Imbujolenu Atuprofwetu—Hoseya
1. Lwihwinyi lumwadihulahu dehi enu aweni?
1 ‘Nyilambwinyi yinadikeñelaña kumulambula Yehova?’ Hadaha mwadihulahu dehi ilu lwihu hanyima yakutoñojoka chikupu hayuma yayiwahi yayivulu yayikoñelayi niluwi lwindi. (Mas. 103:2-4; 116:12) Hoseya mukudikeñela welili chuma chamulejeliyi Yehova nindi yeli, hela chakwila wateleleli kudihana hakwila yeli mwenimu. Tunateli kumwimbujola ñahi Hoseya?
2. Tunateli kwimbujola ñahi chakutalilahu chachiwahi chaHoseya chakutwalekahu kushimwina?
2 Shimwinenuña niHampinji Yinabuli Kuwaha: Mazu aHoseya ahosheleña nankashi hawanta wanyitaña ikumi wawaIsarela, kwashalili tuhu chantesha antu muniwu wanta nakuleka kudifukula kwalala. Mwanta Yerobowami Wamuchiyedi wakoñeleña yuma yatama kumesu aYehova nawa watwalekeluhu kudifukula kudi mukishi kwadifukwileñayi Yerobowami Watachi. (2 Anya. 14:23, 24) Anyanta aswanini hetanda niwena alekeli kudifukula kwalala neyi chelili wanta wanyitaña ikumi sampu nimpinji yawujilumwinuwu mu 740 B.C.E. Hela chakwila, mwituña mwadiña kudifukula kwakutwamba, Hoseya wazatili mudimu wawuprofwetu nakashinshi hadi yaaka 59. Komana ninetu twafwilaña kutwalekahu nakushimwina chaaka nichaaka hela chakwila anakutudiwula hela anakutudimbulula?—2 Tim. 4:2.
3. Chuma cheliliyi Hoseya chamwekesheli ñahi luwi lwaYehova?
3 Shinshikenuña haLuwi lwaYehova: Yehova wamulejeli Hoseya nindi ‘yasumbuli mumbanda wawuvumbi.’ (Hos. 1:2) Hela chakwila ñodindi Gomeri wamuvweleli mwana weyala, chimwahitili mpinji wavweli cheñi anyana ayedi awujila. Hoseya chamwanakeneniyi ñodindi chakufuma hamuchima chamwekeshaña Yehova chaswejayi luwi hampinji yanakeneniyi aIsarela chabalumukiluwu munyichima. (Hos. 3:1; Rom. 9:22-26) Komana tunateli kushiya yuma yitwakeña kulonda tutiyakeshi luwi lwaYehova kudi antu ejima?—1 Kor. 9:19-23.
4. Yumanyi yitwatela kushiya hakwila tumukalakeli Yehova?
4 Ambuña Yehova amakwawu ashiya nyidimu yayiwahi yakumujimba kulonda ekali nampinji yeneni yakuzata mumudimu wakushimwina. Amakwawu ashakamaña wujiki hela chakadi kukwata kuñoji kulonda atwamijuku nyidimu yaWanta. Neyi tutoñojoka hachihandilu chaHoseya, tunateli kuhosha netu ‘Hinatweshi kwila yuma yeliliyuku.’ Hela chochu, chitwasweja kwiluka chikupu luwi lwaYehova nikushindamena haspiritu yindi yajila kulonda yitukoleshi, nateli kutuzatisha munyidimu yabadika neyi chamuzatishiliyi Hoseya.—Mat. 19:26; Fwi. 2:13.