Mukanda Kufuma Kwizanvu Dalombolaña

Amanakwetu niAhela:

‘Twamusakililaña Nzambi mafuku ejima hadi enu wejima wenu, nakuyitena mukulomba kwetu. Twenda twanuka mudimu wenu wakukuhwelela kumesu aNzambi, yowu Tata yetu, nikukabakana kwenu kwakukeña, nikutatakena kwenu kwenzaña kukuchiñeja kwekala mudi Mwanta wetu Yesu Kristu.’ (1 Tesa. 1:2, 3) Awa mazu alumbulula chiwahi chitwatiyaña hadenu. Twamusakililaña Yehova hadi enu nimudimu wawuwahi wumwazataña. Muloñadi?

Chaaka chinamani, mwadikitileña hakukalakala ‘mudimu wakukuhwelela’ ‘nimudimu wakukeña’ hakuzata nyidimu yaWanta. Enu amavulu mwakeñeli njila jakuzatilamu chikupu mumudimu wenu wakushimwina. Amakwawu ayili nakuzatila kumaluña acheñi nikumatuña acheñi kudi kukaankila kweneni kwawakwakushimwina aWanta. Amakwawu anazati chikupu mumudimu wakushimwina kuhitila mukuzata wunsahu wakushimwina kwiluña kudi antu amavulu. Amavulu azatiluku wupayiniya wakukwasha muchilaaka chaChanukishu, mukakweji kendeleliyi nkoñi wañinza chipompelu hela hampinji yakampeni kadimena muAugust 2014. Hela chakwila yihandilu yenu yashiyashana, tuneluki netu mwamuzatilaña Yehova namuchima wejima, nawa tunayihameki. (Kol. 3:23, 24) ‘Mudimu wenu wakukuhwelela’ hichuma chatuleteshaña kumusakilila Yehova.

Twayisakililaña cheñi chimwazataña ‘mudimu wakukeña’ kutalisha hakutuña matala ashiyashana akuzatisha munyidimu yaNzambi mukaayi kejima. Chineli antu jaYehova anatwalekuhu kuvulilaku, tunakukeña swayi-swayi matala amuchidiwu. (Isa. 60:22) Toñojokenu, chaaka chinamani naambala yawakwakushimwina yadiña 8,201,545, avareji yawatudizi aBayibolu hakakweji hakakweji yadiña 9,499,933. Chineli antu jaYehova anakuvulilaku, tusanji twanyitayi twatuvulu tunakukeñeka kututohesha hela kutuwahisha. Kafwampi chumichi chinayi mukwila nawu Matala aWanta amavulu anakukeñeka. Cheñi nawa, tusanji twakubalumwinahu nyikanda tunakukeñeka mumatuña amavulu kulonda akwakubalumuna ashakameña nikuzatila kumaluña kwahoshañawu idimi dawu.

Dichi dinu, tunateli kudihula netu, ‘Chumanyi chinateli kwila kulonda nikwashi mudimu wakutuña itu tusanji?’ Etu amakwawu tunateli kudihana kulonda tuzatuku iwu mudimu wakutuña. Chili tweluka kutuña hela nehi, wejima wetu tukweti kukooleka kwakuhana yuma yetu yalema kulonda tukwashi iwu mudimu. (Yish. 3:9, 10) Hampinji yatuñileñawu aIsarela tabanaka, atiyili kuwaha kuhana yawana yayivulu chakwila ayilekesheli. (Kwid. 36:5-7) Chakadi nikujina, yakutalilahu yamuBayibolu yamuchidiwu yatukoleshaña nikutusañumuna. ‘Mudimu wenu wakukeña’ wumwazataña muniyi njila yalema hakukwasha mudimu wajila hichuma chikwawu chatuleñelaña kumusakilila Yehova.

Tukweti muloña wadimena watuleñelaña kuzañalala hakumona amakwetu anakutatakena. Chakutalilahu, shinshikenu amanakwetu amuSouth Korea. Kufuma tuhu mu 1950, amanakwetu atwansi amunidi ituña ayisha mukaleya hayaaka yashiyashana muloña wakukaana kufumpa nshimbi yawakwaKristu. Amanakwetu amavulu anatatakeni awa makabi chakadi kuzeya. Chakutalilahu chawu chakutatakena chakoleshaña chikuhwelelu chetu.

MuEritrea, amanakwetu asatu anashakami dehi mukaleya yaaka kubadika ha 20. Amakwawu kushilahu niaheletu nianyanawu anashakami mukaleya yaaka yantesha. Tunazati nañovu kulonda netu ayifumishumu, ilaña kwosi niwumu wanafumishuwu. Amanakwetu afumpa wanyi chikuhwelelu chawu. Ahemba kashinshi kawu hela chakwila anakuyanda chikupu. Hitwalalamenaña kulombelaku awa amanakwetu ashinshikaku.—Rom. 1:8, 9.

Kafwampi, enu amavulu ayisha wanyi mukaleya kukola yuma yimwakuhwelela. Hela chochu, enu amavulu munakumona kukala muloña wakushinakaja, kuyekela nayikatu, kuyidimbulula kudi enikwawu abula kwitiya hela antaña nikukala kukwawu kumweluka enu aweni. Hela munakumona yumiyi, munakutwalekahu kumuzatila Yehova nakashinshi. (Yak. 1:12) Tunakuyihameka. Twamusakililaña cheñi Yehova muloña mwatatakenaña nakashinshi.

Chalala, mudimu wenu wakukuhwelela, mudimu wenu wakukeña nikutatakena kwenu kwatuleñelaña ‘kumusakilila Yehova, muloña himuwahi.’ (Mas. 106:1) Twayikeña wonsu wenu nawa tunakulomba netu Yehova yayikoleshi, yayikwashi nikuyikiswila kulonda mutwalekuhu kumukalakela haya nyaka.

Yetu anakwenu,

Izanvu Dalombolaña dawaYinsahu jaYehova