Bayi Mutiya Woma Kukuma kwaNshakaminu yaMakonuku

Katataka Yehova aleki kudiwunjika nakanu kaayi. Kwitiya kwakutwamba akakujilumuna, nyuza yakadibomba nayu yilukuki antu jaNzambi nawa Yehova wakajilumuna antu atama haAmagedoni. AkaKristu atalilaña chikupu iyi mpinji.

Hela chochu, tweluka wanyi yuma yejima kutalisha alukadi lwasweja. Chakutalilahu, tuneluki wanyi jiika mpinji yikatachika lukadi lwasweja. Tuneluki wanyi yuma yikaletesha akamatuña nachiyuulu kulukuka kwitiya. Nawa tuneluki wanyi cheñi mpinji yikahitahu neyi antu jaNzambi anayilukuki dehi hela yuma yikadibombelamu. Nawa tuneluki wanyi njila yakazatishayi Yehova hakujilumuna antu atama haAmagedoni.

Ilaña, Nsona yatuleja nsañu yinateli kutukwasha kubula kutiya woma hampinji yikamwekanaña yuma yejima iyi. Chakutalilahu, tuneluki netu tunakushakama kumakumishilu ‘amafuku akukuminina.’ (2Ti 3:1) Tweluka netu mafuku akulukuka kwitiya ‘akayihihisha’ kulonda akabuli kujilumuna kwitiya kwalala. (Mat 24:22) Tuneluki chikupu netu Yehova wakamwina antu jindi. (2Pe 2:9) Nawa tuneluki netu Owu atondawu kudi Yehova kujilumuna antu atama nikupulwisha izaza deneni haAmagedoni waloña nawa wukweti ñovu.—Chim 19:11, 15, 16.

Yuma yikamwekana kumbidi yikaletesha antu “akahwidijela muloña wawoma.” Hela chochu, neyi tutañaña nikutoñojokahu chikupu Yehova chayipulwishiliyi antu kunyima nihayuma yatulejayi yikamwekana kumbidi, tukemana “zululu-u nakwinuna nyitu [yetu] kwiwulu,” nakukuhwelela netu kupuluka kudi mukamwihi.—Luk 21:26, 28.