Sambilaku Kutiyañana Namanakweyi—Munjilanyi?

Fwikijenu munakushakama muÑaliliya mumafuku aYesu. Munayi kuYerusalema nakwanakana Chawija chaYisolu. Mumusumba munenzali akwenu akwakwitiya anafumi kumatuña akwakulehi. Munakukeña kuhana mulambu kudi Yehova. Iku munasendi mpembi nawa munakuya munjila yamumusumba yaya kutembeli munenzali antu. Chimunashiki, munawani mutembeli munenzali akwenu anakukeña kuhana nyilambu yawu. Ichi yinashiki dehi mpinji yenu yakuhana mpembi yenu kudi kapristu. Haniyi mpinji, himukwanuka nenu manakwenu, wudi mumusululu hela wudi mumusumba, wudi namuloña nanenu. Yesu walumbulwili chuma chimwatela kwila. (Tañenu Matewu 5:24.) Enu nimanakwenu wunayivulumuni munateli kwikala ñahi mukuwunda neyi chahosheliyi Yesu? Fundenu hadi ñakwilu yalala hansañu yidi heshina.

MWATELA . . .

• kuhosha hohu namanakwenu neyi munamoni nenu mwamweni munamuhilishi

• kumwolola hohu manakwenu neyi munamoni nenu nahili nankashi hela natachiki kuyitwika muloña

• kutiyilila nakanañachima neyi manakwenu nakulumbulula nawa hela chakwila munatiyishishi wanyi munatalishiyi lombenu kwanakena hakumuneñesha hela muloña wayuma yimuneli chakubula kwiluka

MANAKWENU WATELA . . .

• kulomba wukwashu kudi antu amakwawu muchipompelu kuhitila mukuyileja chimunamuneñeshi

• kuyizuwila, kuhosha yuma yejima yimunamuneñeshi nikukeña nindi mwiteji nenu mwatamisha

• kwiluka nindi munadizozi nawa munahamuki hakwila nawu mwinzi nakumuwana nikumwanakena chakufuma hamuchima

Hela chakwila kudifukula kwetu makonu kunabombelimu wanyi kulambula nyilambu yawanyama, chuma chahosheliyi Yesu hakuleta kuwunda namanakwetu chinesekani ñahi nakudifukula kudi Nzambi?