Dizishenu Amaha Kuumika Ikañesha
1 Neyi amaha atachika kudiza Bayibolu ‘nikukeña kwakama Nzambi,’ ayilulakenaña kudi Satana. (2 Tim. 3:12) Ikañesha dinateli kufuma kudi akwetu yitwazataña nawu, akashikola, hela atuñi netu. Chekalaña chakala sweje-e neyi ataña jawu ayihembaña ayikañeshaña.—Mat. 10:21; Maku 3:21.
2 Ikañesha Adishimwineñahu Dehi: Amaha atela kwiluka nawu anateli kuyikabisha nawa dichinjikijilu chakwilukilaku nawu hiyatumbanji alala aKristu. (Yow. 15:20) Mpinji jikwawu, akwakukañesha ekalaña nayitoñojoka yaluwa kutalisha hadi aYinsahu jaYehova. Ilukenu nenu muzañalu waweni wenzaña neyi ayikaana hamuloña wakwikala atumbanji twaYesu nikumwovwahila Nzambi. (Yil. 5:27-29, 40, 41) Yilejenu amaha nenu Yehova wayakamenaña chikupu. (Mas. 27:10; Maku 10:29, 30) Kuhemba kashinshi kawu kukuyileñela kwikala kukabadi kaYehova hansañu yawanta wakuleña kwejima.—Yish. 27:11.
3 Kwiluka Kwalala Chikwalemena: Yilejenu atudizi enu aBayibolu kulema kwakutwalekahu kudiza kwiluka kwalala hela chakwila akumona kukala. Kuhitila mukuzatisha ikañesha, Satana wakeñaña kuyikañesha kuhemba yuma yinakudizawu mumuchima wawu wachifwikija. (Yish. 4:23; Luka 8:13) Atela kutwalekahu kudiza kwiluka kwalala kwekala Mwizu daNzambi kulonda kwikala nachikuhwelelu chakola.—Mas. 1:2, 3; Kol. 2:6, 7.
4 Chiyatelela Kuumika: Kuumika kwakeñekaña sweje-e neyi tumona kukala kweneni nawa mwafumaña yuma yayiwahi. (Luka 21:16-19) Neyi amaha omika ikañesha, ahetelañamu hamu niantu amakwawu. Yehova wayinkaña ñovu neyi jenkañayi antu omikaña chikupu.—Yak. 1:12.
5 Kapostolu Pawulu wazañaleli chelili amana kwindi ayiluku hambidi kuspiritu muTesalonika. Wamuhamekeli Nzambi hakukwasha antu amavulu kwinza muchalala. (2 Tesa. 1:3-5) Ninetu tunateli kuzañalala neyi tudizisha atudizi etu aBayibolu chakutalañana nekañesha nichatela kuumikawu.