chatuletesheli etu kumukeña Nzambi niantuñi netu hampinji yitwatachikili kudiza chalala? Komana hiyadiña yuma yejima yitwadizili hadi Yehova mukudiza kwetu kwamuNsona diyaletesheli twikali nakukeña kwamuchidiwuku? (1 Yowanu 4:16, 19) Dichi hakwila nawu kukeña kwetu “kusweji kuvula,” twatela kutwalekahu kudiza kwiluka kwalala, nakwimba ‘muyuma yaNzambi yayeni yakunama.’—Fwil. 1:9-11; 1 Kor. 2:10.
3 Kutwalekahu nantanjikilu yayiwahi yakudiza kwahalwetu mpinji yejima hichuma chakala nankashi munanu mafuku akukuminina anenzali nayuma yayivulu yakwakamena nikuluwañesha. (2 Tim. 3:1) Twatela kwambulaku mpinji yakudya kudya kwakuspiritu. Kuwanika kukupompa kwachipompelu mpinji yonsu hichuma chalema, sweje-e ‘chitunamoni ifuku odu hidikuswila kwakwihi.’—Heb. 10:24, 25.
4 Mudimu waKushimwina: Kukalakala namukoyi mumudimu wakushimwina kwatukwashañaku kuhemba kukeña kwetu kwatachi kutwamukeña Nzambi. Hampinji yitunakushimwina nsañu yayiwahi, twanukaña hayikaninu yayiwahi yaYehova, nawa chumichi chatukwashañaku kuhemba kuchiñeja kwetu kwakola nikukeña kwakweni. Kutañisha chalala chaBayibolu kwakeñekaña kusandujola kulonda etu aweni twilukishi chikupu, nawa kwila mwenimu kwakoleshaña chikuhwelelu chetu.—1 Tim. 4:15, 16.
5 Yehova diyi watelela yuma yejima, kushilahu nikukeña kwetu. (Chim. 4:11) Bayi muleka kukeña kwenu kujimiku. Twalekenuhu nakukolesha kukeña kwenu kwatachi kuhitila mukudiza nankashi Bayibolu halwenu, kuwanika kupompa mpinji yejima, nikulejaku amakwawu namukoyi hayuma yimwakeña nankashi.—Rom. 10:10.