Wunsahu Wunakumwekesha Chikuhwelelu Chakola!
1. Yumanyi yakuluwañesha antu yashimwineñahu dehi Yesu?
1 Apostolu atiyililili nakashinshi hampinji yahosheleñayi Yesu kutalisha hakwinza kwindi nihakukuma kwakanu kaayi. Kwamba kaholoka yuma yakaluwañesha muchidi wamuntu—majita, nzala, nyitentanshi niyipupu. Kuhiñahu, Yesu wahosheli nindi atumbanji twindi akayihela, akamona yihuñu nawa akayijaha. Kwakenza atuprofwetu akutwamba nawa akadimba antu amavulu. Kukeña kwawantu amavulu kwakakeha.
2. Muloñadi chichinekalili chalema hakwila nawu nsañu yayiwahi anakuyishimwina mukaayi kejima?
2 Kwesekeja naniyi yuma, apostolu atela ahayamini hampinji yayilejeliyi Yesu nindi nsañu yayiwahi yaWanta akayishimwañena mwahita iseki dejima. (Mat. 24:3-14) Makonu tunakumona kushikijewa kwabadika kulema kutalisha haniwu wuprofwetu wawuwahi. Hela chakwila tunakushakama mumpinji yakala, aYinsahu jaYehova anakushimwina nsañu yayiwahi namuzañalu. Chineli kukeña kwawantu amukaayi kunakehelaku, kukeña kwetu kunakuswejelaku. Hela chakwila atuhela kudi “nyuza yejima,” twashimwinaña munyuza yayivulu.
3. Naambalanyi yimunamoni muLipoti yamukaayi kejima yinayikoleshi?
3 Tukukoleshewa chikupu hakuhituluka mumudimu wakoñeluwu aYinsahu jaYehova muchaaka chamudimu chinamani neyi chinamwekeshuwu hachati yidi hefu 3 nakushika 6. Hayaaka 16 yinahituhu, aYinsahu akalakeleña maora akubadika habiliyoni yimu hachaaka nichaaka mumudimu wakushimwina nikwilisha atumbanji. Iwu hiwunsahu wunakumwekesha nawu aYinsahu jaYehova akweti chikuhwelelu chakola! Apayiniya avulililuku namapasenti 5.8, akwakushimwina namapasenti 3.1 nawa atudizi aBayibolu namapasenti 4.4. Muchaaka chamudimu cha 2007 apapatisheweli ashikili kumapesenti 20.1 kubadika amuchaaka chamudimu cha 2006. Tukweti muzañalu hakumona antu akushika kukamwihi nayihita yitanu nayiyedi anakumukalakela Yehova nakashinshi, chumichi kanda chimwekaneñahu dehi munsañu yanyaka yawantu. Chimwashinshika hachati, chumanyi chimunamoni chinayikoleshi nankashi?
4. Kukalanyi kwashindiliyi iyala wumu hampinji yakeñeleñayi kupapatishewa?
4 Hela chakwila naambala yeniyi yeneni, twatela kwiluka netu naambala yeniyi yinakwimenaku antu anamwekeshi chikuhwelelu chawu. Shinshikenu hanichi chakutalilahu. Guillermo wakulilili mwituña daBolivia. Wasemukili muchaaka cha 1935, watachikili kuzata mwitempa dacoca hadiñayi nayaaka yitanu nayiwana. Kufuma kuwansi windi, wadiña nakutafunya mafu acoca kulonda kukehesha yihuñu yakuzata nyidimu yakumujimba yakola. Nkumininaku watachikili kunwa walwa munjila yatama nikunwa makanya. Chatachikiliyi kudiza yuma yakeñañayi Yehova kudi yena, Guillermo walekeli kunwa makanya, kuhiñahu walekeli kunwa walwa munjila yatama. Kukala kweneni kwadiñayi naku kwadiña kwakuleka chaaku chindi chamusendeleli yaaka yayivulu chakutafunya mafu acoca. Watwalekeluhu kulomba nawa washindili chaaku chenichi. Walekeli yililu yejima yatama nawa wapapatisheweli. Wahosheli nindi, “Nekali wakadi majilu nawa nindi wamuzañalu hama.”
5. Chumanyi chimunakufwila kwila?
5 Chalala Yehova wakeña antu. Nkeñelu yindi yidi yakwila nawu ejima abalumuki munyichima. (2 Pet. 3:9) Iyi diyi nkeñelu yetu ninetu. Anetu nawa twatela kuzata hakumina ñovu jetu kulonda kukwasha antu ashinshika kumwiluka nikumukeña Yehova neyi chitwamukeña.