Sonekeshenu Nyikanda Yimunakukeña

Hadaha munashimwini nikutañisha antu nsañu yalala yaMwizu daNzambi hayaaka yayivulu, kuzatisha nyikanda yamwidimi datiyañawu antu amavulu dabula kwikala idimi denu hela idimi dawantu akweti mpwila imwawanaña. Tweluka netu twadizaña yuma yayivulu swayi-swayi nikutiyisha chikupu neyi anakutudizisha mwidimi detu. Muloña wachumichi, kudi kuzata nañovu hakutuntulula nikupulinta nyikanda nawa nyikanda yeniyi yidi mumadimi amavulu chikupu kubadika chichadiña kunyima. Komana mwadiwulaña kusonekesha nyikanda yikwawu yamwidimi denu hanyikanda yedika katataka hakupompa kwankambi? Komana mwasonekeshaña nyikanda yimunakukeña yinateli kuyikwasha kuzata chiwahi mwiluña denu dakushimwina? Heshina hadi nyikanda yayivulu yedika katataka muLunda:

◻ Nsañu Yayiwahi Yinafumi Kudi Nzambi

◻ Anyi Anakwila Mwaya Muchima waYehova Makonu?

◻ Mutiyililenu Nzambi

◻ Mutiyililenu Nzambi Kulonda Mwakahandi Haya Nyaka

Kuhemba Nyikanda: Hadaha antu amwiluña denu ahoshaña madimi ashiyashana ilaña azatishaña idimi dimu hohu delukawu antu amavulu hakuhanjeka. Hampinji yimunakushimwina, munateli kuwana antu, yisaka hela antu antesha ashakamaña hamu ahoshaña idimi dacheñi neyi adi hetala hela idimi dahoshañawu antu munodu iluña. Komana munakeñakeñi kulonda mwiluki neyi nyikanda yetu yidi kwoku munodu idimi? Yipompelu yatela kuhemba nyikanda yantesha yekala munodu idimi yidi neyi matilakiti, mabuloshuwa akatataka nimukanda waChatañishaña Bayibolu. Akwakushimwina atela kuhana iyi nyikanda neyi awana antu ahoshaña odu idimi.

Chakusonekesha Nyikanda: Neyi chipompelu chahembahu wanyi nyikanda mwidimi dahoshaña muntu wukweti mpwila, munateli kuwana ñahi nyikanda yidi munodu idimi? Mukwakushimwina watela kuya kudi nkoñi wanyikanda hakwila yeluki nyikanda yidi munodu idimi kulonda yasonekeshi yinakukeñayi neyi chipompelu hichikusonekesha nyikanda.

Tuzatishenu chiwahi nyikanda yawakwaKristu kulonda tukwashi ‘antu ejima eluki nsañu yalala chikupu kulonda akahandi,’ hichikweti muloña nedimi dahoshañawuku.—1 Tim. 2:3, 4.