CHATELA KUSHAKAMAWU AKWAKRISTU

Chibalu Chachiha chaKupompa Kwetu Kwamukachi kaMulungu

Kutachika muJanuary 2018, mukupompa kwamukachi kamulungu mukwikalaña nsañu yakudiza ninsañu yinakufuma muNew World Translation of the Holy Scriptures (nwtsty) yakudizamu yidi haintaneti, hela chakwila mudana mwidimi denu. Tunakuhweleli netu iyi nsañu yikuyikwashaña kuloñesha chiwahi kupompa. Sweje-e, yikuyikwasha kuswina kwakwihi naTata yetu wukweti kukeña, Yehova!

NSAÑU YAKUDIZA

Nsañu yakudiza yinabombelimu yisemwa, maluña ninsañu yikwawu yahosha hamadimi yakala kutiyishisha yekala mumavasi amakwawu amuBayibolu.

Matewu 12:20

Wanda Wunakufwinda Wishi: Inoñu davulileña kuzatishawu mumatala, yadiña nsamba yewumba yanyanya muyenkeleña manji amuolivi. Mwonji wambalawanda wakokeleña manji kulonda kesi kabutukeña. MuchiGiriki, nhoshelu yakwila nawu “wanda wunakufwinda wishi” yinateli kutalisha kuwanda wafumishileña wishi muloña wakesi kanashali iku muzuzu wunakukeha hela wunajimi. Wuprofwetu wekala haIsaya 42:3 wahosheleñahu dehi hawushona waYesu nawu wukajima wanyi iyena dachiñejañawu antu adizoza nawa ayandishañawu.

Matewu 26:13

Chalala: Izu dachiGiriki dakwila nawu a·menʹ dafumishawu kwizu dachiHeberu da ʼa·menʹ, daya mukwila nawu “chikali chochenochu,” hela “Mwomwenomu.” Yesu wazatishileña nankashi iyi nhoshelu kumatachikilu ayuma yinakuhoshayi, yinakukanayi hela yinakuprofwetayi, kulonda yamwekeshi nindi nakuhosha chalala nawa atela kumukuhwelela. Yesu hohu kankawindi diyi ashimunawu munyika yajila wazatishileña nhoshelu yakwila nawu “chalala” hela ameni. Neyi yafuntishahu kayedi, (a·menʹ a·menʹ), neyi chamwekeshaña mukanda waYowanu, mazu aYesu ayibalumuna nawu “chalala chikupu.” Ywn 1:51.

INTANETI

Mafoto, nyevulu yakuleña nimavidiyo akadi mazu niatudoli anakusefula nsañu yashimunawu muBayibolu.

Betefwaji, Mpidi yaMaolivi niYerusalema

Iyi vidiyo yayihi yinakumwekesha njila yeñilili muYerusalema kukabeta kamusela, kufuma mumukala wunakutenawu makonu nawu et-Tur—yatela diyi Betefwaji yatenawu muBayibolu—nakuya kuMpidi yaMaolivi. Betani, yekala kumusela waBetefwaji kumatelu amusela waMpidi yaMaolivi. Yesu niatumbanji twindi neyi adi muYerusalema, avulileña kukaama muBetani, makonu anakutenaku nawu el-ʽAzariyeh (El ʽEizariya ) ijina dachi Arabic daya mukwila nawu “Iluña daLazaru.” Chakadi nikujina, Yesu washakamineña kwitala daMata, Mariya niLazaru. (Mat 21:17; Mak 11:11; Lu 21:37; Ywn 11:1) Neyi anakufuma kumukala wawu nakuya kuYerusalema, Yesu watela wazatishileña njila yadifwana nayinadiña muvidiyo. HaNisani 9, 33 C.E., helili Yesu yakandameña hachimbulu kufuma kuMpidi yaMaolivi nakuya kuYerusalema, watela wazatishili njila yafuma kuBatefwaji nakuya kuYerusalema.

Mukwakwa wafuma kuBetani nakuya kuBetefwaji
Betefwaji
Mpidi yaMaolivi
Chinekineki chaKidironi
Mpidi Yatembeli

Musumali Mwifwaha Dakukatutu

Iwu mwevulu wunakumwekesha musumali wawulehi mainchi 4.5 wakupopa mwifwaha damuntu dakukatutu. Ifwaha dadeni adiwanini mu 1968, hampinji yavumbujolileñawu kukabeta kaluwunda kaYerusalema, wamumpinji yawaRoma. Iyi nsañu yinakumwekesha nawu azatishileña nyisumali hakupopa nachu muntu hamutondu. Iwu musumali wudi neyi nyisumali yazatishiliwu mashidika awaRoma hakumupopela Yesu Kristu hamutondu. Idi ifwaha adiwanini muchikasha chelola, chatenañawu nawu ossuary, chikasha muyashileñawu mafwaha oma amuntu wunajahiwu neyi nyisunyi yinatoki dehi. Chumichi chinakumwekesha nawu muntu apopeleleñawu hamutondu amujikileña.—Mat 27:35.