Njila Jakudikiñilamu Kumujimba

Twahetelañamu nankashi neyi twikali awunyonji. Twatela kuhemba mukala wetu hela maluña akudifukwila nawunyonji.—Kuhit. 23:10-14.

Shikilenu matamisha chiwahi: Mumatamisha mwekala tububu twatuvulu. Neyi tububu twaletaña nyisoñu twiñila mumenji, muyakudya hela kumakasa tunateli kwiñila mwivumu nakuleta yikatu. Matamisha awantu atela kuyinatila mumusalanyi. Mwatela kukusula matamisha awatunyama adi kwakwihi namukala. Mwenda muwahisha nyisalanyi mpinji yejima. Mwatela kujika munyisalanyi.

Kwisuka: Mwatela kwisuka mpinji yejima. Kwisuka namulola hela mawuti kwajahaña tububu. Bayi neyi kwisuka namenji dichuma chakeñekaña hohuku, chiña kushiita kumakasa namulola hela namawuti. Chalema nankashi kwisuka hanyima yakuzatisha musalanyi hela hanyima yakukomba mukeki. Mwatela cheñi kwisuka neyi mukwata kanyama, henohu kanda mukwati kuyakudya nihakudyisha anyana. Yidizishenu anyana kwisuka nikubula kuhemena kwakwihi namusalanyi hela kwiluña damajilu. Komana Hetala denu daWanta hekala menji akwisuka hampinji yejima yimunakupompa?

Zatishenu hohu menji atooka: Yisaka hiyavula kukatakataku neyi yizatishaña menji atooka. Menji amumajiya, amutuloña, amumatanki akadi kujika niamumashima mwatela kuyiteleka mwaka dinu muyinwi. Mwatela kubuta hamashima. Mbeketi, nyonji, niyindundu yimwatehwinaña menji mwatela kuyikosa mafuku ejima nikuyitula heluña dadiwahi. Mwatela kuhembela ayimuna kwakulehi neluña dimwatehwinaña menji akunwa. Chikuwaha neyi mbeketi yimwatehwinaña menji akunwa yikala nakapompi. Himwatela kukwata mumenji akunwa namakasa amajiluku.

Hembenu yakudya chiwahi kuchina tububu: Munateli kujaha tububu kuhitila mukuteleka yakudya chiwahi. Tububu twasemununaña chikupu muyakudya yidi neyena. Dichi mwatela kudya yakudya hampinji yimunayiteleki. Neyi munakukeña kuhemba yakudya hadi maora ayedi, mwatela kuyihembela mwiluña ditata hela dituta. Neyi munakukeña kuhemba yakudya kulonda mudyi mpinji yacheñi, mwatela kuyibuta. Kwila mwenimu mukukiña yakudya kudi anjinji nitububu. Henohu kanda mudyi yakudya mwatela kuyitatishaku. Kosenu nyikabu nimafu namenji atooka. Chumichi chalema neyi munakwinka anyikeki hela anyana anyanya yakudya yabulañawu kuteleka.

Kunata majilu ejima adi hamukala: Njinji, mpenji nianyilonda njanji, ekala natububu. Yileñaleña yeniyi yatiyaña kuwaha kuhemena hamajilu. Neyi himukweti mwakwinka majiluku, mwatela kuyinatila mwibuku mumwatela kuyishikila hela kuyocha mafuku ejima. Hembenuña mukala wenu nawunyonji nawa chakadi nswadi nimenji amajilu.

Neyi muzatishaña iji njila mpinji yejima, mukudikiña kumujimba hamu nichisaka chenu.