Chikasha Chalwihu
◼ Indi atulama anateli kukwasha ñahi anvwali hakukwasha anyanawu kulonda adihembi chiwahi hampinji yakupompa?
Anyana ekala nañovu nawa hiyakeñaña kushakama hadi mpinji yayilehuku. Neyi kupompa kunamani, anyana ekalaña nañovu yinateli kuyileñela kutemoka nikukupisha akwawu atwansi Hetala daWanta hela kumaluña amakwawu akupompela, hakwimikila nyotoka hela mutunjila. Hela chochu, ichi chishimu chalala chakwila nawu: ‘Mwana wakuleka tuhu chochina watiyishaña nvwali yindi nsonyi.’—Yish. 29:15.
Chawushona, amana kwetu niaheletu atushinakaji ayikatishahu dehi muloña wakuyihinuna kudi anyana atemukileña. Chumichi chaleñela atushinakaji kukabakenamu chamukunkulwayi nawa anvwali jawu nichipompelu chazatishaña mali abula kukeñeka kuzatisha. Hakwila abuli kudikatisha hela kukatisha akwawu, anvwali hiyatela kwiteja anyana kukidimokelaña Mwitala daWanta hela hanjuku.
Anvwali ayinka mudimu wasonekawu muNsona nawu adizisheña anyanawu kulonda alemesheña chikupu maluñetu akudifukwila. (Mukwa. 5:1a) Hakupompa kwetu kwawakwaKristu, chidi neyi kupompa kwamaneni nikwankambi, atulama ayinkaña mudimu wakwiluka chikupu nawu ‘yuma yejima anayili mukutelela’ nawa ‘choloka.’ (1 Kor. 14:40; Kol. 2:5) Atela kwikala asoñama nakutala hanji nimukachi henohu kupompa kanda, hampinji yakupompa nihanyima yakupompa. Neyi mwana nakukidimoka hela hanakudihembaku, kalama nateli kumulekesha nikumulumbulwila chatamina yililu yamuchidowu. Anvwali jamwana atela kuyileja chiwahi hakukala kwenoku nikuyileja nawu atela kumutala mwana. Anvwali atela kuzatilahu swayi-swayi.
Kafwampi, mpinji jikwawu akemba hela nyana anyanya adilaña hela kuluwañesha hampinji yakupompa. Atulama atela kushikañahu dehi henohu kunashali jiminiti 20 nakutachika kupompa hakwila ahembi yitwamu yakunyima kulonda anvwali akukeña kushakama nawanyanawu ashakamuhu. Etu amakwawu twatela kwiteja kushakama kuyitwamu yakumbidi.
Neyi mwana nakuluwañesha, anvwali atela kuzatilahu. Neyi anvwali kuzatilahu nehi nawa mwana natwalekuhu kuluwañesha antu, kalama nateli kuleja nvwali chiwahi kulonda amwidishi mwana hanji. Neyi tutambika antu akweti anyana anyanya kukupompa, twatela kushakama nawu nikuyikwashaku kutala anyana neyi adila hela neyi anakuluwañesha antu.
Twazañalalaña hakumona anyana akweti yaaka yambokamboka Hetala daWanta niyililu yawu yayiwahi mwitala daNzambi. (1 Tim. 3:15) Kuhitila mukulemesha ntanjikilu yaYehova yakudifukula, amulemeshaña Nzambi nawa ayihamekaña kudi antu ejima muchipompelu.