Kuwahisha Njila Jetu Jakushimwinamu—Kushimwina Mwiluña daChipompelu Mudi Antu Amavulu

Chikwalemena: Antu adi nanyidimu yayivulu nawa ekalaña wanyi hamatala namwaana. Yipompelu ayileja kushimwina kudi antu amavulu kuzatisha jimesa ningolofwana yanyikanda yakukokola nachu antu anakuhita. Mwatela kulomba iyi yozelu kukasanji kamutayi. Chipompelu chatela kuloñolola maposita mumadimi ashiyashana ha JW.ORG. Komana mwashimwinaña kuzatisha iyi njila?

Chakwila:

Mwatela kuzatisha jimesa ningolofwana yanyikanda mumaluña munakuhita antu amavulu mwiluña dachipompelu neyi anayileji kudi kometi yamudimu yachipompelu.
Mwatela kutenteka nyikanda heluña dimu, mafuku wowamu nimpinji yoyimu mumulungu. Neyi antu akumonaña munatenteki nyikanda, akwinzaña nakuyihula hela nakutambula nyikanda.
Ikalenu akasunuka nawa aseha nawantu. Tumbenu chimwemweta. Neyi muntu nakutala hanyikanda, mukwakushimwina wumu watela kuhanjeka nindi, hadaha wukuhosha nindi, “Mwatoñojokahu dehi chahosha Bayibolu haniyi nsañu?” Mukwakushimwina wumu hela ayedi atela kwikala kwakwihi namesa yanyikanda iku anakushimwina wunsahu wamumpanji.
Mwatela kutambula manaambala awantu anamwekeshi mpwila. Sonekenu fomu ya S-43 kulonda owu muntu akamulondeli.

Iyi njila yakokolaña antu amavulu chikupu. Hasitolu yeneni yamuLusaka, adisumbula akuCroatia amweni ngolofwana yayiwahi yanyikanda nawa alombeli nawu ayikopi. Haggai wadiña hangolofwana hanodu ifuku wahosheli nindi, “Akeñeleña kwiluka nsañu yidi munyikanda yetu. Chineli elukishili Englishi wanyi, twazatishili kamukanda kaGood News for All Nations. Ahosheli nawu ahanjekahu dehi nawaYinsahu jaYehova muCroatia. Twayilejeli netu ayi hawebu sayiti yetu nawa twayinkeli mukanda waChumanyi Chacheni Chatañishaña Bayibolu? Azañaleli nankashi. Twayinkeli keyala yetu niwena atwinkeli nawa twayilejeli netu chafuntawu kuEurope, akahanjeki nawaYinsahu jaYehova.”

Esekenu Kuzatisha iyi Njila Mukanu Kakweji:

Hakudifukula kwachisaka hanjekenu kumwatela kuya nakushimwina kudi antu amavulu mwiluña denu. Ikalenu nampinji yakuhitulukamu nawa tondenu nyitu yansañu yimukuhosha yikukokola antu amwiluña denu.