Chakuloñesha Ntachikilu Yayiwahi
1. Indi ntachikilu yayiwahi yatukwashaña ñahi?
1 Muntu neyi yatiya ivumba dadiwahi dayakudya, wekalaña nachipepa chakudya, chochimu, ntachikilu yayiwahi niyena yatukwashaña kuhanjeka chiwahi namwiniitala nsañu yamuNsona. Hakutachika kuhanjeka namuntu tunateli kuhosha mazu amavulu hela antesha, neyi chochelañawu hakuteleka yakudya yayiwahi, twatela kutoñojokahu nikuloñeshela chadimu. (Yish. 15:28) Tukwila ñahi kulonda ntachikilu yetu yiwahi?
2. Tunateli kuloñesha ñahi ntachikilu yayiwahi?
2 Tondenu Nsañu Yikuyizañalesha: Ntachikilu yetu yatela kuzañalesha mwiniitala, neyi nehi mwiniitala wukukaana. Dichi neyi himukuloñesha, toñojokenu hayuma yakeñawu antu mwiluña denu. Komana antu amwiluña denu anakukeña kwikala nanfulumendi yayiwahi, chisaka chamuzañalu, indi kwiji anakukeña nawu njita yimani? Antu akeñaña kushimuna yuma yinakutoñojokawu, dichi mwatela kuloñesha lwihu lukusañumuna yitoñojoka yawu. Kwila muzatisha ntachikilu yapela yidi muMudimu Wetu waWanta kulonda muyesekeji nayuma yinakumwekana mwiluña denu nehi? Kwila muzatisha mpinji yaKudifukula kwaChisaka kwamelela kulonda muhitulukeña muniyi ntachikilu nehi?
3. Tunateli kuhimpa ñahi ntachikilu yetu kulonda yesekani hamu nachisemwa niyitachi yawantu adi mwiluña detu?
3 Ilukenu Chisemwa niYitachi yaWantu: Kumaluña amakwawu, antu akeñaña kwiluka swayi nsañu yitunendeli. Kukwawu neyi mwenyi kumwimusha mwiniitala hela kudishimuna yomweni nehi, mwiniitala wukutoñojoka nindi mudi nakasawuntu. Kumaluña amakwawu, tunateli kuhosha hansañu yamuBayibolu muntachikilu yetu neyi antu itunawani etiya. (Yil. 2:14-17) Hela chochu, kumaluña kudi antu abula kwikala munsakililu yawakwaKristu, hela abula kwikala munsakililu yidi yejima, mwatela kuhosha hohu hansañu yamuBayibolu hakufuntilaku bayi hakusambilaku.—Yil. 17:22-31.
4. Twatela kwiladi hakuhosha mazu akutachikilahu?
4 Mazu Akutachikilahu: Toñojokenu chachiwahi hamazu imukutachika kuhosha. Chikuwaha neyi mukuhosha hohu mazu antesha, apela. Twatela cheñi kwiluka njila yitukuhoshelamu mazu akutachikilahu. Hoshenuña neyena. Tumbenu chimwemweta kulonda mwiniitala yeluki nindi mwamukeña. Neyi mulondela njila jeniji jikuyikwasha kuloñesha ntachikilu yayiwahi yikuleta ikoku nakusañumuna antu adi mwiluña denu kulonda adyeña ‘kumesa yaYehova.’—1 Kor. 10:21.