“Tumulambulenu Nzambi Mulambu Wakumuhameka Mafuku Ejima.”
1. Indi akwaKristu akusambila amweneña ñahi kupompa kwachipompelu?
1 Kupompa kwawakwaKristu kwashimwiniyi Pawulu ha 1 Akorinda 14:26-33 kwatukwashaña kwiluka chalombweleñawu kupompa munkulakaji yakusambila. Nkuluñaña wumu wadiza Bayibolu wahosheli hanawa mavasi nindi: “Chuma chelukewa nankashi kutalisha hakupompa kwaChaachi yakushankulu chadiña chakwila nawu muntu wejima wenjileña kukupompa watoñojokeleña nindi wadiña nakukooleka nimudimu wakwakulahu. Iyala hayileña namuchima wakutiyilila nikutambwila hohuku; ilaña nikuhana.” AkwaKristu akusambila amweneña kupompa nawu diyi mpinji yakumwekeshelamu chikuhwelelu chawu.—Rom. 10:10.
2. (a) Chumanyi chaleñelaña kupompa kwikaleña kwakukolesha nankashi nawa muloñadi? (b) Yumanyi yitwatela kwila kulonda twakuleñahu chiwahi hakupompa?
2 Kumwekesha chikuhwelelu chetu hakupompa ‘kwakoleshaña chipompelu’ nankashi. Munateli kwiteja nenu hela hanahiti yaaka yayivulu kufuma himwatachikili kupompa, twazañalalaña hakutiya chakulañawu amana kwetu niahela. Twazañalalaña neyi kashinakaji yakulahu, akwetu akwakwitiya ashinshika; nawa twakolelañaku neyi eluda wakamenaña yahosha mazu akukolesha nawa twadimwemwetelaña neyi mwana wanyanya yakula nakumwekesha chamukeñayi Yehova. Wejima wetu tukuleñela kupompa kwawakwaKristu kwikaleña kwakukolesha neyi twakulañahu hakupompa.
3. (a) Chumanyi chitwatela kudizila kudi Mosi niYeremiya? (b) Indi kulomba kunateli kutukwasha ñahi kulonda twakuleñahu?
3 Antu atiyaña woma chayikalilaña kwakulahu. Neyi mudi nawoma, mwatela kwanuka nenu kwadiña antu amakwawu adiña naniku kukala. Niambuña aNzambi ashinshika adi neyi Mosi niYeremiya ahosheli nawu hiyakutwesha kuhosha kudi antuku. (Kwi. 4:10; Yere. 1:6) Neyi chochakwashiliyi Yehova ambuñindi akunyima kulonda amuhameki hamesu awantu, Nzambi wukuyikwasha kulonda mumulambuleña mulambu wakumuhameka. (Tañenu Aheberu 13:15.) Munateli kutambwila ñahi wukwashu waYehova kulonda mumanishi woma wumwatiyaña hakwakulahu? Chatachi, mwatela kuloñesha chiwahi nsañu yimukadiza hakupompa. Kuhiñahu, henohu kanda muyi Kwitala daWanta, lombenu kudi Yehova nawa mulejenu yayinki ñovu yakwakulahu. (Fwi. 4:6) Munateli kukuhwelela nenu Yehova wukutiya kulomba kwenu, muloña munakulomba “chuma chamwaya muchima windi.”—1 Yow. 5:14; Yish. 15:29.