‘Shimwinenu Chikupu Wunsahu’
1. Chakutalilahwinyi chachiwahi chemikiliyi Pawulu mumudimu wakushimwina?
1 ‘Kalakalenu mudimu wenu . . . chikupu.’ (2 Tim. 4:5) Chakadi nikujina kapostolu Pawulu wadiña nachilenji chitooka hampinji yamulejeleñayi Timotewu iyi nsañu. Kafwampi Pawulu wadiña wenda dehi njila jisatu jawumishonali hakachi kachaaka cha 47 na 56 C.E. Mukanda waYililu washimuna kakavulu nawu Pawulu ‘washimwinineña chikupu wunsahu.’ (Yil. 23:11; 28:23) Tunateli kwila ñahi mwenimu makonu?
2. Tunateli kushimwina ñahi chikupu wunsahu kwitala nikwitala?
2 Kwitala niKwitala: Hamuloña wakukeña kuwana enimatala abulahu dehi kutiya nsañu yayiwahi, tunateli kuyendela hampinji yikwawu. Mwiniitala nateli kwikala hetala nampinji yamelela hela kunsa yamulungu. Twatela kufwila kuhanjeka namuntu hamatala ejima nikufuntila-funtila kudi antu itwabulaña kuwana hamatala. Chumanyi chimwatela kwila neyi mukañanya kuhanjeka namuntu? Hadaha mukufuma yuma yayiwahi neyi muhanjeka nindi hanshiña hela mumusonekela mukanda.
3. Kukoolekanyi kumukweti kwakushimwina hatooka niwunsahu wakukoolekela?
3 Kushimwina Hatooka niWunsahu Wakukoolekela: Ambuña Yehova makonu ashimwinaña ‘maana alala’ kudi antu ejima atiyililaña. Mpinji yikwawu ashimwinaña “mumukwakwa” hela ‘hanzi yanyikala.’ (Yish. 1:20, 21) Neyi tunakuzata nyidimu yetu yamafuku ejima, komana twashañaku maana kulonda tushimwineña? Komana tunateli kuhosha netu ‘twadikitaña chikupu nezu’? (Yil. 18:5) Neyi dichitwelaña, twakalakalaña mudimu wetu ‘wakushimwina chikupu wunsahu.’—Yil. 10:42; 17:17; 20:20, 21, 24.
4. Indi kulomba nikutoñojoka chikupu kukutukwasha ñahi kushimwina chikupu wunsahu?
4 Mpinji yikwawu tunateli kushintajala kushimwina muloña wansonyi hela kuzeyazeya. Hela chochu, Yehova weluka kuzeyazeya kwetu. (Mas. 103:14) Hela chochu, neyi tumona kukala kwamuchidiwu, tunateli kumulomba kulonda twikali nañovu yakuhosha. (Yil. 4:29, 31) Cheñi nawa, neyi tunakudiza nkawetu hela tunakutoñojoka chikupu Hezu daNzambi, tunateli kusha maana hakulemesha nsañu yayiwahi yabadika kulema. (Fwi. 3:8) Chumichi chikutusañumuna kushimwina nsañu yayiwahi neyena.
5. Tunateli kwiladi hakwila nawu tuzatuku mudimu washikijaña wuprofwetu waYoweli?
5 Wuprofwetu waYoweli washimwineñahu dehi nawu henohu ifuku deneni daYehova kanda dishiki, antu jaNzambi ‘akatwalekahu’ kushimwina nawa hiyaketeja chuma chidi chejima kuyikañesha kushimwinaku. (Yoweli 2:2, 7-9) Komana wejima wetu tushuku maana hakukalakala iwu mudimu wakushimwina wutwakabula kuzata cheñi.