Komana ‘Ashimata niKukola muChikuhwelelu’?
Muloñadi nyitondu yayivulu chiyekalila nanyiji? Nyiji yakoleshaña mutondu. Yakokaña menji niwushi hamaseki. Nyiji yikwawu yamenaña cheñi nakwikala nyitondu yayiha. Komana tunateli kwesekeja atudizi etu aBayibolu nanyitondu yakulaña? Eña. Twakalakalaña hamu naNzambi mumudimu wakutumba mbutu yaWanta nikuyitukumwina. Yehova wakalakalaña mudimu windi kuhitila ‘mukuyikulisha.’—1 Kor. 3:6.
Neyi chochakeñekaña mutondu wunakukula kwikala nanyiji yakola, chikuwaha neyi antu amaha ekala nachikuku chachiwahi muchalala. Atela kwikala ‘nanyiji’ nawa ‘ashimata’ mudi Kristu ‘nikukola muchikuhwelelu’ kulonda omiki kukala kukumonawu. (Kol. 2:6, 7; 2 Tim. 3:12; 1 Pet. 5:8, 9) Kubombelahu, hakwila atañishi antu amakwawu chiwahi, atela ‘kwiluka nsañu yalala chikupu.’ (1 Tim. 2:4) Kafwampi mukanda waChatañishaña Bayibolu wakwashaña atudizi kwiluka ntañishilu yalema yamuBayibolu, ilaña mukanda waKukeña kwaNzambi wayikwashaña kutoñojoka hayishina nihanshimbi jaNzambi. Iwu mukanda awusoneka kulonda wutukwasheña kuhanjeka chakubula kuhita mumbadi nawatudizi anakuyilaku hambidi kutalisha hayuma yidi neyi nvwalilu nikudiwahisha, wunyonji wakumujimba, yisela niantu akudikunda nawu.—lv mafu 50-73.
Atudizi aBayibolu amakwawu ayilañaku hambidi swayi-swayi nawa apapatishewaña chakubula kuumba mpinji hanyima yakumanisha mukanda waChatañishaña Bayibolu. Komana twalekaña kukwasha awa antu anakukulilaku? Inehi. Twalekenuhu kudiza nakadizi waBayibolu wunakuyilaku hambidi sampu namanishi nyikanda yiyedi, Chumanyi Chacheni Chatañishaña Bayibolu? ‘niShakamenu muKukeña kwaNzambi.’—Talenu Mudimu Wetu waWanta waMarch 2009, ifu 2.
Nyiji yamutondu yamwekanaña wanyi ilaña yalema nankashi muloña yaleñelaña mutondu kushimata nikwikala nayuma yejima yakeñekaña. Chochimu, chakutalilahu chaKristu nintañishilu yindi yakwashaña antu akweti mpwila, hakusambila yamwekanaña wanyi nawa yashimataña munyichima nimuyitoñojoka yawu. Dichi mukuhita kwampinji yashimataña nakuyikolesha. Etejaña iyi ntañishilu kulombola yitoñojoka yawu, yuma yelañawu niyafuukulañawu nawa yayisañumunaña kudihana kudi Yehova nikutwalekahu kwikala muchalala. Chumichi chatuzañaleshaña hama.—1 Pet. 2:21; 3 Yow. 4.