Chikasha Chalwihu

◼ Komana chachiwahi Chinsahu chaYehova kumuukila hachipatela hela kumuhembela hetala dahembelañawu atushinakaji dekala mumakasa ansakililu?

Nsakililu jashiyashana jekala namatala akuhembela atushinakaji niyipatela yakuukila antu ayekelaña nayikatu hampinji yayilehi. Kuhosha mwalala, iyi yipatela hela matala hiyayituñila hakutiyakesha Babiloni Munenuku. (Chim. 18:2, 4) Nsakililu yatela yatuñili awa matala kulonda akwatileñahu mali. Makonu, yipatela yikwawu yikweti majina ansakililu muloña ayituñili kudi akwansakililu, ilaña yikwawu achidi kukalakelamu kudi antu amunoyu nsakililu.

Neyi Chinsahu chaYehova nakufwila kumuuka hela kumuhemba, watela kufuukulahu yomweni neyi chakwila wukuya kuchipatela hela kumatala akundama kunsakililu. Chinleji chamuntu wumu chinateli kumwiteja kwila mwenimu ilaña chinleji chamuntu mukwawu hichikumwitejaku. (1 Tim. 1:5) Mpinji yikwawu kwekalaña yuma yinateli kumuletesha muntu kufuukula muniyi njila, nawa chachiwahi kutoñojoka hayumiyi.

Chakutalilahu, itala dakuhembela atushinakaji hela chipatela chekala mumakasa ansakililu hadaha dichekala kwakwihi. Hela neyi kudi chipateli chikwawu kwakwihi, hadaha chidi mumakasa ansakililu dichazataña chiwahi. Chipatela chidi mumakasa ansakililu dichinateli kwikala hohu nayozelu yayiwahi yinakukeñeka hakuuka yikatu, hadaha dichipatela hohu hekala ndotolu hela mukwakuladika wunatweshi kuuka chiwahi. Cheñi, yipatela yekala mumakasa ansakililu yinateli kulemesha kufuukula kwenu hamu neyi mukwaKristu hansañu yakusha mashi, ilaña yipatela yikwawu hela yanfulumendi hiyatela kulemesha kufuukula kwenuku. Dichi iyi diyi yuma yikwawu yimwatela kutoñojokahu hampinji yimunakutonda chipatela kumwatela kuya.

Neyi munafuukuluhu kuya kuchipatela hela kumatala akuhembela atushinakaji ekala mumakasa ansakililu, mwatela kuchimona neyi munakufweta muntu wunayikalakeli. Munateli kuchimona neyi nsakililu yidi namudimu wakulanda nakulandulula, nawa neyi mulandaku chuma kumudimu wamuchidiwu, himunakuhana chawaana chakukwasha nsakililu yakutwambaku. Ilaña munakufweta hohu chuma chimunalandi hela hamudimu wunayizatiluwu.

Hela chochu, hakwikala mukwaKristu, munsañu yamuchidiwu mwatela kwiluka chikupu nenu himunadibombi mumudimu wakundama kunsakililu yakutwambaku. Cheñi, himwatela kutena nkumbu yakundama kunsakililu, chidi neyi “Fwaza” hela “Sisita,” kudi antu azatilañahu hela enzaña nakuhempula matalaku. (Mat. 23:9) Mwatela kuchimona chikupu nenu munendeli hohu kuyuuka, kwosi chuma chikwawuku.

Neyi anayitenteki muchipatela, mwatela kuyileja nenu mudi Chinsahu chaYehova nawa munakukeña aeluda amuchipompelu chenu kuyihempula. Ichi chikuleñela kuyikwasha lwakuspiritu kudi aeluda hampinji yanayitentekuwu.—1 Tesa. 5:14.

A Yinsahu amuchisaka, aeluda, niamakwawu amuchipompelu atela kukwasha ana kwetu niahela atushinakaji ashakamaña kwitala dakuhembela atushinakaji sweje-e neyi dekala mumakasa ansakililu. Kuzata nakanañachima hansañu yamuchidiwu chikuyikolesha awa atushinakaji nawa chikuyikwasha kubula kuluwukila nakudibomba mukulomba kwansakililu, kwanakana, hela nyidimu yikwawu yadifwanaku yekalaña hanawa matala.

Chineli tuneluki iyi yikuma, muntu himuntu watela kutoñojoka yuma yejima yabombelamu nikufuukulahu yomweni chipatela hela itala dakuhembela atushinakaji datela kuzatishayi.—Ŋal. 6:5.