Ikalenu Akwakutañisha Izu daNzambi—Kuhitila Mukuzatisha Mabuloshuwa
1, 2. Hakwila nawu tuzati mudimu watwinkawu twatela kwiladi?
1 Kambuña aYehova wejima wadihana wukweti mudimu wakushimwina nikutañisha Izu daNzambi kudi antu amakwawu. Tunateli kumona iwu mudimu netu walema neyi twiluka netu mukwakubadika ñovu mwiwulu nihamaseki diyi watwinka mudimu ‘wakwilisha atumbanji munyuza yejima, . . . nikuyitañisha.’ (Mat. 28:18-20) Dichi, twatela kwikala antañishi hakwila nawu tuzati mumudimu wakushimwina nsañu yayiwahi!—2 Tim. 2:2.
2 Mukakweji kaNovember twatela kuzatisha wuswa wetu wakwiluka kutañisha chachiwahi hakuhana mabuloshuwa. Tunateli kusakulamu yikuma yayiwahi yamuNsona nikutoñojoka hamazu antesha akutukwasha kutachika kuhanjeka nawantu.
3. Tunateli kuhana ñahi buloshuwa “yaAspiritu Awafu”?
3 Neyi himukuhana buloshuwa “yaAspiritu Awafu—Komana Anateli kuKukwasha Hela kuKukatisha?” mwatela kuhosha nenu:
▪ “Mwatoñojokahu dehi hanilu lwihu: Komana Nzambi wahanjekaña nawantu kuhitila muyilota hela yimwenu? [Mulekenu yakuli.] Bayibolu yashimunaña Nzambi chalombolañayi nikudizisha antu makonu. Mwani talenu chahosha mukanda wa 2 Timotewu 3:17.” [Tañenu] Bakulenu hefu 18 dabuloshuwa nawa tañenu parakalafu 4. Mulejenu nyevulu yidi hamafu 30 ni 31 nawa ihulenu ilu lwihu lumwakahanjekahu chimwakafunta cheñi nenu: “Chumanyi chakanayi Nzambi antu amoni niafu?”
4. Yumanyi yakamañawu antuñi netu yinashimunuwu mubuloshuwa “yaNzhila Yaya kuWumi Wahaya Nyaka”?
4 Munateli kuzatisha iyi njila hakuhana buloshuwa yahoshaña nawu “Nzhila Yaya kuWumi Wahaya Nyaka Munayiwani?”:
▪ “Antu amavulu chayikalilaña hakwila nawu eluki muloña waweni wutwahandilaña. Hela chakwila antu antesha diwu ekala namuzañalu wantesha, amavulu muchihandilu chawu mwenzala chineñi nikukabakana. Komana mwatoñojokaña nenu Nzambi wafuukwili nindi tushakameña munjila yamuchidiwu? [Mulekenu yakuli.] Bayibolu yashimuna nawu Nzambi wakeñaña nindi tushakameña mwituña damuchidiwu.” Mukwihihisha hanjekenu hanyevulu yidi hefu 31, kuhiñahu yenu hefu 30, parakalafu 12, nawa lumbululenu yuma yakanayi Nzambi. Ihulenu ilu lwihu lumwakahanjekahu chimwakafunta cheñi nenu: “Tunateli kwiluka ñahi chikupu netu Nzambi wakashikija yikaninu yindi?”
5. Yumanyi yayiwahi yatela kufumamu neyi tuzatisha chachiwahi mabuloshuwa?
5 Twamuzañaleshaña Yehova neyi ‘tumwekesha chitunakuyilaku kumbidi kuhitila mukusha kashinshi kuntañishilu yetu.’ (1 Tim. 4:15, 16) Awa mabuloshuwa etu anateli kutukwasha chikupu hampinji yitunakufwila kukwasha antu adi nampwila yakutiya “nsañu yayiwahi yayuma yayiwahi.”—Isa. 52:7.