Akwakushimwina akwaKristu Atela Kulomba Kudi Nzambi
1. Chumanyi chakeñekaña hakwila nawu tuzati mudimu wetu?
1 Hitunateli kuzata mudimu wakushimwina nkawetuku. Yehova watwinkaña ñovu yakukalakala mudimu. (Fwi. 4:13) Wazatishaña añelu jindi kulonda atukwashi kuwana antu adi neyi anyikoku. (Chim. 14:6, 7) Yehova diyi waleñelaña mbutu yachalala yitwakuwaña nikutukumwina kukula. (1 Kor. 3:6, 9) Chalema hama kudi akwakushimwina akwaKristu kushindamena hadi Tata yetu wamwiwulu mukulomba.
2. Yumanyi yitwatela kulomba?
2 Kudilombelela Etu Aweni: Mpinji yejima yitunakushimwina twatela kulombelela. (Efwes. 6:18) Yumanyi yitwatela kulomba? Twatela kulomba kulonda tubuleña kujinooka iluña detu dakushimwinamu nikwikala akadi woma. (Yil. 4:29) Twatela kumulomba Yehova kulonda yatulomboli kudi antu ashinshika itwatela kudiza nawu Bayibolu. Neyi mwiniitala yotwihula lwihu, twatela kulomba kudi Yehova wumweneni kulonda yatukwashi kuhana ñakwilu yayiwahi. (Nehe. 2:4) Twatela cheñi kulomba maana kulonda tutwamijeñaku mudimu wakushimwina hambidi. (Yak. 1:5) Kubombelahu, Yehova watiyaña kuwaha neyi tumusakililaña hakukooleka kutukweti kwakwikala akwakushimwina indi.—Kol. 3:15.
3. Indi kulombelelaku akwetu kwaleñelaña ñahi mudimu wakushimwina kuyilaku hambidi?
3 Kulombelela Akwetu: Twatela cheñi ‘kulombelelaku akwetu,’ neyi chinatwesheki nikutena majina awakwetu akwakushimwina. (Yak. 5:16; Yil. 12:5) Komana kukata kwayikañeshaña kuzata nañovu mumudimu wakushimwina? Munateli kulombelelaku akwenu akwakukalakala akola kumujimba. Bayi mudiwula wuswa wenu wakulombelela amakwawuku. Chekala chachiwahi kulomba kulonda akwañovu yachiyuulu abuli kukañesha mudimu wakushimwina hakwila nawu amana kwetu ‘ashakami chachiwahi nzo-o.’—1 Tim. 2:1, 2.
4. Muloñadi wutwatela kukakela mukulomba chakadi kuzeya?
4 Hitunateli kuzata mudimu wakushimwina nsañu yayiwahi mukaayi kejima nañovu jetuku. Neyi ‘tukakela mukulomba chakadi kuzeya’ tukukalakala mudimu nawukwashu waYehova.—Rom. 12:12.