Muhamekenuña Yehova Mafuku Ejima
1. Indi ambuña aNzambi ayisañumuna kwiladi, nawa muloñadi?
1 Mwanta Davidi washimwini kufuukulahu kwindi kwakumuhameka Yehova “hefuku hefuku,” nihaya nyaka. (Mas. 145:2, 7, 21) Anetu nawa tukweti nyiloña yayiwahi yakumuhameka Yehova mafuku ejima.—Mas. 37:10; 145:14, 18; 2 Pet. 3:13.
2. Indi Yisaka yinateli kumuhameka ñahi Yehova mafuku ejima?
2 Hetala Detu: Tukweti nyikanda yayiwahi nankashi yinateli kutukwasha hampinji yakuhanjeka nsañu yakuspiritu, neyi tunakutaña nsona yefuku, hampinji yaKudifukula kwaChisaka, nihampinji yakuloñesha kupompa kwachipompelu. Yisaka yayivulu yikweti chaaku chakudyila yakudya hamu hela tuhu kapampa kamu hefuku. Kudyila hamu kwaleteshaña antu kuhanjeka mumesu awunda nawa ekalaña nampinji yakumuhameka Yehova. Anvwali neyi ahanjekaña nawanyanawu, mpanji jamuchidiwu jikwikala njila yalema yakukulishilamu anyana ‘nikuyileja yitoñojoka yaYehova.’—Efwes. 6:4; Kuhit. 6:5-7.
3. Kukoolekanyi kutukweti kwakumuhameka Yehova nawana kwetu?
3 Nawana Kwetu: Twekalaña nakukooleka kwakuwahi kwakumuhameka Yehova nawana kwetu neyi tudi mumudimu wakushimwina hela hakupompa kwachipompelu. (Yish. 15:30; Fwi. 4:8; Heb. 13:15) Chineli wejima wetu twamukeña Yehova, chikuwaha neyi tumuhamekaña chakufuma hamuchima hakuwaha Kwindi neyi tunakuhanjeka nawana kwetu.—Mas. 106:1.
4. Munjilanyi mumunateli kumuhamekela Yehova chili himukweti mpinji yakushimwina mafuku ejimaku?
4 Hakuhosha Nawantu Abula Kwikala aYinsahu: Chili hitukweti mpinji yakuya nakushimwina mafuku ejimaku, kuhosha chantesha hadi Yehova nihankeñelu yindi nawakwetu itwazataña nawu, akashikola, niantu amakwawu kunateli kuleñela antu ashinshika kwikala nakuchiñeja. (Mas. 27:14; 1 Pet. 3:15) Hampinji yadiñiyi halwendu mundeki, muhela wumu wamushimwinini mukwawu muyendeleluwu hamu, wunsahu weniwu wamukundejeli nikumukolesha ona muntu chakwila wamwinkeli muhela keyala ninaambala yindi yanshiña kulonda atwalekuhu kuhanjeka. Chinakusweja yuma kutaminaku mwituña, antu jaYehova anakutwalekahu kuleja antu anakukeña kutiyilila “nsañu yayiwahi yayuma yayiwahi.” Chumichi chaleñelaña antu amakwawu kwikala nakuchiñeja nikumuhameka Yehova.—Isa. 52:7; Rom. 15:11.
5. Muloñadi wutwafwilaña kumuhameka Yehova, nawa chumichi chaleteshaña antu kwiladi?
5 Yehova watiyaña kuwaha hama hakumona ambuñindi anakumuhameka mafuku ejima. Anetu tunateli kumuhameka Yehova mafuku ejima hamatala etu, hachipompelu, nihampinji yitunakuhosha nawantu achidi kanda ekali akwetu akwakumuhameka neyi yileñaleña yitwamonaña chiyamuhamekaña Yehova.—Mas. 19:1-4.