Komana Disu Denu Datala Mumu Hohu?
1. Indi kwikala ‘nadisu datala mumu hohu’ kwalumbulukadi?
1 Yuma yitwelaña yashindamena hayuma yitwamonaña. Mazu ahosheliyi Yesu alala: ‘Neyi disu deyi dikutalaña mumu hohu, mujimba weyi wejima mwakatooka to-o.’ (Mat. 6:22) Neyi disu detu ‘ditalaña mumu hohu’ neyi chahosheliyi Yesu, tukushinshikaña hachuma chimu, kwila mwakeñayi Nzambi. Twatwamijaku Wanta nawa hitwaluwankanaña nayuma yamukunkulwayi yakumujimba hela yuma yakañeshaña mudimu wetu wakushimwinaku.
2. Yumanyi yatela kuluwañesha yitoñojoka yetu, hanu dinu chumanyi chatela kutukwasha?
2 Twatela Kudishinshika: Yuma yashimunañawu akwayikunzulemba nawu twatela kuyiheta hela yuma yahetawu akwetu yinateli kuluwañesha yitoñojoka yetu. Henohu kanda tulandi chuma chitunakufwila chakeñekaña mpinji yeneni, mali hela kuzata nañovu, chikuwaha neyi tusambila ‘kuchinda yuma yinakukeñeka’ kuhitila mukudihula netu, ‘Komana chumichi chikunkwasha mumudimu wunamukalakelaña Yehova tahindi chikunkañesha?’ (Luka 14:28; Fwi. 1:9-11) Chachiwahi cheñi kudishinshika mumpinji mumpinji tumoni chitwatela kupeleshaku chihandilu chetu kulonda tuzateña chikupu mumudimu wakushimwina.—2 Kor. 13:5; Efwes. 5:10.
3. Chumanyi chitunadizili kudi muhela wahimpili yuma yikwawu hakwila nawu yapeleshuku chihandilu chindi?
3 Muhela wumu chatachikiliyi kuzata wupayiniya wampinji yejima wafuukwiluhu kutwaleka kuzata mudimu wampinji yejima wakumujimba hela chakwila wadi kuwanaña mali akudikwasha nachu kuhitila mukuzata mudimu wampinji yantesha wakumujimba. Nkumininaku wahosheli nindi: “Kwosi muntu wunateli kukalakela anyanta ayeduku. Nalekeli kwakamena yuma yabula kulema nakwakamena yuma yakeñekaña muwumi. Nelukili nami maheta akisikaña nawa twayisekeshaña, dichi nadi kusulwila tuhu chamukunkulwayi hakwila nawu niheti.” Wapelesheli chihandilu chindi kuhitila mukuhimpa yuma yikwawu nawa watachikili kuzata mudimu wacheñi wamukwashili kutwalekahu kuzata wupayiniya wampinji yejima.
4. Muloñadi chichalemena kwikala nadisu datala mumu hohu makonu?
4 Chineli tunakushakama mumafuku akukuminina twatela kwikala nadisu datala mumu hohu. Ifuku dejima dikuhita datuswijaña kwakwihi nakukuma kwakanu kaayi kulonda ituña daNzambi dadiha ditachiki. (1 Kor. 7:29, 31) Neyi tusha muchima hamudimu wakushimwina, tukadamwina etu aweni niantu atutiyililaña.—1 Tim. 4:16.