Mukanda Kufuma Kwizaza Dalombolaña
Kudi Akwetu aYinsahu jaYehova:
Twakooleka hama hakututena hejina daMwanta Wakuleña Kwejima, Yehova. Ijina denidi dahaya nyaka nawa hitwatela kudesekeja nejina didi dejimaku. Yehova diyi watutumbili idi ijina, atachikili kutwilukila kunidi ijina dadimena sweje-e muchaaka cha 1931. (Isa. 43:10) Twatiyaña kuwaha nankashi hakuditena netu aYinsahu jaYehova.
Diyabolu nakuzata nañovu kulonda yafumishuhu ijina daNzambi. Hamuloña wakwila nyunza yidi muchiyuulu chaDiyabolu, antu anakukaana ijina daYehova. Babiloni Muneni wanta wamukaayi wansakililu yakutwamba, wahela ijina daNzambi nawa nadifumishi mumaBayibolu amavulu. Kwambukaku, Yesu walemesheli ijina daTata yindi, didatachikiliyi kutena mukulomba kwachitalilu kwadizishiliyi atumbanji twindi. Wahosheli nindi: “Tiyenu chimukulombaña; lombenuña nenu, Tata yetu wekala mwiwulu, ijina deyi dijili.” (Mat. 6:9) Kuhiñahu, mukulomba kwindi kwakufuma hamuchima kwalombeliyi kudi Tata yindi wahosheli nindi: “Namwekeshi ijina deyi kudi antu wanyinkeli mukachi kawakwampata yamunu mwishina.” (Yow. 17:6) Chineli twakeñaña kulondela chakutalilahu chaYesu, tunafuukuluhu kudikita chikupu kulonda kutiyakesha ijina daYehova mukaayi kejima.
Nsona yachaaka cha 2009 yahosheleña nawu, ‘Shimwinenu chikupu nsañu yayiwahi,’ yatusañumwini kudikita mumudimu wakushimwina. (Yil. 20:24) Chakubula nikujina, Yehova watukiswilili chikupu muchaaka chamudimu chinamani. Twashimwinini hama mukaayi kejima kulonda kuhameka nikulemesha ijina daYehova. Kuvula kwakuha kwawakwakushimwina akushika ku 7,313,173 azatili mudimu wakushimwina kudi antu ejima nikutañisha antu ashinshika anakukeña wukwashu hakukala kwamonañawu mafuku ejima. Antu akushika ku 18,168,323 apompeli Kuchanukishu chakufwa kwaKristu, chumichi chinakumwekesha nawu antu amavulu achidi kukeña kutambika ijina daYehova henohu kukuma kwakanu kaayi katama kanda kushiki.
Neyi hikukeña kwaYehova tukatwalekahu kushimwina nsañu yayiwahi yaWanta neyena nikuzatisha njila jejima jakushimwinamu antu mwiluña detu. (Mat. 24:14; Maku 13:10) Tutwalekuhu kutiyakesha ijina daYehova ninkeñelu yindi kudi antu amavulu kuhitila mukushimwina kwitala nikwitala hela munyikwakwa, kuhitila mukusoneka nyikanda nikushimwina hanshiña chili wunsahu wamumpanji.
Twakuhwelela chikupu netu Yehova keña yojiliki ijina dindi. (Ezek. 36:23) Yehova keña yojilumuni ejima asawulaña ijina dindi. Idi dakekala ifuku dalema kudi antu jaYehova ashinshika atiyakeshaña ijina daYehova nikuhakwilaku wanta windi wabadika.
Kukeña kwaYehova kwakeñayi antu jindi kwamwekeni hatooka to-o haKupompa kwaNkambi nikwaMatuña ejima kwadiña mumatuña amavulu muchaaka cha 2009 kwadiña namutu wahosheleña nawu ‘Tonenuña.’ Iku kupompa kwadiña kwadimena chikupu munsañu yetu yateokalatiki, kwatusañumwini kwiluka chikupu kulema kwakwikala asoñama hakutalila ifuku daYehova.—Maku 13:37; 1 Tesa. 5:1, 2, 4.
Chalala Yehova himuwahi, wazañaleshaña nyichima yetu. Watukamikaña kumunyenvu wutuuta nawa watulombolaña kuchikumu chamenji awunda.—Mas. 23:1, 2; 100:2, 5.
Ilukenu chikupu nenu Yehova wukutwalekahu kuyikiswila chimukukalakalaña mudimu wakushimwina Wanta mutukweji tudi hambidi.
Tunemushi ana kwetu mukaayi kejima,
Yetu amana kwenu,
Izaza Dalombolaña dawaYinsahu jaYehova