Mukanda Kufuma Kwizaza Dalombolaña
Kudi Akwetu aYinsahu jaYehova:
Tudi namuzañalu hakuyisonekela awunu mukanda enu ana kwetu. Tunatiyi neyi chatiyiliyi kapostolu Yowanu, wahosheli nindi ‘wakeñeli chikupu’ akwawu akakwitiya nawa wazañaleli nankashi hakumona akwawu ‘chiyendeleñawu mwaya nsañu yalala.’ (2 Yow. 1, 4) Chikuhwelelu chalala chawakwaKristu hinkisu yeneni kudi wejima wetu. Nsañu yalala yatukuula kuntañishilu yaBabiloni Muneni niyaaku yachu yamusawulaña Nzambi. Kumwovwahila Nzambi kunatukwashi kwikala antu akweti kukeña, ovwaha nawa aluwi. Nawa, nsañu yalala yinatuleteshi twikali antu atooka kumesu aNzambi nikwikala nakuchiñeja kwawumi wahaya nyaka.
Cheñi, twasakililaña, muloña spiritu yaYehova yatulombolaña mafuku ejima nikutwikolesha. Tunakuhweleli netu mwadiluñishili chikupu kushinshika hanjila jashiyashana jatwilombwelañamu Yehova mukukeña nikutwikolesha naspiritu yindi haKupompa kwaNkambi kwadiña namutu wakwila nawu “Twalombolewaña naSpiritu yaNzambi” kwadiñaku chaaka chinamani. Chineli yuma mukaayi yinakutaminaku, chalema kushindamena haspiritu yaYehova yasweja ñovu kulonda yitulomboli mumafuku akala adi hambidi.
Tunakuhweleli netu chayishikaña hamuchima hakutaña nsañu yakuzañalesha muYearbook ninyikanda yikwawu kutalisha hadi amana kwetu anoomiki makabi amavulu kukoola chikuhwelelu chawu. Nawa chakuhayamisha hama hakwiluka netu hadi amana kwetu wenawa ashinshika amavulu hashimbwili wanyi kufuma hampinji yayipapatishiluwu nampinji yatachikili kukala hela achidiñi kanda apapatishewi. Twayikeña hama hamuloña wakwovwahila kwawu nikutatakena nsañu yaloña. Chalala, chakutalilahu chawu chachiwahi chakoleshaña kufuukulahu kwetu kwakutwalekahu kwovwahila Wanta hichikweti muloña nakukala kudi kwejima kutunateli kumonaku.—1 Tesa. 1:6-8.
Amana kwetu niahela, tweluka netu kudi kukala kwakuvulu kutalisha hansañu yamali nimuyuma yayivulu yamuwumi yimwatela kuumika kulonda yisaka yenu yishakami mukukeña. Enu amakwawu, chayikalilaña nikushimwina nikuwanikaña mpinji yejima kukupompa. Iwu diwu muloña wunaleteshi hanyima yakuhanjekahu chikupu nikulombelahu, twahimpili ndandanda yakupompa kwachipompelu kutachika haJanuary 1, 2009. Tunakuhweleli netu mukukoolekela iku kuhimpa kulonda mwikali nampinji yeneni yakudiza kwahalwenu nikwachisaka.
Hakupompa kwamaneni kwashiyashana nihakupompa kwankambi kwadiñi muchaka chinamani, twadiñi namuzañalu waweni hakumona antu amavulu ashikiluhu hakupapatishewa. Hakachi kawu, hadiñi niatwansi. Tunayihameki hama enu anvwali hakukulisha anyanenu muchalala nikuyikolesha kudihana kulonda kumukalakela Yehova hampinji yachiduwu atwansi. Chineli atwansi wenawa amonaña kukala kwakuvulu hashikola, ilaña anashikuhu hakupapatishewa chinakumwekesha chikupu kufumba kumwayifumbaña kumatala.—Mas. 128:1-6.
Cheñi, tunakuhameka hakuvulilaku kwakudiza Bayibolu kwalombweluwu, nawa amishonali niapayiniya adimena adikitili nañovu muniwu mudimu. Wejima wetu aMwizaza Dalombolaña tunakuhameka chikupu hamudimu walema wazatañawu amana kwetu niahela mukaayi kejima hakuhosha nawu “Inzaña” kudantu ashinshika, nakutambika ejima akweti mpwila kulonda “atambuli meji awumi chakadi kulanda.” (Chim. 22:17) Tunakushikija ejima 289,678 adihanini kuhitila mukupapatishewa mumenji chaaka chinamani, muchipompelu chamukaayi kejima!
Chachiwahi kutwalekahu kudanukishaña mazu akapostolu Yowanu, wasonekeli nindi: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” (1 Yow. 2:17) Nawa twatela kutoñojokaña netu tunashiki kwakwihi nampinji ‘yakuhita’ kwakanu kaayi. Chachiwahi kushindamena hakwila nkeñelu yaNzambi nikwikala ‘atona’ mpinji yejima. (Mat. 24:42) Neyi twila mwenimu, hitwakatoñaku, nawa twamba katambwila yuma yayiwahi yaluwi lwaYehova.—Isa. 63:7.
Tunayileji chikupu netu twayanukaña mpinji yejima nikuyilombelaku nawa netu twayikeña nankashi. Tunalombi netu Yehova yoyikiswili chikupu.
Yetu ana kwenu,
Izaza Dalombolaña dawaYinsahu jaYehova