Chikasha Chalwihu

◼ Twatela kudiza maora añahi mpinji yejima yitunakudiza nakadizi waBayibolu?

Hiyatanjika kuleha kwampinji yakudiza mpinji yejima yitunakudiza nakadizi waBayiboluku. Hela chochu, neyi tushinshika wuswa niyuma yinakaankiluwu atudizi etu nichitunakukeña netu ayiluku hambidi kuspiritu, yumiyi yikutuleñela kudiza nsañu yayivulu. Tunakukeña netu eluki nikutiyishisha yuma yinakudizawu kulonda afwileña kuyizatisha. Muchaaka cha 2005 twatambwilili mukanda waChumanyi Chacheni Chatañishaña Bayibolu? Iwu mukanda wunateli kumana mukapinji kantesha, nawa ‘antu afuukwilawu dehi’ anateli kudiza nsañu yayivulu kuhitila mukudiza iwu mukanda kulonda adihani nikupapatishewa.—Yil. 13:48.

Bayi neyi atudizi ejima ayilañaku hambidi munjila yoyimuku. Amakwawu asha maana chikupu kuyuma yakuspiritu nikutiya swayi yuma yinakudizawu kubadika amakwawu. Amakwawu akweti nyidimu yayivulu. Mpinji yikwawu mwatela kudiza mapampa kakavulu hakwila mumanishi tupetulu tukwawu. Hakwila twili mwenimu twatela kuzatisha kashinshi.

Tunakuhameka hakumona neyi akwakushimwina amavulu alombolaña atudizi amavulu kakweji nikakweji. Hamuloña wakwikala nawatudizi amavulu, hadaha twadizaña hohu jiminiti jantesha namuntu wumu nakunyakala kuya kudi kadizi mukwawu. Chumichi chinateli kukwasha ñahi antu itwadizaña nawu kuyilaku hambidi? Fwikijenu chekala kesi. Hakwila mubutuli kesi, mwatela kuzata nañovu. Hela chochu, neyi muleka kusonsela hejiku, kesi kakutachika kujima chovu-chovu nawa himukutwesha kutelekelahuku. Chochimu, kudiza hakapinji kantesha kunateli kutukwasha, hanu dinu tunakuzatisha mpinji yeneni hakukwasha atudizi etu ejima kutiyishisha nsañu, kuyesekeja nansañu yelukawu dehi nikutoñojoka chatela kuzatishawu yuma yinakudizawu?—be-CW ifu 60 mapara. 1-3.

Kwesekeja nachidi yuma niwuswa wakadizi wakwiluka yuma swayi, tupetulu twatuvulu twapela chakwila munateli kudiza kapetulu kejima muora yimu hela kubadikahu chakubula kuhitamu swañu-swañu. Atudizi akuyilaku hambidi chiwahi neyi kadizi nintañishi abulaña kujiñujoka mulungu nimulungu nikuzatisha mpinji yeneni nakutoñojoka hansañu yinakudizawu.

Komana twatela kukwasha atudizi etu amavulu kuyilaku hambidi kuspiritu? Neyi tuzatishaña chiwahi mpinji yetu ninyikanda yetu, tukwikala namuzañalu wakupapatisha atumbanji amavulu “mafuku ejima nikwakakumina nyaka.”—Mat. 28:20.