‘Nsañu Iyi Yayiwahi Akayishimwañena’!
1. Tweluka ñahi netu kwosi muntu watela kukañesha mudimu wakushimwina?
1 Kwosi chuma chinateli kumukañesha Yehova kwila mwafuukulayi. (Isa. 14:24) Hela chamwekeni neyi Nsompeshi Gideyona niantu jindi 300 hiyadi kutwesha kushinda amashidika 135,000 awaMidiyanuku, Yehova wamulejeli nindi: “Yaña nayena ñovu yeyi oyu, kayamwini aIsarela kudi aMidiyani; nakutemeshi dehi.” (Ansomp. 6:14) Indi Yehova walombolaña mudimwinyi makonu? Yesu wahosheli nindi: “Nsañu iyi yawanta yayiwahi akayishimwañena mwahita matuña ejima mwashakamawu antu.” (Mat. 24:14) Kwosi muntu wukutwesha kukañesha kuzata iwu mudimuku!
2. Muloñadi wutwatela kukuhwelela netu Yehova wukutukwasha hamuntu hamuntu mumudimu wakushimwina?
2 Yehova Watukwashaña Hamuntu Hamuntu: Tweluka chikupu netu Yehova nateli kukwasha aYinsahu jindi ejima kuzata chiwahi, hanu dinu tunateli kukuhwelela netu Yehova nateli kutukwasha hamuntu hamuntu? Yehova wamukwashili kapostolu Pawulu hampinji yamweni kukala kuhitila mudi Mwanindi, Yesu. (2 Tim. 4:17) Anetu nawa twatela kukuhwelela netu Yehova nateli kutukwasha hamuntu hamuntu kulonda twili nkeñelu yindi.—1 Yow. 5:14.
3. Indi Yehova watukwashaña muyumanyi?
3 Komana yuma yimwakamenaña mafuku ejima yayizeyeshaña hakuzata mudimu wakushimwina? ‘Wamwinkaña muntu wazeya ñovu.’ (Isa. 40:29-31) Komana anakuyiyandisha tahindi anakuyikañesha? “Umbilaku chiteli cheyi hadi Yehova, yena wukukukwashaku.” (Mas. 55:22) Komana mpinji jikwawu mwakañanyaña kushimwina? “Yaku dinu, ami nakekala nakanwa keyi.” (Kwid. 4:11, 12) Komana mukweti yikatu yayikañeshaña kuzata chikupu mumudimu wakushimwina? Yehova wayilemesha nawa wahamekaña chimwazataña, hela chakwila mwazataña chantesha.—1 Kor. 3:6, 9.
4. Indi kumukuhwelela Yehova kunateli kutukwasha munjilanyi?
4 Chikasa chaYehova “nachololi dehi wukuchifuntishamu hinyi?” (Isa. 14:27) Chineli twakuhwelela netu Yehova wukukiswila mudimu wetu, tutwalekenuhu chakubula kuleka kushimwina ‘nañovu jaYehova chakadi woma.’—Yil. 14:3.