Yakubidika
◼ Nyikanda yakuhana muJanuary: Mukanda wejima wukweti mafu 192 wasonekelawu hachipapilu chawulombu wansela hela chafuukuluka hela mukanda wudi wejima wasonekeluwu henohu chaaka cha 1991 kanda chishiki, watela kuhanewa. Neyi yipompelu hiyikweti nyikanda yanyaka yamuchidiwuku, yatela kuzatisha mukanda waUkwishiba hela buloshuwa yaMulelola! February: Hanenu mukanda waPalameni Kuli Yehova. Neyi chipompelu hichikweti iwu mukandaku, zatishenu Ukusokolola hela mukanda wukwawu wanyaka wunashimbuli musitoku. March: Hanenu mukanda waChatañishaña Bayibolu nawa shenuku ñovu yayeni yakutachika kudiza kwaBayibolu. April: Hanenu makopi enu aKaposhi Kakutalila niAwake!. Hampinji yimunakufuntila kudi antu amwekesheli mpwila, kubombelahu niantu awanikili kuChanukishu hela yidika yikwawu yateokalatiki ilaña hiyavula kwinza kuchipompeluku, fwilenu kuhana mukanda waChatañishaña Bayibolu, nachikonkwanyi chakukeña kutachika kudiza kwaBayibolu.
◼ Kutachika muFebruary, nakushika haMarch 4, mpanji yayiha yawantu amavulu yikahoshañawu ankoñi añinza yidi namutu wunakwila nawu “Anyi Akatwesha Kwiñila Mwituña Dadiha daNzambi?”
◼ HaKupompa kwaMudimu kwamuApril, twakadiza haprogiramu yahavidiyo yaYoung People Ask—What Will I Do With My Life?. Neyi munakuyikeña, mwatela kunyakala kusonekesha makopi kuhitila muchipompelu.
◼ Yipompelu yatela kuloñesha chachiwahi kulonda yakanakani Chanukishu chachinu chaaka haChimu, April 2, neyi itañwa dinahumi dehi. Hela chakwila, mpanji yinateli kutachika swayi, kuhitishamu yifwikija kwatela kutachika hanyima yakuhuma kwetañwa. Ihulenu mutayi watalaña jampepela kulonda mwiluki mpinji yikahuma itañwa mwiluña denu. Chipompelu chidi chejima chatela kweseka kwanakana Chanukishu nkawawu. Hela chochu, kakavulu chumichi hichatela kuzatikaku. Kumaluña amakwawu yipompelu yazatishaña Itala daWanta dimu, hekwawu chipompelu chimu hela kubadikahu yatela kuzatisha itala dikwawu haniyi mpinji. Neyi chinatwesheki, tunafuukuli kuhitishahu jiminiti 40 hakachi kajiprogiramu kulonda ejima atweshi kuhetelamu chikupu mukuhanjeka hanyima yaChanukishu. Cheñi mwatela kuta maana kunyotoka nikwakuyimika, kubombelahu kwakusulukila nikwakuyisendela antu. Izaza dawaeluda datela kusakula nloñeshelu yikuzatika chiwahi kwiluña denu.
◼ Muchaaka cha 2007 hichikakeñeka kusonekesha Yipapilu Yakutambika nachu antu kuChanukishuku, muloña yipompelu yejima akayitemeshelañahu dehi henohu Chanukishu kanda. Yipapilu yakutambika nachu antu kuChanukishu yakekala muChichewa, muChitonga, Cibemba, muEngilishi, muKaondi, muLunda, muchiLuvale, muSilozi, nimuchiSwahili. Kutachika muchaaka cha 2007, yipapilu yakutambika nachu antu kuChanukishu hiyikekalañaku hachaaka hachaakaku, dikwila nawu mwatela kuhembela yipapilu musitoku kulonda kuyizatisha chaaka nichaaka. Dichi akwakushimwina atela kushaku maana kulonda kusoneka mpinji nikeyala haslipi yachanukishu chiña hohu neyi anakuyikeña. Chinekali ñana muloña masilipi akashalahu akazatika cheñi chaaka chikwawu neyi hakubula kusoneka. Neyi munakukeña yipapilu yayivulu hela madimi amakwawu kubadika hanoyu yatemeshawu, mwatela kusonekesha kuzatisha Literature Request Form S-14. Mwani sonekenu nenu yumiyi yakubombela hayimwatemesheli.
◼ Nyikanda yayiha yidihu:
Sambilileni Ukubelenga no Kulemba—muKaondi