‘Endenu Nachikuhwelelu Bayi Chakumona Namensuku’

Henohu kunashali dehi mpinji yantesha nakukuchika Yerusalema, kapostolu Pawulu wasonekeli nindi akwaKristu, amashidika amawahi aKristu, atela kukuhwelela kumona yihuñu nawa bayi akeña yakuditiyisha nachu aweni kuwahaku. (2 Tim. 2:3, 4) Chineli akanu kaayi katama keña akikisañani, twatela kwikala nachikuhwelelu chakola nakushindamena hayuma yakuspiritu. (2 Kor. 4:18; 5:7) Talenu vidiyo ‘yaEndenu Nachikuhwelelu Bayi Chakumona Namensuku’ (Yenu ha jw.org, nawa talenu hanasonekiwu nawu PUBLICATIONS > VIDEOS.) Shinshikenu kufwila yuma yakumujimba chikwekalili muhetu wakufwa kudi Nahami naAbitali. Hanyima yakutala vidiyo hitulukenu mumalwihu analondeluhu.

(1) ‘Chishimashimanyi . . . chemeni mwajila’ muyaaka nkulakaji yakusambila, nawa chumanyi chiyateleli kwilawu akwaKristu ashakamineña muYerusalema? (Mat. 24:15, 16) (2) Muloñadi chichakeñekeleña kwikala nachikuhwelelu hakwila nawu afumi mumusumba? (3) Yumanyi yateleli kwilawu hakwila atemuki? (4) Muloñadi Nahami naAbitali chashintajalileñawu? (Mat. 24:17, 18) (5) Kukalanyi kwamweniyi Racheli kwesekeli chikuhwelelu chindi hakufuma muYerusalema? (Mat. 10:34-37; Maku 10:29, 30) (6) Indi Etani wemikili ñahi chakutalilahu chachiwahi chakumukuhwelela Yehova? (7) Kukalanyi kwamwenuwu akwaKristu muPela? (8) Chikuhwelelu chaNahami naAbitali chatachikili kuzeya ñahi chovu-chovu? (9) Yehova wayakameneni ñahi akwaKristu ashakamineña muPela? (Mat. 6:33; 1 Tim. 6:6-8) (10) Tunateli kuyimbujola ñahi Abarahama niSara chineli kanu kaayi hikakukuma? (Heb. 11:8-10) (11) Indi Nahami naAbitali afuntililidi kuYerusalema, nawa muloñadi chatoñojokeleluwu mwaluwa? (Luka 21:21) (12) Chafuntiluwu aNahami naAbitali muYerusalema awanini yuma yidi ñahi? (13) Muloñadi chitwatela kwikala nachikuhwelelu chakola chayinu mpinji, henohu kukuma kwakanu kaayi kanda kushiki?—Luka 17:31, 32; 21:34-36.

Kwenda nachikuhwelelu (1) hikukuhwelela muwunlomboli waYehova, (2) kwiteja wunlomboli windi wutulomboleña (3) nikumwekesha netu twalemesha yuma yakuspiritu kubadika yuma yakumujimba. Dichi tufwilenuña kwenda nachikuhwelelu, nakukuhwelela netu “mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.”—1 Yow. 2:17.