Kuwahisha Njila Jetu Jakushimwinamu—Dizishenu Atudizi aBayibolu Ekali Nachaaku Chakudiza Bayibolu

Chikwalemena: Hakwila apami kuspiritu, atudizi aBayibolu atela kushaku muchima kulonda eluki yuma yakulema yaMwizu daNzambi. (Heb. 5:12–6:1) Atela kushaku muchima hakwila adizi. Twatela kuyileja nsañu yayiha yitweluka dehi nichiyinateli kuyikwasha. (Yish. 2:1-6) Chelukawu kusandujola halwawu kukuyikwasha atudizi kwakula malwihu amuBayibolu kuzatisha nyikanda yetu yawakwaKristu. Neyi asha muchima hakuzatisha nsañu yinakudizawu chikuyikwasha kwimana chakola hampinji yikumonawu makabi amwonañawu akwaKristu.—Luka 6:47, 48.

Yuma Yimwatela Kwila:

Yilejenu nenu atela kulomba wukwashu kudi Yehova mpinji yejima yinakudizawu.—Yow. 14:26; 1 Kor. 2:10.
Chimwatachika kudiza, mukoleshenu kadizi nenu watela kuloñeshela chadimu nsañu yimwakadiza. Mulejenu mumukanda wenu wumwazatishaña nawa mulejenu chakufunda yikuma.
Mukwashenu kadizi wenu yakuleña mumazu indi. Hampinji yimunakudiza, bayi mwiteja kadizi wenu yatañeña hohu ñakwilu yidi mumukanda.
Mukoleshenu kadizi yatañeña Bayibolu ifuku dejima. Mulejenu ndandanda yakutaña Bayibolu yidi ha jw.org, hela muKaposhi Kakutalila kaChibemba kaAugust 1, 2009, ifu 15 kalumbulula chinateli kwilayi. Kwikala nachaaku chakutaña Bayibolu mafuku ejima chakeñekaña kushaku muchima nawa mwafumaña yuma yayiwahi.—Mas. 1:2, 3.
Mulejenu kadizi wenu chakuwana ñakwilu yamalwihu amuBayibolu kuzatisha Watchtower Library hela Watchtower ONLINE LIBRARY hela Chitwa Chakusandujola Nachu. Mukwashenu yeluki jinsona jalumbululaña majina anyikanda yimwazatishaña hakupompa.

Esekenu Iyi Njila Mukanu Kakweji:

Hanyima yakumanisha kamutu hela kapetulu, mwihulenu kadizi wenu yalumbululi muwihi nsañu yinadiziyi. Neyi himukweti kadiziku, hitululukenu chimwatela kwihihisha nsañu yamuBayibolu hela paragilafu yamuKaposhi Kakutalila munyikuku yantesha kulonda muwahishi njila yenu yakutañilamu nakutiyisha.