Chikasha Chamalwihu

◼ Komana “nduñu wamaana nikashinshi” weteja mazanvu adimena awaYinsahu abulakanaña nakusandujola jiNsona hela kuhanjekahu?—Mat. 24:45, 47.

Inehi, hetejaku. Ilaña, kumaluña amakwawu mukaayi antu ekala mukuloñesha kwetu adikuñululaña nakusandujola halwawu nsañu jakundama kuBayibolu. Amakwawu anatonduhu kwikala nezanvu dadimena dakudiza Bayibolu munyikanda yachiHeberu niyachiGriki kulonda kusandujola walala waNew World Translation. Amakwawu niwena asandujolaña hansañu jasayansi jakundama kuBayibolu. Anatuñi maWeb sites nimwakuhanjekela haintaneti kulonda aditemesheleña nikudihujola hayitoñojoka yawu. Cheñi nawa abulakanaña hamu nikwidisha nyikanda yashimunaña yuma yiyawanaña nikuwejelahu hansañu yitwadizaña hakupompa kwetu kwawiniKristu nimunyikanda yetu.

Kunyeñumuka kaayi kejima, antu jaYehova anakutambwila nshimbi yayivulu yakuspiritu nikukoleshewa hakupompa kwachipompelu, kupompa kwanyanya, nikweneni, nimunyikanda yamukuloñesha kwaYehova. Kuhitila muwunlomboli waspiritu yindi yajila Nizu dindi dalala, Yehova wahanaña yuma yakeñekaña kulonda antu jaNzambi ejima atweshi “kudibomba hamu nayitoñojoka yimu nikutiyañana kumu” hakwila atwalekuhu “nakukola mukukuhwelela.” (1 Kor. 1:10; Kol. 2:6, 7) Mwalala twamusakililaña Yehova hayuma yakuspiritu yinakutuloñeshelayi munanu mafuku akukuminina. Dichi, ‘nduñu wamaana nikashinshi’ hetejaña nyikanda yidi yejima, yendu, hela maWeb sites abulaña kutuñawu hela kuyiloñesha muwunlomboli wawuku.—Mat. 24:45-47.

Chachiwahi neyi antu anakukeña kuzatisha yitoñojoka yawu kulonda kutwala nsañu yayiwahi hambidi. Ilaña, kwosi kufwila kwamuntu kwatela kukañesha yuma yinakukoñayi Yesu Kristu makonu kuhitila muchipompelu chindi chaheseki. Muyaaka nkulakaji yatachi, kapostolu Pawulu wasoñamishili hakubula kudiñija munsañu yazeyeshaña, yamanishaña mpinji, yidi neyi “nsañu janyiyachi yakakumaña, jaletaña kwakwihujola hohu, hijakwashaña mudimu waya mukukuhwelela, watukunjikiluwu kudi Nzambuku.” (1 Tim. 1:3-7) EniKristu ejima atela kufwila ‘kutondolwela kwihujola kwawusupi, ninyiyachi, nikufwila ntaadi, nikuzuñila Nshimbi; mwenimu himwakwashañaku, himwekala chumaku.’—Titusa 3:9.

Ejima anakukeña kudizilahu nsañu jikwawu jaBayibolu nikusandujola, tunayikoleshi kusandujola muInsight on the Scriptures, “Amalembo Yonse Yantu Yaputwamo Kuli Lesa Kabili Yakunonsha,” ninyikanda yetu yikwawu, yidi neyi yahoshaña hawuprofwetu waBayibolu wekala munyikanda yaDanyeli, Isaya, niChimwekeshu. Iyi nyikanda yatwinkaña nsañu yayivulu yakuzatisha hakudiza Bayibolu nikutoñojoka, hakwila ‘tusweji kwiluka mwakeñayi Nzambi namaana aspiritu ejima nakashinshi; kulonda twendi nakumutelela Yehova, nakumutiyisha kuwaha kwakweni, chitukusoñaña nyikabu munyidimu yayiwahi yejima, nakukula mukwiluka Nzambi.’—Kol. 1:9, 10.