Mudimu Watuzañaleshaña Nankashi
1. Mudimwinyi wunakuzatewa makonu?
1 Antu amweni namesu kapu chokileñayi Yesu akata muyaaka nkulakaji yakusambila azañaleli nankashi. (Luka 5:24-26) Makonu, anetu nawa twazañalalaña nankashi hakukalakala mudimu wakukwasha amakwawu kumwiluka Yehova. (Chim. 22:1, 2, 17) Twazañalala hama hakutaña nsañu yamwekeshaña Izu daYehova nispiritu yajila chiyinakuhimpa yihandilu yawantu. Hela chochu, twahetelañamu nankashi hakukalakala iwu mudimu nikulombola kadizi waBayibolu wunakuyilaku hambidi.
2. Indi kudizisha muntu nsañu yalala kwatuzañaleshaña ñahi?
2 Indi Nzambi ijina dindi hinyi? Muloñadi chetejelayi makabi? Indi Wanta waNzambi wakelila antu yumanyi? Hitwatiyaña kuwaha kwakula awa malwihu hohuku, ilaña twatiyaña kwawaha cheñi neyi kadizi nazañalali muloña neluki nsañu yalala. (Yish. 15:23; Luka 24:32) Neyi kadizi nayiluku hambidi, nateli kutachika kuzatisha ijina daYehova, kuhimpa nvwalilu yindi, kuleka yililu yatama, nikutachika kushimwina amakwawu. Neyi yadihana nikupapatishewa, wukwikala mana kwetu nawa mukwakukalakala hamu netu. Yuma yayiwahi yejimiyi yatuzañaleshaña.—1 Tesa. 2:19, 20.
3. Njilanyi jajiwahi jitunateli kuzatisha hakwila tutachiki kudizisha muntu Bayibolu?
3 Komana Munateli Kuzataku Iwu Mudimu? Neyi munakukeña kuzataku iwu mudimu watuzañaleshaña nankashi, lombenu kudi Yehova kulonda yayikwashi mutachiki kulombola kadizi waBayibolu nawa zatenu kwesekeja nayuma yimunakulomba. (1 Yow. 5:14) Shimwinenuña kumaluña kwekala antu nihampinji yimwatela kuyiwana. Mwatela kuleja antu hampinji yejima yatelela chitwadizaña Bayibolu. (Mukwa. 11:6) Neyi muwana muntu wunakukeña kudiza nawa munatumbi mbutu yachalala, funtilenuku nakutukumwina.—1 Kor. 3:6-9.
4. Muloñadi wutwatelela kuleja antu chitwadizaña Bayibolu swayi-swayi?
4 Kuchidi antu amavulu akweti mpwila ninzala yakuloña. Hinyi watela kuyikwasha kwiluka yuma yakuspiritu yakaankilawu kuhitila mukuyidizisha Bayibolu? (Mat. 5:3, 6) Tudihanenu namuchima wumu kulonda tuzati chikupu mudimu wakushimwina nikwilisha atumbanji henohu mudimu wakumuna kanda wukumi.—Isa. 6:8.