Kudikita Chikupu Mumudimu Wakutachika Kudizisha Antu Bayibolu
Kutachika muJanuary 2009, yipompelu ayikolesheli kutondahu ifuku dimu daMposu hela daMulungu mukakweji nikakweji kulonda ashi kashinshi hamudimu wakutachika kudizisha antu Bayibolu. Yumanyi yinafumimu? Akwakushimwina amavulu anakudihayamina nawa adi namuzañalu chikupu, anakuhayama muloña kutachika kudizisha antu Bayibolu kunapeli kubadika chatoñojokeleñawu nawa adi namuzañalu muloña antu amboka-mboka aneteji kutachika kudiza mumukanda waChumanyi Chacheni Chatañishaña Bayibolu? Ankoñi endaña anakushimuna nawu yipompelu yidi namuzañalu nankashi haniyi njila yayiha, nawa yuma yinakufumamu yinakutiyisha kuwaha. Chakutalilahu, mutukweji twatachi tutanu, antu akubadika ha 8,000 atachikili kuyidizisha Bayibolu mwituña daItaly.
Akwakushimwina abulahu dehi kudizisha antu Bayibolu ichi anakufuntila nikutachika kudizisha antu Bayibolu. Carolina, wamwituña daPeru, wahosheli nindi: “Henohu kanda kwikali iyi ntanjikilu, hinadiñahu namuntu wakudizisha Bayiboluku, ilaña njila yakuzatisha ifuku dimu mukakweji yanleñeleli nikali namuchima wakukeña kudizisha antu Bayibolu. Nalejaña enimatala nami kudiza Bayibolu kwapela nawa hikwashimbulañaku. Inakumusakilila Yehova, hamuloña wakulondela iyi njila yatulejeluwu, munafumi yuma yayiwahi; ichi inakulombola atudizi ayedi aBayibolu.”
Nkoñi wañinza wumu muPeru wahosheli nindi “kufuma hakutachika, iyi ntanjikilu yinakwashi yipompelu yayivulu kwikala nawantu amavulu anakudizishawu Bayibolu. Chipompelu chimu chatachikili kudizisha antu amaha 25 mukakweji kamu, nawa chipompelu chikwawu chatachikili kudizisha Bayibolu antu amaha 24.”
Akwakushimwina achidi atwansi niwena atachikili kudizisha antu Bayibolu. Giovanna wayaaka yakuvwalika 11 wamumusumba waSão Paulo, muBrazil, wahosheli nindi: “Ifuku dimu haMposu namwaana nayili nawamama nakushimwina kwitala nikwitala, nakutachika kudizisha antu Bayibolu mumukanda waChatañishaña Bayibolu. Hetala datachi, nehwili mwiniitala, iyala waya mpuhu munyidimu yakulandulula, neyi wakuhwelela nindi Bayibolu ayonena kudi Nzambi. Wetejeli. Kuhiñahu namutañilili nsona ya 2 Timotewu 3:16. Wanlejeli nindi wazañaleli hakumona kansi wamumbanda nakumuleja iyi yuma yayiwahi, nawa watambwili mukanda.
“Chinafuntili nakutala ona iyala, nayili nawankaka awamayala muloña adiña amwiluka ona mwiniitala. Ona iyala watutambwilili, nawa namulejeli kubakula hachipapilu chayuma yidimu mumukanda waChatañishaña Bayibolu kulonda yatondi mutu wakeñesheliyi. Watondeli kapetulu 11, ‘Muloñadi Nzambi Chetejelayi Makabi?’ Hanyima yakutaña maparakalafu atachi ayedi, yena nimwinikwindi atachikili kwihula malwihu amavulu. Azañaleli nankashi hakuyakwila malwihu ejima kufuma muBayibolu, nawa etejeli kudiza mpinji yejima. Wenowu muzañalu wunatiyili hakutachika kudiza namuntu hetala datachi!”
Hela chochu, bayi neyi muntu wejima nateli kwiteja kutachika kudiza Bayiboluku, nawa bayi neyi ejima atejaña atwalekañahu nakudizaku. Hakwikala akwakukalakala ambala aNzambi, twatwalekañahu nakutachika kudiza nawantu amavulu Bayibolu, muloña tweluka netu Yehova nakukoka antu adi neyi anyikoku kwinza mukuloñesha kwindi henohu kaayi kaSatana kanda akijilumuni.—Yow. 6:44; 1 Kor. 3:9.