Kuvwala Chalumbuluka Kwamulemeshaña Nzambi
1. Muloñadi wutwatela kushila maana kunmwekenu yetu?
1 Chineli twekala akwaKristu, antu atutalaña mafuku ejima. (1 Kor. 4:9) Tunateli kumwekesha netu twamwakamaña Nzambi nawa twalemesha yuma yakuspiritu yatuloñeshelañayi Yehova kuhitila munvwalilu yetu nikudiwahisha.—Mas. 116:12, 17.
2. Indi nvwalilu yawakwaKristu yambukaku ñahi nanvwalilu yavula mukaayi?
2 Yakuvwala yaWunyonji Nawa Yatelela: Nmwekenu yetu yatela kwendela hamu nanshimbi yaNzambi yetu wawunyoji nawa welaña yuma mukutelela. (1 Kor. 14:33; 2 Kor. 7:1) Twatela kwikala awunyonji kutachikila kunsuki nikumazala nawa twatela kudiwahisha chiwahi. Antu makonu avula kudiwahisha munjila yatama. Hela chochu, mukwaKristu hatela kuhemba nsuki neyi chahembañawu akwakwimba tumina hela akwakuhema yiselaku. Neyi tulondela mafashoni, chikuyikalila antu kwiluka chaambu chekala hakachi kawantu amukalakelaña Nzambi walala niabulaña kumukalakela.—Mal. 3:18.
3. Nsonanyi yatela kutukwasha kutoñojoka chiwahi hanvwalilu yetu?
3 Yakuvwala Yatelela Ankalakali akwaKristu: Kapostolu Pawulu chamusonekeleliyi eluda mukwaKristu Timotewu, wayikolesheli ‘ambanda kudiwahisha nakuvwala mahina chalumbuluka, nansonyi nikuwundisha mumesu; . . . munjila yatelela ambanda adishimunaña nawu amwakamaña Nzambi.’ (1 Tim. 2:9, 10) Iku kufumba kwakundama nikudi amayala. Twatela kutoñojoka chiwahi hakwila tuvwali yakuvwala yalumbuluka. Yakuvwala yatela kwikala yayiwahi, yawunyonji nawa yatelela, bayi yasweja kutamuka hela yakusañumuna wuvumbuku.—1 Pet. 3:3.
4, 5. Yumanyi yitwatela kwanuka neyi tunakutonda yakuvwala?
4 Hakwila tuvwali chalumbuluka twatela kulanda yakuvwala yalumbuluka. Chalema kweseka muyakuvwala kulonda twiluki neyi yinateleli nawa twatela kutonda yakuvwala yabula kukwata chikupu hela yabulaña kumwekesha mujimba. Yakuvwala yetu yekala neyi masipika. Kuvwala yakuvwala yakwata chikupu hela yakuvwala yamwekeshaña chekala mujimba niyiidi yamujimba, chidi neyi ‘kuvumisha volyumu’ nankashi. Komana neyi twila mwenimu tukutiyisha amakwawu kutama wanyi? Chumichi chikumwekesha wanyi nawu tunakulombolewa nayililu yatama yamukaayi?
5 Etu amavulu twavwalaña yakuvwala yankombu hela yayiha. Hitwatela kutoñojoka hohu netu tunawani yakuvwala nawa yapela wuseyaku. Chakeñekaña mpinji hakwila nawu tukeñi yakuvwala yashikila hamujimba, yabula kusonekawu nawa yabulaña kutiyakesha yililu yamukaayi. Hela chochu, Yehova niana kwetu akutiya kuwaha chitwela mwenimu.—1 Kor. 10:31.
6. Nkiswinyi yekala mukuvwala chalumbuluka nikudiwahisha?
6 Neyi chochamwekanaña muntu chiwahi kumesu neyi yamwemweta, kuvwala chalumbuluka nikudiwahisha kwalemeshaña nsañu yitwashimwinaña nikuloñesha kutwekalamu. Antu atumonaña mumudimu wetu wakushimwina, hampinji yitwayaña kukupompa hela hanyikala yetu, anateli kwihula chitwambukilaku nawantu amakwawu nawa anateli kwila nawu: ‘Tuyi nenu, muloña tunatiyi nawu [nikumona netu] Nzambi wudi nanenu.’ (Zek. 8:23) Komana wejima wetu tumulemeshenuña Yehova kuhitila munvwalilu yetu nikudiwahisha.