Chitunateli Kulombola Chiwahi Atudizi aBayibolu
1. Mudimwinyi wukwetiwu akwakushimwina alombolaña atudizi aBayibolu?
1 Kwosi muntu wunateli kumukalakela Nzambi chakadi Yehova “kumukoka.” (Yow. 6:44) Hela chochu, akwakushimwina alombolaña atudizi aBayibolu atela kuzata nañovu kulonda akwashi antu kukundama kwakwihi naTata yawu wamwiwulu. (Yak. 4:8) Atela kuloñesha chiwahi. Atudizi akutwesha wanyi kwiluka nsañu nikupama neyi chakwila tukukuminaña dakutaña maparagilafu nikwihula malwihu akusonekela chadimu.
2. Chumanyi chikufumamu neyi mudizisha chiwahi atudizi?
2 Hakwila akwakushimwina alomboli chiwahi atudizi, atela kuyikwasha (1) kutiyisha yuma yatañishaña Bayibolu, (2) kwiteja yuma yatañishaña Bayibolu, (3) nikuzatisha yuma yatañishaña Bayibolu. (Yow. 3:16; 17:3; Yak. 2:26) Hanateli kuhita tukweji hakwila tudizishi muntu yuma yejimiyi. Hela chochu, iyi yikuma yinakwimenaku chipimu hanashiki wubwambu windi naYehova nawa watela kudihana kudi yena.
3. Muloñadi antañishi akuluka yitembi chehwilañawu malwihu aleteshaña muntu kutoñojoka?
3 Yumanyi Yinakutoñojokayi Kadizi waBayibolu?: Hakwila twiluki netu kadizi wetu waBayibolu nakutiyisha nikwiteja yuma yinakudizayi, bayi tusweja kuhosha hoshaku, ilaña twatela kumwinka mpinji yakuhosha. (Yak. 1:19) Komana natiyishi yuma yahoshaña Bayibolu hanoyu nsañu yinakudizayi? Nateli kulumbulula nsañu yinakudizayi mumazwindi? Nakutoñojoka nindidi hansañu yinadiziyi? Nakuhweleli nindi yuma yatañishaña Bayibolu yalala? (1 Tesa. 2:13) Neluki nindi yuma yinakudizayi yinateli kuhimpa chihandilu chindi? (Kol. 3:10) Neyi tunakukeña kuwana ñakwilu yanawa malwihu, twatela kwihula mukubabala malwihu aleteshaña muntu kutoñojoka, nawa twatela kutiyilila.—Mat. 6:13-16.
4. Chumanyi chitwatela kwila neyi kadizi chinamukalili kutiyisha hela kuzatisha nsañu yinakumudizishawu muBayibolu?
4 Hahitaña mpinji yeneni hakwila muntu yaleki yaaku niyitoñojoka yatama yekala mumuchima windi. (2 Kor. 10:5) Twatela kwiladi neyi kadizi wetu nakaani kwiteja hela kuzatisha nsañu yitunakumudizisha? Twatela kudiwunjika hakwila Izu daNzambi nispiritu yajila yovwahishi muchima windi. (1 Kor. 3:6, 7; Heb. 4:12) Chatela tumukanjikiji, twatela kutwalekahu kuhanjeka nsañu yikwawu neyi chakwila kadizi chinamukalili kutiyisha hela kuzatisha nsañu yatañishaña Bayibolu. Neyi tudiwunjika nikutwalekahu kumudizisha muBayibolu, mukuhita kwampinji watela kuhimpa.