Komana Kutalatala muNsona Hefuku-Hefuku Kwayikwashaña?

Komana mundandanda yenu mwabombela kutaña nsona nimazu adi muKutalatala muNsona Hefuku Hefuku? Neyi dichimweleña wanyi, kwila mutachika nehi? Amavalu atalatalaña munsona nantetemena. Atoñojokaña hansañu yatañawu hampinji yikuzatañawu nyidimu yawu. (Yos 1:8; Ms 119:97) Yumanyi yimunateli kwila yikuyikwasha neyi mutaña Nsona? Tañenu mavasi amakwawu amuBayibolu hanafumi nsona kulonda mwiluki chidi nsañu. Esekenu kutoñojoka nsañu yidimu chiyinalumbululi chishina chidi munsona. Nkumininaku, zatishenu nsañu yidimu muchihandilu chenu. Neyi mwiteja Izu daNzambi kuyilombola, dikuyikwasha kwikala nachihandilu chachiwahi nawa mukudiluñisha chikupu —Ms 119:105.

Mukaayi kejima akwaBeteli adizaña muKutalatala muNsona Hefuku Hefuku nantetemena. Makonu, awa maprogiramu amavulu ayishaña haJW Broadcasting^® haPROGRAMS AND EVENTS. Mpinjinyi yakukumishaku yimwatalilihu programu yimu hela amavulu? Hadaha nsañu yikwawu yidihu yinateli kuyikwasha. Chakutalilihu, nsañu yaLoti yinateli kuyikwasha ñahi neyi munakufukula?

TALENU VIDIYO, BAYI MUKEÑA KAAYIKU (1YO 2:15), NAWA AKULENU AWA MALWIHU:

• Chishinanyi chamuBayibolu hashindamena kuhanjeka kwaKudifukula Kwantetemena?

• Nsañu yaLoti yamwekeshaña ñahi wubanji wekala mukukeña kaayi hela yuma yidi mukaayi?—Kut 13:12; 14:12; 19:3, 12, 13, 24-26

• Twamwekeshaña ñahi netu twamukeña Yehova bayi kaayi hela yuma yidi mukaayiku?