Maluña Etu Akudifukwila Ajila

1. Hinyi yitwatela kuhameka hamudimu wakutuña Matala aWanta amawahi?

¹ Mu 1999 achimweni neyi Matala aWanta akushika ku 1,500 akeñekeleña muZambia. Kufuma hayina mpinji Matala aWanta akubadika ha 1,300 anatuñewi. Kumaluña ejima kunakuyawu mudinu ituña, antu anakumona nawu Yehova nakukiswila akwakudifukula indi kuhitila mukuyinka maluña amawahi akudifukwila. Chumichi chinakuletesha antu kuhameka ijina daYehova nankashi. Kakavulu twatiyaña antu nakuhosha nawu aYinsahu jaYehova ‘anawanishi ituña naMatala aWanta.’ Hamafuku akunyima, yipompelu yayivulu yadiña nakupompela hanji, kusonkela hashikola, hela kusonkela matala, nawa chumichi chaleteleña kasawuntu kudi Nzambi yitwalombaña. Chakubula nikujinooka ‘mudimu weniwu anakuwukoña kudi Nzambi yetu.’—Nehe. 6:16; Zek. 4:6.

2. Chumanyi chitwadizilaña kuchakutalilahu chaEsawu kutalisha hakumwekesha kusakilila hayuma yakuspiritu?

² Mwekeshenu Kusakilila: Akwakudifukula aYehova atela kusakilila hayuma yakuspiritu yinayinkuwu. Chakutalilahu chaEsawu chatudizishaña nawu kubula kusakilila kwaleteshaña muntu kubula kutambwila wuselewa waYehova. Indi chakutalilahu chatama chaEsawu chatela kutukwasha ñahi? Twatela kwikala nampwila yakumwekesha kusakilila hamatala etu awanta ajila anatwinkuwu.

3, 4. Tunateli kumwekesha ñahi kusakilila haprogiramu yaKutuña Matala aWanta (a) hamuntu hamuntu? b) neyi chipompelu?

³ Njila yimu mutwatela kumwekeshela kusakilila yidi yakuhana yawaana mukudikeñela kuprogiramu yaKutuña Matala aWanta. (2 Kor. 9:6, 7) Henohu kanda atuñi Matala aWanta, yipompelu yakanaña kuvula kwamali akuhanañawu hakakweji nikakweji kumudimu wakutuña (Mali Akuhana Kwitala daWanta haKakweji). Kuhitila mukutemesha mali yitwakanini kuhana, dikwila nawu tunakuhameka chikupu hachawaana chaYehova chakututuñila itala dadiha. (Yak. 5:12) Yawaana yeniyi ayizatishaña cheñi hakutuña Matala aWanta awamana kwetu anakankili.—2 Kor. 8:14.

⁴ Chineli yipompelu yayivulu yakwashañawu kutuña Itala daWanta hiyatweshaña kuwana mali akutuña nachuku, izaza danduñu dafuukulahu kukwasha yipompelu yeniyi yabula mali. Yipompelu yeniyi yatemeshaña mali kukasanji kamutayi hakakweji hakakweji, bayi neyi himukuduku ilaña hiyawaana yakuhana kumudimu waKutuña Matala aWanta. Yawaana yeniyi yamwekenaña mumazu atemeshaña kasanji kamutayi hakakweji akumwekesha kusakilila.

5. (a) Munjilanyi yikwawu mutunateli kumwekeshela kusakilila hetala detu dawanta dinatutuñiluwu? (b) Muloñanyi waweni wutwatelela kuhembela chiwahi Itala daWanta nikudiloñesha?

⁵ Twatela Kuhemba Matala Etu aWanta: Njila yikwawu mutwamwekeshelaña kusakilila yidi yakuhemba Matala aWanta chiwahi nikuyiwahisha. Chineli muMatala aWanta dimutwahamekelaña ijina daYehova, chikuwaha neyi tukuyihemba nawunyonji nikuyiloñesha. Twayimonaña netu himatala aYehova, bayi matala etuku. Hadaha chipompelu chetu chakañenyi kutuña Itala daWanta dadiwahi dakudifukwilamu muloña wakubula mali. Ilaña haluwi lwaYehova, ichi tudi dehi Netala daWanta dadiha. Komana kwila tumwekesha kusakilila kuhitila mukuhemba chiwahi idi iluña dajila dakudifukwilamu nehi? Neyi tukañanya kuhemba chiwahi Itala daWanta, tukuleta kasawuntu hejina daYehova.—Nehe. 1:3; 2:17.

6. Wunsahwinyi wunakutambwila kasanji kamutayi?

⁶ Yipompelu yayivulu yinakuhemba chiwahi Matalawu aWanta. Ilaña yipompelu yikwawu hiyazataña mudimu wakuwahisha Matala aWantaku. Kasanji kamutayi kanakutambwila wunsahu wakwila nawu Matala aWanta amaha anakuyihemba chiwahi wanyi. Matala aWanta amakwawu adi nanyaji yamaneni, jimbañu jamajilu, yitwamu yakotoka, majilu mukapeka kakuhembela yuma, jinjanena jabaloka, majilu hanzi ninyisalanyi yamajilu. Iwu diwunsahu wantesha wudi hakachi kawunsahu wawuvulu watambwilaña kasanji kamutayi. Hakachi kayuma yitunateni dichinakumwekana Itala denu daWanta?

7. Muloñanyi wukwawu wukutuleñela kuhemba Itala daWanta chiwahi nawa dawunyonji?

⁷ Neyi chitwashimuna dehi, muloña waweni wutukuhembela chiwahi Matala etu aWanta nsañu yejina daYehova. Muloña wukwawu wudi wakwila nawu, hakutuña Itala daWanta kunakufwika mali amavulu. Chakatataka, kutuña itala daWanta danyanya nawa dawuseya wantesha muZambia dinakufwika mali K40,000,000 nakushika ku K50,000,000. Komana twatela kuyihemba chiwahi, muloña mali azatishañawu kuMatala aWanta ayizatishaña hohu kumudimu wajila. Kubombelahu, akwakushimwina ahanaña mali atela kudikwashawu nachu bayi neyi mali asompokaña kumahetawuku. (Maku 12:41-44) Kwiluka yuma yejimiyi chikutuleñela kuhemba Matala aWanta chiwahi.

8. Hiyanyi akweti mudimu wakuloñesha Itala daWanta?

⁸ Hela chakwila Matala aWanta amavulu ekala mumakasa akasanji kamutayi, maluña wenawa akudifukwila ayihana kudi Yehova. Dichi, chipompelu chidi chejima chikweti mudimu wakuhemba itala daNzambi. Mpinji yikwawu yipompelu yalombaña wukwashu kumutayi wakukeña mapitu niyipamba yayiha kulonda kuhiñisha hayinadyiwu kudi amakenyi hela yinahumuki nampepela, indi kwiji kuloñesha tunyaji, hela kulomba ilata dimu hela ayedi akusinsisha hamalata anakisiki. Ilaña, chipompelu chikweti mudimu wakwakamena nyidimu yeniyi.—Nehe. 10:39.

9. Chumanyi chinakukeñeka hakwila nawu tuhembi Matala aWanta chiwahi?

⁹ Neyi hadi himunamoni nenu hanakukeñeka kuloñesha, chikuwaha neyi mukwila mwenimu mukunyakashana henohu kukala kanda kusweji. Hadaha twamonahu dehi chatohaña nyaji yanyanya mukapinji kantesha neyi chakwila tunayiloñeshi wanyi. Malata anakunyinkesha niwena neyi mubula kuyipopa swayi-swayi, alelukaña nikukisika. Komana kukala neyi kunamwekani zatilenuhu swayi kubadika kuchiñilila kukatohi nakufwika mali amavulu. Dichi yipompelu yatela kutenteka mali hambadi hakakweji hakakweji kulonda ekaleña namali akulanda yuma yinakukeñeka hakuloñesha Itala dawu daWanta chiwahi. (1 Kor. 16:2) Kuhitila muNtanjikilu yaKukwasha Itala daWanta, kasanji kamutayi kahanaña wukwashu neyi kunamwekani kukala kweneni kunakukeñeka kuzatilahu swayi-swayi.

10. Muloñadi chichawahila kutambika amana kwetu akuluka yitembi kulonda kuzata mudimu wakuloñesha Hetala daWanta?

¹⁰ Neyi himukukeña kuwahisha hanatami, chikuwaha neyi mukutambika amana kwetu akuluka yitembi kulonda ayikwashuku. (Kwid. 35:30-35) Muniyi njila tukwiluka netu mudimu wunazatiki chiwahi, nawa chikukañeshaku maposu chikupu.

11. Hinyi watwaminineña mumudimu wakutuñulula, nawa chakutalilahu chanyi chitwatela kwimbujola?

¹¹ Mwatela Kuzatañaku Mudimu waKuwahisha Itala Denu daWanta: Chawahaña nankashi neyi aeluda niankoñi akuzatila atwamininaña mumudimu wakuwahisha Itala daWanta nikudihemba nawunyonji. Nehemiya wemikili chakutalilahu chachiwahi nankashi. Kwambukaku nawankoñi adiñaku henohu yena kanda, Nehemiya hadiñi nakuyandisha antu jaNzambi hela kuyikanjikija kuzataku. Hakeñeleña kudinka wantaku. Ilaña wadiña nakukalakala mudimu namuchima wejima. Dimuloña wahosheleliyi nachikuhwelelu nindi: “Ami kwami kwila mwenomu nehi, muloña wakumutiya Nzambi woma. Hela chochu, ami nakakeleli kumudimu wampwembu iyi.” (Nehe. 5:15-16) Mwalala, Nehemiya watwaminineña mudimu wakutuñulula mpwembu yamusumba.

12. Anyi atela kuzata mudimu wakuwahisha Itala daWanta?

¹² HaNehemiya 3:12 twatañañahu nsañu yeyala mukwawu waya mpuhu ijina dindi diyi Shalumi. Yena nianyanindi awambanda hiyadinkeleña wantaku, ilaña adihanini nakukalakala mudimu. Wejima wetu twatela kwikala nayililu yoyimu yakuhemba Itala daWanta chiwahi neyi cheliliyi Nehemiya niShalumi nichisaka chindi. Komana twatela kuchimona neyi hikukooleka kweneni kwakuwahisha Itala detu daWanta.

13. Chumanyi chitwatela kufwila kwila kutalisha kuMatala etu aWanta?

¹³ Bayi Mudiwula Itala daNzambi Yenuku: Komana nshimbi yitunahanjikuhu yinakundami hohu kuyipompelu yatuñilawu Matala aWanta nawukwashu wakasanji kamutayi? Inehi! Neyi chipompelu chapompelaña mwitala delukawu nawu Itala daWanta, itala denidi atela kudihemba chiwahi kulonda diteleli ijina dakwila nawu, Itala daWanta dawaYinsahu jaYehova. Datela kwambukaku namatala ejima munodu iluña muwunyonji nikudiwahisha neyi iluña dakudifukula kwalala. Komana twatela kushaku muchima wakumwekesha kusakilila hamaluña ajila akudifukwila nawa bayi ‘tuleka itala daNzambi yetuku.’—Nehe. 10:39.