Mukanda Kufuma Kwizaza Dalombolaña
Kudi Akwetu aYinsahu jaYehova:
Awa himafuku akuzañalesha! Nawa tudi namuzañalu chikupu! Twatiyaña kuwaha kuzatila hamu nanenu ana kwetu niahela ‘namuchima wumu’ hakushimwina wunsahu chikupu wahoshaña hadi Tata yetu wamwiwulu, Yehova.—Zef. 3:9; Yow. 14:12.
Hela chakwila twamuzatilaña Yehova namuzañalu hichaya mukwila nawu hitwamonaña kukala kwaswejaku. Muchaaka chamudimu chinamani enu amakwawu mwakabakeni hamuloña wanyitentanshi, mabaji, hurricanes, niyuma yikwawu yatama yatumwekenaña muwumi hamuloña wawubanji wadimwekenaña. (Mat. 24:7) Amavulu ayandaña mafuku ejima nanyisoñu yayizeyeshaña niwushinakaji. Wejima wetu twalwishaña ‘nayihuñu’ yinakuswejelaku. (Mat. 24:8) Amana kwetu amavulu ayikasa mutuleya hamuloña wachikuhwelelu chawu mumatuña amavulu adi neyi Armenia, Eritrea, niSouth Korea.—Mat. 24:9.
Chumanyi chatukwashaña kwikala akola hela tunakumona kukala? Nsona yachaaka yamu 2010 yatwanukishaña chuma chimu chasweja kulema: ‘Kukeña kwomikaña yuma yejima. Kukeña hikwakañanyañaku.’ (1 Kor. 13:7, 8) Chalala, kukeña kutwakeña akwetu nikukeña kutwamukeña Yehova kwatukwashaña kuumika.
Antu amavulu aditenaña nawu akwaKristu ahayamaña chitwashimwinaña kwejima chakubula kuleka. Hela chakwila etejaña wanyi yuma yitwakuhwelelamu niyuma yitwatañishaña, amakwawu ahoshaña nawu, “Mwazataña mudimu wutwatela kuzata ninetu.” Chumanyi chaleteshaña aYinsahu jaYehova kutwalekahu kushimwina mafuku ejima? Muloña wakukeña. Kufwana Tata yetu wamwiwulu, hitwakeñaña muntu niwumu yakanoñuku. (2 Pet. 3:9) Kuvula kwakuha kwawakwakushimwina kwakushika ku 7,508,050 kwamuchaaka chamudimu chinamani hiwunsahu wamwekeshaña nawu twakeñaña netu antu ejima abalumuki munyichima. Kwosi nsakililu yidi yejima yikweti antu amavulu adikitaña chikupu mumudimu wakushimwina nakudihana hakukwasha antu amakwawu kuspirituku.
Twazañalalaña hakumona kushikijewa kwawuprofwetu wasonekeliyi Isaya wakwila nawu: ‘Kunyaka yakukuminina antu amba kamona mpidi yetala daYehova yinashimati dehi hewulu damapidi, yakasompoka mpidi janyanya; nyunza yejima yakahwila kwenoku.’ (Isa. 2:2-4) Hakachi kawantu amavulu anakuhwila kwitala daYehova hiyantu akushika ku 294,368 apapatisheweli muchaaka chamudimu chinamani. Tunayitambwili awa antu asweja kulema mukuloñesha kwetu. Kukeña kwetu kwawakwaKristu kutusañumuni kutwalekahu kuyikwasha kulonda adikañi nachilumbu chetu Satana Diyabolu.—1 Pet. 5:8, 9.
Kuvula kwawantu akushika ku 18,706,895 apompeli kuChanukishu haChiyedi haMarch 30, 2010, hiwunsahu wunakumwekesha nawu kuchidi antu amavulu anakukeña kudifukula hamu nanetu kudi Yehova. Tudi namuzañalu hakwiluka netu Yehova wuchidi kanda yajilumuni kanu kaayi katama. Chayinu mpinji kukeña kwatukwashaña kuumika.—2 Tesa. 3:5.
Kupompa kwaNkambi kwadiña namutu wunakwila nawu “Twalekenuhu Kukundama Kwakwihi naYehova” kwamu 2010 kwakolesheli wulunda wetu naTata yetu wamwiwulu, Yehova. Mazu añimbi yamasamu akwila nawu: “Antu akweti Nzambi yawu Yehova anakooleki” alala. (Mas. 144:15) Hichikweti muloña wachuma chikamwekana kumbiduku, twakuhwelela netu Yehova wukatukwasha, hitwatiyaña womaku. (Mas. 23:4) Yehova keña yazatishi Mwanindi kulonda ‘akisañani nyidimu yaDiyabolu.’ (1 Yow. 3:8) Eña, twachiñililaña idi ifuku. Ilaña chayinu mpinji, tukweti nyidimu yayivulu chikupu.—1 Kor. 15:58.
Ilukenu chikupu nenu twayitenaña mukulomba kwetu mpinji yejima ‘chakubula kuleka.’ (Rom. 1:9) ‘Shakamenu mukukeña kwaNzambi, nakutalila luwi lwaMwanta wetu Yesu Kristu lwashika kuwumi wahaya nyaka.’—Yuda 21.
Twayikeña wejima wenu!
Yetu ana kwenu,
Izaza Dalombolaña dawaYinsahu jaYehova