Keñenu Njila Jakwilishilamu Atumbanji
1. Tunateli kuwana atumbanji amaha kudihi?
1 Pawulu niakwawu akwaKristu afwilileña kwilisha atumbanji kuhitila mukushimwina kwitala nikwitala, hayisankanu, halwendu, nikwejima. Hakwikala akwakushimwina aWanta adikita afwilaña kwilisha atumbanji, komana munateli kuzata chikupu munyidimu yenu yakushimwina? Komana munateli kuzatisha mpinji yimukweti kulonda mukeñakeñi antu atelela nakuyishimwina? Jinjilanyi jiyelishilañamu akwetu akwakushimwina nsañu yayiwahi atumbanji?
2. Chakutalilahwinyi chimwatela kushimuna chinakumwekesha kuwaha kwakwikala asoñama kulonda kuzatisha mpinji yashiyashana hakushimwina nsañu yayiwahi?
2 Amavulu anakwilisha atumbanji muloña wakuzatisha jinjila jakushimwinamu antu kwejima kwaduwu. Akwakushimwina amakwawu ashimwinaña kumudimu. Royd wadiña nakuzata kumugoti, wazatishileña mpinji yakunooka kulonda kwihula akwawu akanyidimu chatoñojokeleñawu hajinsona jashiyashana. Wehwileña malwihu adi neyi awa: “Indi ‘ilola’ datenawu haMatewu 16:18 hinyi?” Hela, “Indi ‘ilola dakuhukena’ datenawu haAroma 9:32 hinyi?” Akwanyidimu amavulu apompeleña mumazanvu amaneni kulonda atiyi chinakulumbululayi jiNsona. Muloña Royd washimwinineña wunsahu wamumpanji muniyi njila, akwawu akwanyidimu amavulu adihanini nakupapatishewa. Dichi wakeñeli njila yatelela yakushimwinamu nsañu yayiwahi.
3. Njilanyi yazatikaña chiwahi hakutachika kwilisha atudizi aBayibolu?
3 Akwakushimwina Wanta amakwawu atachikaña kudiza Bayibolu neyi amuleja mwiniitala nawu adizeña nindi Bayibolu. Ifuku dimu nantetemena chipompelu chikweti akwakushimwina 105 chazatili nañovu kulonda kutachika kudiza Bayibolu nawenimatala ejima awaninuwu. Akwakushimwina 86 ayili nakushimwina, hanyima yakuzata maora ayedi mumudimu wamwiha, elishili atudizi aBayibolu 15 amaha.
4. Nshimbinyi yaYesu yalema yitwatela kwanukaña, nawa twatela kufuukulahu kwiladi?
4 Twalekenuhu Kukeñakeña Antu Atelela: Hakwikala akwakushimwina aWanta, munateli kweseka kuzatisha iji njila jinashimunewi muchinu chibaba. Hela chochu, chikuwaha neyi mukushinshika tushidikilu twamwiluña denu henohu kanda mutachiki kuzatisha njila yakushimwinamu. Sweje-e dinu, twatela kwanuka nshimbi yahaniniyi Yesu yakukeñakeña antu atelela nakukwasha antu amuchidiwu kwikala atumbanji.—Mat. 10:11; 28:19.