Tumali Twanyanya Tuyedi

Njila yimu yalema yitwakwashilañamu mudimu waWanta yekala yakuhana mali kumudimu wakushimwina wamukaayi kejima. Tunateli kwiladi neyi chakwila hitukweti mali amavuluku?

Mpinji yimu, Yesu wamweni nfwila wakazweñi nakuumbila tumali twanyanya tuyedi muchikasha chamali hatembeli. Kumukeña kwamukeñeliyi Yehova kwamuleñeleleli kuhana “yakuwuzweñi windi yoyindi yejima yadiñi yakudihandisha nachu.” (Maku 12:41-44) Chineli Yesu wahosheli hachumichi, chamwekeshaña nawu Nzambi walemesheli chawaana chanona mumbanda. AkwaKristu amuyaaka nkulakaji yakusambila niwena amweneña nawu kuhana hichuma chalema. Dichi akwaKristu atuzweñi niasamaheta ahanineña yuma kwesekana nahakuminini ñovu jawu. Kapostolu Pawulu washimwini chakutalilahu chawakwaMasidoniya ahanineña hela chakwila ‘aswejeli wuzweñi atwalekeluhu nakulembelela kwakweni nawu ahani yawaana.’—2 Kor. 8:1-4.

Dichi neyi tukuhana “tumali twanyanya tuyedi” hohu, twatela kwanuka netu neyi antu amavulu ahana yawaana yantesha yavulaña neyi tuyibomba hamu. Neyi tuhanaña chakufuma hamuchima tukumuzañalesha Tata yetu wamwiwulu yomweni wahanaña, muloña ‘Nzambi wakeña muntu wahanaña namuzañalu.’—2 Kor. 9:7.