‘Tuñenu Yisaka Yenu’
1. Nyitu yayisaka yatela kunyakala kuzata mudimwinyi nawa muloñadi?
1 Chakadi nikujina, muyisemwa yejima yamukaayi, yisaka yinakwambokelamu. Kaayi kaSatana kanakudiñija munsañu yakutwamba niyililu yatama. (1 Yow. 5:19) Ichi chinakumwekesha nawu twatela kunyakala ‘kukolesha yisaka yetu’ nikudizisha amakwawu kulonda niwena akoleshi yisaka yawu.—Yish. 24:3, 27.
2. Kajindilwinyi kakwikala namuzañalu muchisaka?
2 Nshimbi jamuBayibolu jaTukiñaña: Kuzatisha nshimbi jamuBayibolu dikajindilu kakwikala namuzañalu walala muchisaka. Iyi nsañu yalala yalema yakwashaña antu amuchisaka muyuma yejima yamuchihandilu. Chisaka chazatishaña nshimbi jeniji chekalaña namuzañalu nikuwunda kwafumaña kudi Nzambi.—Esekejenu Isaya 32:17, 18.
3. Chumanyi chaleñelaña kufumba kwekala muniwu mukanda kwikali kwalema chikupu?
3 Nshimbi jinateli kutukwasha kutuña yisaka yetu ajilumbulula chachiwahi nakujisha hamu mumukanda wahoshaña nawu Chakwikala naMuzañalu muChisaka. Kapetulu kejima kakunkulula nachikasha chakudizisha chinakukonkomwena hanshimbi jatela kwanukaña antu amuchisaka. Yikasha yayivulu yatachika nalwihu lwakwila nawu, “Indi iji nshimbi jamuBayibolu jinateli kukwasha . . . ?” Ilu lwihu lwatukwashaña kwiluka yitoñojoka yaNzambi kulonda twiluki chamonañayi nsañu yitunakuhanjekahu.—Isa. 48:17.
4. Nsañwinyi yashiyashana yitwakahanjekañahu hakudiza?
4 Chitukutañaña iwu mukanda haKudiza Bayibolu haChipompelu chikutukwasha kuwiluka chikupu. Ilukenu chakuwana nshimbi jinateli kuyikwasha neyi kumwekana kukala kwashiyashana. Iwu mukanda wunakuhosha hansañu yidi neyi iyi: yuma yimwatela kukeña mudi mukwenu wakudisumbula nindi (kapetulu 2), nsapi jiyedi jaleñelaña maluwi kutwalekahu amuzañalu (kapetulu 3), anvwali chatela kukulishawu anyanawu kwikala adikita, amwakama Nzambi (kapetulu 6), chakukiña chisaka kuyuma yaluwañeshaña (kapetulu 8), nshimbi jinateli kukwasha avwali ajiki akweti yisaka kutwesha (kapetulu 9), wukwashu wakuspiritu wakwashaña yisaka yamonaña kukala kwakuteñuka nawalwa nimadombu (kapetulu 12), chuma chimwatela kwila neyi maluwi anakukeña kumana (kapetulu 13), yuma yimunateli kwila kulonda mulemeshi anvwali ashinakaja dehi (kapetulu 15), chakuhemba chisaka chenu chikahandi haya nyaka (kapetulu 16).
5. Indi yisaka yinateli kuhetelamu ñahi muniwu mukanda?
5 Zatishenu Chikupu Iwu Mukanda: Komana kwila mudizaña mumukanda wahoshaña nawu Chakwikala naMuzañalu muChisaka, hamu nachisaka chenu neyi progiramu yakudiza kwachisaka nehi? Neyi mukwila mwenimu chikukwasha ejima muchisaka kwikala adiloñesha kwakulahu hakudiza Bayibolu haChipompelu. Komana kwila muzatishaña chiwahi kufumba kwekalamu nehi? Neyi chisaka chenu chidi mukukala kwakadi kumonañahu dehi, hitulukenu mutupetulu tudi muniwu mukanda tunakuhosha hanoku kukala, nawa lombenu chikupu kulonda mwiluki chakuzatisha kufumba. Kubombelahu, keñenu njila jakuhaninamu iwu mukanda waChakwikala naMuzañalu muChisaka mumudimu wamwiha kudi antu amavulu.
6. Muloñadi wutwatela kuloñesha wonsu wetu nukwinzaña kukupompa mpinji yejima hakudiza iwu mukanda?
6 Yisaka yamwakamaña Nzambi yekala yakola kuspiritu nawa yanuñañana nikudiloñesha chikupu kushinda kukala kwaletaña Satana. (1 Tim. 4:7, 8; 1 Pet. 5:8, 9) Twasakililaña hama hakutufumba kudi Nzambi Watachikili chisaka!